៤តំបន់ស្អាតត្រកាល ត្រូវចិត្តអ្នកចង់លម្ហែនឹងធម្មជាតិត្រួយស្មៅលាស់ខ្ចីក្នុងរដូវនេះ

2019-07-04 08:00:00
ចំនួនមតិ 0 | ចំនួនចែករំលែក 0

ក្នុងរដូវកាលនេះ សម្រាប់អ្នកចង់ស្រូបខ្សល់បរិសុទ្ធ លំហែអារម្មណ៍បែបធម្មជាតិ គួរមកលេងតំបន់៤ធំៗដែលកញ្ញា បង្ហាញជូនខាងក្រោម។ ទេសភាពបៃតងខ្ចី វាលស្មៅអមដោយរុក្ខជាតិលាស់ខ្ចីក្នុងរដូវធ្លាក់ភ្លៀង ធ្វើឲ្យអ្នកបានសប្បាយចិត្តយ៉ាងត្រជាក់ចិត្តបំផុត។

១. ចម្កាផ្កាពណ៌លឿង

ចម្ការផ្កានេះល្បីល្បាញណាស់នៅខេត្តកំពង់ស្ពឺ លាតសន្ធឹងលើផ្ទៃដីរាប់រយហិកតា ធ្វើឲ្យទិដ្ឋភាពនៅទីនោះស្រស់ស្អាតរកថាមិនត្រូវ។ ផ្កាស្នោរកំពុងរីកស្គុះស្គាយនេះ ខ្លះហៅថាផ្កាចង្រងស្វា ត្រូវគេប្រដូចនឹងទេសភាពស្អាតនៅកោះជេជូ ប្រទេសកូរ៉េ មើលទៅស្អាតដាច់កន្ទុយភ្នែក។ មុនពេលផ្កានេះត្រូវឈូសចោល អ្នកចង់ទៅលេងកុំភ្លេចមកផ្តិតរូបភាពឲ្យហើយនៅរដូវភ្លៀងនេះ។ ផ្កាស្នោដ៏ស្រស់បំព្រងនេះមានទីតាំងក្នុងភូមិអូរដារ ឃុំអមលាំង ស្រុកថ្ពង មានចម្ងាយប្រមាណ៥០ គីឡូម៉ែត្រពីទីរួមខេត្ត។

២. គីរីរម្យ

(រូបភាព៖ Triple Trip)

អំឡុងរដូវកាលនេះ ឧទ្យានជាតិគីរីរម្យមានទេសភាពស្អាតដូចស្ថានសួគិ៍នៅលើដី។ ខ្យល់អាកាសបរិសុទ្ធ ដើមស្រស់ដុះជាជួរ វាលខ្មៅបៃតងខ្ចីធ្វើឲ្យអ្នកទៅលេងរមណីយដ្ឋាននេះជាប់ចិត្តដកមិនរួច។ ទៅនេះអ្នកអាចស្រូបក្លិនផ្កាស្មៅ ថតរូបស្អាតៗជាមួយផ្កាចាហួយ រំសាយអារម្មណ៍នៅមាត់បឹងទឹកខៀវ រួមទាំងអាចបង្ហួសទៅលេងនៅថ្មលយ សសរស្តុក ទឹកធ្លាក់ ដំណាក់ស្តេច ទឹកជ្រោះអូរតាសេក ទឹកជ្រោះសំងាត់ ដែលគេល្បីមិនដាច់ពីមាត់ថាស្អាត។

(រូបភាព៖ Triple Trip)

(រូបភាព៖ iWALK Excursions)

៣. មណ្ឌលគិរី

សម្រាប់អ្នកស្រលាញ់ធម្មជាតិ ចង់ស្រូកយកខ្សល់បរិសុទ្ធ ថតរូបជាមួយប្រៃឈើបៃតងខ្ចីទៅខេត្តមណ្ឌលគិរីពិតជាមិនខុសបំណងទេ។ ខេត្តនេះ កាន់តែមានទេសចរទៅលេងច្រើនឡើងៗ ដោយសារទិដ្ឋភាពស្រស់បំព្រង និងបើទៅលេងចំរដូវកាលនេះផង អ្នកច្បាស់ជាលង់នឹងសម្រស់ធម្មជាតិវាលស្រងាត់របស់ខេត្តនេះមិនខាន។ មណ្ឌលគិរីមានកន្លែងដើរលេងដូចជា សមុទ្រឈើ សួនសត្វក្តាន់និងអូទ្រីស ទឹកធ្លាក់អូររនៀល អូផ្លាយ ផ្ទាំងថ្មធំ ភ្នំអណ្តូងស្នេហ៍ ទឹកធ្លាក់រមនា ទឹកជ្រោះសែនមនោរម្យ និងតំបន់ទេសចរណ៍ច្រើនកន្លែងទៀត ដែលសុទ្ធតែមានទេសភាពស្អាតមិនចាញ់គ្នានោះទេ។

៤. ទំនប់ស្ទឹងតាសាល

អ្នកនឹងលាន់មាត់សរសើរពីទេសភាពស្អាតគ្មានផ្ទឹមរបស់តំបន់ទេសចរលាក់ខ្លួនមួយនេះ ។ នៅតាមផ្លូវ ដើមឈើអមសងខាង បូករួមនឹងរុក្ខជាតិបៃតងខៀងស្រងាត់ក្នុងរដូវវស្សានេះ កាន់តែប្លែកអស្ចារ្យ។ មានផ្ទៃទឹកធំហ៊ុំព័ទ្ធដោយភ្នំតូចធំវែងអន្លាយរំលេចសម្រស់ធម្មជាតិព្រៃភ្នំ។ ដើម្បីទៅដល់ លោកអ្នកត្រូវដំណើរតាមផ្លូវជាតិលេខ ៤៤ ឆ្ពោះទៅរួមស្រុកឱរ៉ាល់ដល់រង្វង់មូលកន្ទួត ទៅត្រង់តាមផ្លូវលំចម្ងាយជាង ១៥ គីឡូម៉ែត្រដោយឆ្លងកាត់រមណីយដ្ឋានទេទឹកពុះ នឹងឃើញស្លាកបង្ហាញទំនប់ស្ទឹងតាសាល រួចបត់ឆ្វេងតាមផ្លូវកៅស៊ូចម្ងាយជាង ៤ គីឡូម៉ែត្រនឹងដល់តំបន់កម្សាន្តទេសភាពធម្មជាតិនេះ។