ស្រលាញ់គ្នា៥ឆ្នាំ ១០ឆ្នាំនៅបែក ស្នេហាកាន់តែយូរ កាន់តែងាយបែកមែនទេ?

2017-12-11 04:18:51
ចំនួនមតិ 0 | ចំនួនចែករំលែក 0

មានមនោសញ្ចេតនាខ្លះ ដើរបានជាងពាក់កណ្ដាលនៃមង្គលការទៅហើយ តែនៅតែមិនអាចគង់វង្សដល់វេលាចុងក្រោយបាន។

កាលគ្រានៅក្រលំបាក គ្រាន់តែស្ដាប់សំឡេងគ្នាប៉ុន្មាននាទីតាមទូរសព្ទ ឈរចាំគ្នានៅមុខផ្ទះក៏មានសុភមង្គលដែរ។ កាលពីមុន ទោះបីជាខកចិត្តច្រើនដងក៏គេមិននិយាយពាក្យបែកដោយងាយស្រួលនោះដែរ។ ដោយសារមូលហេតុនេះដែរ ទើបស្នេហាពីមុនគង់វង្សជាងពេលនេះ។

តែសម័យនេះ នៅពេលអ្វីៗក៏មានហើយ មនោសញ្ចេតនាកាន់តែងាយប្រេះឆា។ មានមនុស្សជាច្រើនស្រលាញ់គ្នារាប់ឆ្នាំមិនបានការ បែកគ្នាតែប៉ុន្មានខែ ទាំងប្រុសទាំងស្រីការជាមួយអ្នកផ្សេងបាត់។ ហើយក៏មានគូស្នេហ៍ខ្លះ បានឈានទៅដល់មង្គលការទៅហើយ តែបានតែមួយរយៈពេល ក៏បំបែកផ្លូវគ្នាបាត់។

គេប្រាប់ថា ស្រលាញ់កាន់តែយូរ ស្នេហាគ្រាន់តែជាទម្លាប់មួយ។ បាត់គ្នាមានអារម្មណ៍ខ្វះខាត នៅក្បែរគ្នាក៏គ្មានអារម្មណ៍អីពិសេស។ មនោសញ្ចេតនាដែលអូនបន្លាយរាប់ឆ្នាំ ហើយរំពឹងថានឹងដើរដល់ចុងផ្លូវនោះ បែរជាត្រូវដាច់អម្រែកកណ្ដាលផ្លូវទៅវិញ។

និយាយសរុបទៅ ស្រលាញ់គ្នាកាន់តែយូរកាន់តែងាយបែក ឬក៏យើងគ្មានហេតុផលអ្វីដើម្បីតស៊ូសម្រាប់គ្នាទៀត? នៅក្បែរគ្នាពេលនេះគ្រាន់តែជាទំនួលខុសត្រូវ ហើយទំនួលខុសត្រូវនេះក៏មិនអាចឈ្នះការទាក់ទាញពីកត្តាខាងក្រៅទៀតឡើយ ដូចនេះមានតែផ្លូវមួយគត់ដើម្បីដោះលែងគ្នា គឺចែកផ្លូវនេះឯង។ បែកគ្នាពីមនោសញ្ចេតនាយូរឆ្នាំមួយ អ្នកដែលត្រូវខាតបង់ជាងគេគឺមនុស្សស្រី ព្រោះនាងបានលះបង់យុវភាពរបស់នាងសម្រាប់អ្នក តែអ្នកដែលអ្នកនឹងជាមួយរហូតបែរជាមិនមែនជានាងទៅវិញ។ តែណ្ហើយចុះ បើមិនមែនជារបស់យើងទៅហើយ ព្យាយាមយ៉ាងណាក៏មិនមែនជារបស់យើងដែរ៕