Fan Bingbing លើកទី១ ចែករំលែកពីមូលហេតុឈានដល់ការបែកបាក់ជាមួយគូដណ្ដឹង

2020-12-18 11:30:00
ចំនួនមតិ 0 | ចំនួនចែករំលែក 0

យោងតាមការចែករំលែករបស់តារាសម្ដែងស្រីល្បីឈ្មោះចិន Fan Bingbing រឿងអាស្រូវរបស់នាងបានធ្វើឲ្យប៉ះពាល់ដល់អតីតគូដណ្ដឹងខ្លាំងពេក ទើបនាងសម្រេចចិត្តកាត់ផ្ដាច់ចំណងស្នេហាជាមួយលោក។ កាលពីថ្ងៃទី ១៦ ខែធ្នូមុននេះ បណ្ដាញព័ត៌មាន Sina បានចុះផ្សាយពីបទសម្ភាសន៍ថ្មីរបស់តារាសម្ដែងស្រីលំដាប់ A ចិន Fan Bingbing ដែលនៅក្នុងជំនួបនេះដែរ ស្រីស្អាត ៣៩ឆ្នាំបានចែករំលែកពីមូលហេតុនៃការបែកគ្នារវាងនាង និងគូដណ្ដឹង ដែលជាតារាសម្ដែងប្រុស Li Chen កាលពីឆ្នាំ ២០១៩។

នៅអំឡុងពេលនោះ Fan Bingbing កំពុងជាប់ពាក់ព័ន្ធនឹងទោសគេចពន្ធ ដែលត្រូវពិន័យសរុបដល់ទៅ ១៣០លានដុល្លារ ត្រូវហាមឃាត់គ្រប់សកម្មភាពនៅក្នុងសិល្បៈ។ អំឡុងពេលនោះដែរ តួរឿងព្រះនាងយេយេប្រកាសបែកគ្នាជាមួយគូដណ្ដឹង តែមិនដែលបង្ហើបមូលហេតុឡើយ។ “ខ្ញុំអរគុណគាត់ដែលតែងតែផ្ដល់អ្វីល្អបំផុតដល់ខ្ញុំ តែកាលៈទេសៈខ្ញុំពេលនោះ គឺងាយប៉ះពាល់ដល់គេគ្រប់គ្នាខ្លាំងណាស់។ ការងាររបស់ Li Chen ជាច្រើនត្រូវបានលុបចោលដោយសារតែខ្ញុំ។ រឿងតែមួយគត់ដែលខ្ញុំអាចធ្វើឲ្យគាត់បាននោះគឺដើរចេញពីគាត់” Fan Bingbing បង្ហើប។

“នៅពេលពួកខ្ញុំបែកគ្នា មនុស្សជាច្រើនបានជេរស្ដីគាត់ ទាំងមិនដឹងមូលហេតុពីក្រោយ។ ដោយសារតែខ្ញុំ តែប៉ះពាល់ដល់ Li Chen និងប្អូនប្រុសជាខ្លាំង។ ខ្ញុំចង់កាត់បន្ថយការពាក់ព័ន្ធនេះឲ្យទាបបំផុត ទើបសម្រេចបែបនេះ។ មកដល់ពេលនេះ យើងនៅតែជាមិត្តល្អនឹងគ្នាដដែល”។

នៅពេលនេះ ២ឆ្នាំក្រោយរឿងអាស្រូវគេចពន្ធ វិថីចូលសិល្បៈរបស់ ស្រីស្អាតកើតឆ្នាំ ១៩៨១ នៅតែពិបាកដោយនាងមិនទាន់មានរឿងថ្មីថត ហើយបានត្រឹមតែថតឲ្យទស្សនាវដ្ដីមិនសូវល្បីឈ្មោះ៕

ប្រភព៖ news.zing.vn ប្រែសម្រួល៖ Caramel