សំបុត្រសុំទោសទៅកាន់មនុស្សដែលខ្ញុំស្រលាញ់ពេញបេះដូង

2020-02-10 10:20:00
ចំនួនមតិ 0 | ចំនួនចែករំលែក 0

ខ្ញុំអាចនឹងខ្វះភាពក្លាហាន មិនសូវចេះនិយាយស្តីវែកញែកនៅចំពោះមុខ ប៉ុន្តែសង្ឃឹមថា សំបុត្រសុំទោសមួយនេះ អាចបកស្រាយពាក្យពេចន៍ក្នុងចិត្ត អាចបង្ហាញពីការទទួលកំហុសដែលខ្ញុំបានធ្វើកន្លងមកដោយចេតនាឬអចេតនាក្តី។ ខ្ញុំក៏មានបំណងអ្វីច្រើន ក្រៅពីចង់ឲ្យមនុស្សដែលខ្លួនស្រលាញ់បានយល់ពីទឹកចិត្តនិងអធ្យាស្រ័យដល់ខ្ញុំផងចុះ។

ថ្វីត្បិតតែរូបកាយរបស់យើងទាំងពីរឃ្លាតឆ្ងាយពីគ្នា ប៉ុន្តែខ្ញុំនៅតែនឹករឭកដល់អ្នក នឹកទង្វើគ្រប់បែបយ៉ាង ចាប់តាំងពីថ្ងៃដំបូង ដែលយើងបានស្គាល់គ្នា។

ទោះបីជាពេលចាប់ផ្តើមខ្ញុំគិតថាស្នេហារបស់យើងរឹងមាំយ៉ាងណាក៏ដោយ នៅទីបំផុតពួកយើងនៅដើរដល់ចំណុចនេះដដែល។

ទទួលស្គាល់ថា ការបែកគ្នាលើកនេះគឺជាកំហុសរបស់ខ្ញុំ ប៉ុន្តែវាមិនមែនជាអ្វីដែលខ្ញុំរំពឹងទុកចង់ឲ្យកើតឡើងនោះឡើយ។

ខ្ញុំដឹងថាអ្នកកំពុងតែខឹង ខឹងខ្លាំងរហូតមិនចូលមើលសាររបស់ខ្ញុំដែលបានផ្ញើជាលើកចុងក្រោយ។

យ៉ាងណាក៏ដោយ ខ្ញុំនៅតែនឹកដល់អ្នកជានិច្ច នឹកមនុស្សម្នាក់ដែលធ្លាប់ព្រឹក្សានឹងគ្នា នឹកវត្តមានរបស់អ្នកដែលតែងតែជួយខ្ញុំរហូតមក នឹកទង្វើល្អៗ ភាពកក់ក្តៅ ភាពផ្អែមល្ហែមដែលអ្នកតែងផ្តល់ឲ្យ។

ក្រៅពីមិនអាចកែប្រែអ្វីបាន ខ្ញុំមានតែពាក្យ "សុំទោសៗៗ" ហើយក៏អរគុណចំពោះពេលវេលាដ៏មានតម្លៃ ដែលអ្នកបានចំណាយនិងលះបង់ជាមួយ៕

សុំទោសណា!