ម្ដាយខំចិញ្ចឹមកូនម្នាក់ឯង៥ឆ្នាំ ចុងក្រោយកូនជ្រើសយកឪពុក ព្រោះមូលហេតុក្ដុកក្ដួលបំផុត
- 2017-09-26 00:50:00
- ចំនួនមតិ 0 | ចំនួនចែករំលែក 0
ម្ដាយខំចិញ្ចឹមកូនម្នាក់ឯង៥ឆ្នាំ ចុងក្រោយកូនជ្រើសយកឪពុក ព្រោះមូលហេតុក្ដុកក្ដួលបំផុត
នៅថ្ងៃដែលប្ដីរបស់នាងចេញទៅធ្វើការងារនៅទីក្រុង គេបាននិយាយប្រាប់នាងថា៖
“បងទៅមិនយូរទេ អូននៅផ្ទះមើលថែកូនឲ្យល្អ បងនឹងផ្ញើលុយឲ្យ”
នាងឱបប្ដីយ៉ាងណែន
“មើលថែខ្លួនផងណាបង”
នាងនាំកូនទៅរស់នៅជាមួយឪពុកម្ដាយនៅស្រុក។
អ្នកជិតខាងគ្រប់គ្នានាំគ្នាខ្សឹបខ្សៀវថានាងត្រូវប្ដីបោះបង់ចោលហើយ ប៉ុន្តែនាងនៅតែបញ្ជាក់ថាប្ដីរបស់នាងគ្រាន់តែទៅធ្វើការនៅទីក្រុងប៉ុណ្ណោះ ដើម្បីឲ្យនាងនិងកូនបានហូបស្រួល រស់នៅស្រួល។
ប្ដីរបស់នាងតែងទូរសព្ទមកលេងនាងមិនលស់ថ្ងៃ ហើយពេលដាច់ខែ គេក៏ផ្ញើរប្រាក់ឲ្យនាងនិងកូនបានចាយវាយ។ នាងតែងរង់ចាំថ្ងៃដែលប្ដីនឹងត្រលប់មកវិញ។
កន្លងផុតមួយឆ្នាំហើយ ដែលប្ដីរបស់នាងមិនបានទូរសព្ទមក ហើយក៏បានផ្ញើរលុយឲ្យនាងដែរ។ នាងមានអារម្មណ៍ភ័យព្រួយក្នុងចិត្ត មិនដឹងថាប្ដីរបស់ខ្លួនមានរឿងអ្វីឬក៏អត់ ទើបមិនបានទាក់ទងមកគ្នាយូរដល់ថ្នាក់នេះ។
នាងព្យាយាមស៊ើបសួរពីដំណឹងប្ដី តែបែរជាគ្មានសញ្ញាអ្វីទាល់តែសោះ។
ក្រោយស្វាមីលែងផ្ញើប្រាក់ នាងក៏សម្រេចចិត្តយកលុយដែលនៅសល់ខ្លះទៅជួលតូបលក់ផ្លែឈើក្នុងផ្សារ។
នាងតែងចេញពីផ្ទះតាំងពីព្រលឹម ហើយយប់ងងឹតទើបចូលផ្ទះវិញ។ នាងខំតស៊ូបែបនេះរហូត ដើម្បីចិញ្ចឹមក្រពះកូន ឪពុកម្ដាយចាស់ និងខ្លួនឯង។
៥ឆ្នាំកន្លងផុតទៅ
នៅសុខៗ ស្វាមីរបស់នាងក៏បង្ហាញខ្លួនឡើងព្រមជាមួយរថយន្តដ៏ទំនើប។
នាងសប្បាយចិត្តជាខ្លាំង ដែលស្វាមីជាទីស្រឡាញ់របស់ខ្លួនមានជីវិតរស់នៅល្អប្រសើរដូចដើម។ គេមិនបានមានរឿងអ្វីដូចដែលនាងគិតនោះឡើយ។
អ្នកជិតខាងរបស់នាងក៏ជួយត្រេកអរ ព្រោះគិតថានាងនិងកូននឹងផុតទុក្ខផុតលំបាកទៀតហើយចាប់ពីពេលនេះ។ នាងខ្លួនឯងក៏គិតបែបនេះដូចគ្នា។
នៅយប់នោះ ផ្ទៃមេឃពោរពេញទៅដោយពន្លឺផ្កាយ ប៉ុន្តែក្នុងបេះដូងនាងបែរជាហាក់ដូចមានព្យុះភ្លៀងកំពុងធ្លាក់មកទៅវិញ។
“បងមកលើកនេះព្រោះចង់លែងលះគ្នាជាមួយអូន!” ផុតសម្ដីរបស់ប្ដី នាងស្ទើរតែសន្លប់ទាំងជំហរ។
“បងលលេងជាមួយខ្ញុំមែនទេ?” នាងចាប់ដៃប្ដីណែន និងនិយាយទាំងញ័រមាត់។ “បងនិយាយការពិត បងឈប់ស្រឡាញ់អូនយូរហើយ” គេពោលបញ្ជាក់។
“បងឈប់ស្រឡាញ់ខ្ញុំយូរហើយ ចុះបងឲ្យខ្ញុំរង់ចាំធ្វើអី? ខ្ញុំមិនដែលឈប់ស្រឡាញ់បងទេ ខ្ញុំតែងរង់ចាំតែថ្ងៃបងត្រលប់មកវិញ ហេតុអ្វីក៏យើងត្រូវបែកគ្នាទៅវិញ?” នាងស្រក់ទឹកភ្នែកម៉ាត់ៗ ព្រោះទប់អារម្មណ៍លែងបាន។
ការពិត ប្ដីរបស់នាងបានធ្វើការ រកស៊ីរហូតមានមាសមានប្រាក់ និងរៀបការថ្មីជាមួយនារីស្រស់ស្អាតម្នាក់។ គេត្រលប់មកលើកនេះដើម្បីសុំនាងលែងលះ ឲ្យដាច់ស្រេច និងសន្យាផ្ដល់ប្រាក់មួយចំនួនឲ្យនាងចាប់ផ្ដើមជីវិតជាថ្មី។
នាងឃើញទឹកមុខ និងសម្ដីប្ដី នៅទីបំផុត ក៏បានដឹងថាប្ដីនាងបានផ្លាស់ប្ដូរពិតហើយ។
“បើបងត្រូវការលែងគ្នាជាមួយខ្ញុំពិតមែន ខ្ញុំក៏គ្មានជម្រើសអីផ្សេងដែរ ប៉ុន្តែកូន វាទើបមានអាយុ ១០ឆ្នាំ ខ្ញុំមិនចង់ឲ្យវាត្រូវខូចចិត្តទេ”។
“រឿងនេះស្រេចទៅលើកូនទៅចុះ សួរគេទៅថាគេចង់នៅជាមួយអ្នកណា” ប្ដីបញ្ជាក់។
ការពិតប្ដីរបស់នាងក៏ចង់បានកូនប្រុសទៅជាមួយដែរ ព្រោះប្រពន្ធថ្មីរបស់គេនៅក្មេង មិនទាន់ចង់ពពោះមានកូនទេ។ ចំណែកនាង នាងជឿជាក់ថាទោះយ៉ាងណាក៏កូនត្រូវរើសយកនាង ព្រោះនាងនិងកូនបានរួមសុខរួមទុក្ខលំបាកលំបិនជាមួយគ្នាច្រើនឆ្នាំហើយ ហើយគេក៏មិនដែលឃ្លាតឆ្ងាយពីនាងម្ដងណាដែរ។ នាងដឹងថាកូនស្និទ្ធស្នាលជាមួយនាងខ្លាំងណាស់។
នៅថ្ងៃលែងលះ
អាជ្ញាធរក៏បានសួរទៅកូនប្រុសថា នឹងជ្រើសរើសនៅជាមួយអ្នកណា?
“ខ្ញុំនឹងទៅនៅជាមួយប៉ា!”
ពេលនេះនាងមានអារម្មណ៍ថាមេឃទាំងមូលកំពុងបាក់សង្កត់មកលើនាងម្ដងទៀត។
“ម៉េចបានកូននិយាយអីចឹង កូនមិនស្រឡាញ់ម៉ាក់ទេហ្អ?” នាងចូលទៅឱបកូនប្រុសណែន ទាំងអស់សង្ឃឹម ខូចចិត្ត និងតក់ស្លុតចំពោះអ្វីដែលបានឮ។
“ម៉េចបានអូនឯងចង់ទៅនៅជាមួយប៉ា?” អាជ្ញាធរសួរទៅកូនប្រុស។
“ព្រោះប៉ាជាអ្នកមាន ប៉ាខ្ញុំមានលុយ ប៉ាចូលចិត្តទិញរបស់លេងថ្មីៗឲ្យខ្ញុំ” កូនប្រុសនិយាយតាមការគិតរបស់ខ្លួនឯង។ ពិតហើយ នៅពេលនេះប្ដីរបស់នាងមានលុយច្រើន ហើយជាច្រើនថ្ងៃមកនេះ គេក៏បានប្រើលុយទិញសំលៀកបំពាក់ និងរបស់លេងថ្មីៗឲ្យកូនប្រុសរបស់ពួកគេមករហូត ហើយកូនប្រុសរបស់គេមើលទៅក៏ហាក់ដូចជាចូលចិត្តឪពុករបស់គេជាងម្ដាយដែរ។
តាំងពីរស់នៅជាមួយគ្នាមក នាងមិនដែលតាមចិត្តកូនទេ នាងមិនដែលទិញរបស់លេងថ្លៃៗឲ្យកូន នាងមិនដែលផ្ដល់លុយឲ្យកូនបានចាយវាយតាមចិត្តនោះទេ។ នាងតែងបង្រៀនកូនឲ្យចេះសន្សំសំចៃព្រោះគ្រួសាររបស់ពួកគេមនឋានៈក្រីក្រ ដូច្នេះត្រូវចេះថែទាំថ្នាក់ថ្នមរបស់ប្រើប្រាស់គ្រប់យ៉ាង។ ពេលណាកូនធ្វើខុស នាងក៏ធ្លាប់ជេរស្ដី និងវាយកូនជាច្រើនដង។
មើលទៅកូនប្រុសប្រហែលជាមានចិត្តស្អប់នាងយូរហើយ ទើបជ្រើសរើសទៅរស់នៅឪពុកគេដែលពេលនេះមានគ្រប់យ៉ាងទាំងអស់។
“ហេតុអីកូនមិននៅជាមួយម៉ាក់ ចាប់ពីថ្ងៃនេះទៅ កូនចង់បានអីចាំម៉ាក់ទិញឲ្យ អាវថ្មី ខោថ្មី ស្បែកជើងថ្មី របស់លេងថ្មីៗ នៅជាមួយម៉ាក់ទៅណាកូនណា” នាងយំរៀបរាប់ប្រាប់កូនប្រុស។
“ទេ! អូនអត់ស្រឡាញ់ម៉ាក់ទេ អូនចង់ទៅនៅជាមួយប៉ា!”
ប្ដីរបស់នាងលួចញញឹមយ៉ាងសប្បាយចិត្ត។ មើលទៅមិនអត់ប្រយោជន៍ទេដែលពីរបីថ្ងៃមកនេះគេតាមយកចិត្តកូន និងកសាងភាពស្និទ្ធស្នាលជាមួយកូន។
“អស់ហើយ បេះដូងម៉ាក់រលាយអស់ហើយ ហេតុអ្វីកូនធ្វើដាក់ម៉ាក់បែបនេះ?” នាងលើកដៃខ្ទប់មុខយំ កណ្ដាលចំណោមមនុស្សគ្រប់គ្នា។
នៅថ្ងៃដែលអតីតស្វាមីនាំកូនឡើងឡានចេញពីផ្ទះនាង នាងបានទិញនំ និងរបស់លេងឲ្យកូនប្រុសជាទីស្រឡាញ់ តែកូនប្រុសក៏បានបោះនំនិងរបស់លេងទាំងនោះចោលលើដី និងប្រាប់ឲ្យឪពុកគេបើកឡានចេញឲ្យលឿនៗ។
នាងបានត្រឹមតែសម្លឹងមើលរបស់លេង និងនំចំណីលើដី ហើយស្រក់ទឹកភ្នែកខូចចិត្តនឹងទង្វើរបស់កូន។
នាងនៅតែចេញទៅលក់ផ្លែឈើដូចមុន ប៉ុន្តែលក់លែងដាច់ដូចមុនទៀតហើយ ព្រោះម្ចាស់តូបលែងមានចិត្ត លែងមានអារម្មណ៍នឹងការលក់ ដោយសារនឹកដល់កូនខ្លាំងពេក។
នាងចេះតែគិត ពេលនេះតើកូនសុខសប្បាយយ៉ាងម៉េចខ្លះហើយ? ញ៉ាំបានឆ្អែតគេងបានស្រួលទេ? ម្ដាយចុងមានធ្វើបាបកូនរបស់នាងឬទេ?
ជាច្រើនលើកនាងសម្រេចចិត្តទិញសំបុត្ររថភ្លើងដើម្បីធ្វើដំណើរទៅទីក្រុង ប៉ុន្តែទីបំផុតក៏មិនបានសម្រេចសូម្បីមួយលើក។ នាងមិនដឹងថាត្រូវចាប់ផ្ដើមពីត្រង់ណា ព្រោះទីក្រុងធំទូលាយ ហើយក៏មិនដឹងថាអតីតប្ដីរបស់នាងនៅកន្លែងណា ហើយរកស៊ីអ្វី។
រហូតមកដល់ថ្ងៃមួយ នាងបានទទួលសំបុត្រមួយច្បាប់មានសែកប្រាក់ចំនួន ១០០ដុល្លារ ដែលត្រូវបានគេផ្ញើមកពីទីក្រុង។ នៅក្នុងសំបុត្រមួយច្បាប់នោះមានសារខ្លីៗសរសេរថា
“ខ្ញុំស្រឡាញ់អ្នក”
“អ្នកណាផ្ញើលុយមកឲ្យខ្ញុំ ឬមានគេផ្ញើមកច្រឡំផ្ទះ?”
នាងមានអារម្មណ៍ចម្លែកចិត្ត មិនដឹងថាអ្នកណាជាអ្នកផ្ញើមក ហើយក៏មិនហ៊ានយកសែកទៅប្ដូរយកលុយនៅធនាគារ ព្រោះខ្លាចថាជាការផ្ញើច្រឡំ បើម្ចាស់គេដឹង នាងនឹងមានរឿង។
មួយខែក្រោយមក នាងក៏បានទទួលសែកប្រាក់ចំនួន ១០០ដុល្លារដូចមុន។ នាងគិតក្នុងចិត្តថាប្រាកដជាមាននរណាម្នាក់លួចជួយនាង។
ចាប់ពីពេលនោះមក រៀងរាល់ដើមខែ នាងតែងទទួលបានប្រាក់ និងសារខ្លីៗថា “ខ្ញុំស្រឡាញ់អ្នក”។
នៅថ្ងៃបុណ្យចូលឆ្នាំ នាងក៏ទទួលបានសំបុត្រមួយច្បាប់ ដោយអត្ថន័យខាងក្នុងសរសេរថា៖
“មកដល់អ្នកម៉ាក់ជាទីស្រឡាញ់
ម៉ាក់សុខសប្បាយទេ កូនដឹងថាម៉ាក់ស្រឡាញ់កូនណាស់។ កូនចាកចេញមកទុកឲ្យម៉ាក់នៅតែម្នាក់ឯង ម៉ាក់ប្រហែលជាមិនទម្លាប់ ប្រហែលជានឹកដល់កូនណាស់មែនទេ?
ម៉ាក់ ការពិតកូនស្រឡាញ់ម៉ាក់ខ្លាំងណាស់ កូនក៏មិនទម្លាប់ដូចគ្នា កូននឹកម៉ាក់ណាស់ ម៉ាក់ដឹងទេ?
ម៉ាក់ កូនដឹងថាម៉ាក់ខូចចិត្តប៉ុណ្ណាដែលកូនរើសមកនៅជាមួយប៉ា តែម៉ាក់ដឹងទេហេតុអ្វីកូនជ្រើសរើសបែបនេះ? កូនមិនចង់ឲ្យម៉ាក់លំបាកទេ កូននៅជាមួយប៉ា កូនអាចសុំលុយពីប៉ាបាន ហើយកូនក៏ផ្ញើមកឲ្យម៉ាក់ ម៉ាក់នឹងមិនបាច់ងើបពីយប់ទៅលក់ផ្លែឈើតទៅទៀត
ម៉ាក់ សូមម៉ាក់ថែទាំសុខភាពឲ្យបានល្អ ម៉ាក់មិនចាំបាច់បារម្ភពីកូនទេ ថ្ងៃណាមួយកូននឹងត្រលប់ទៅលេងម៉ាក់
ម៉ាក់ ម៉ាក់គឺជាម៉ាក់ល្អបំផុតសម្រាប់កូន កូនគ្មានផ្លូវចោលម៉ាក់ដាច់ខាត ម៉ាក់ចាំកូនបន្តិចទៅណា ចាំកូនធំជាងនេះកូននឹងនាំម៉ាក់មកនៅជាមួយកូន ហើយយើងនឹងរស់នៅជាមួយគ្នាដោយមានក្ដីសុខ
កូនស្រឡាញ់ម៉ាក់” នាងយំឱបសំបុត្ររបស់កូនណែនជាប់នឹងដើមទ្រូង។
នាងទើបតែយល់ថាហេតុអ្វីកូនធ្វើដាក់នាងបែបនេះនៅថ្ងៃនោះ។
ការពិតកូនប្រុសនាងមិនដែលគិតបោះបង់នាង ឬស្អប់នាងឡើយសូម្បីតែម្ដង។
នាងទើបតែយល់មូលហេតុដែលកូនប្រុសចាកចេញពីនាងទៅ គឺដើម្បីបានរស់នៅជាមួយនាងម្ដងទៀតទៅថ្ងៃអនាគតប៉ុណ្ណោះឯង ៕