ស្រលាញ់គ្នាបែបណា កុំឲ្យអ្នកនៅក្បែរខ្លួនឈឺចាប់?
- 2017-09-23 09:30:00
- ចំនួនមតិ 0 | ចំនួនចែករំលែក 0
ស្រលាញ់គ្នាបែបណា កុំឲ្យអ្នកនៅក្បែរខ្លួនឈឺចាប់?
គូស្នេហ៍មួយចំនួនពេលស្រលាញ់គ្នា បានធ្វើឲ្យអ្នកដែលនៅជិតខ្លួនដូចជាម្ដាយឪពុក បងប្អូន សាច់ញាតិ រួមទាំងមិត្តភ័ក្ដិ ត្រូវឈឺចាប់។ ចំណែកមូលហេតុមកពីកត្តាច្រើនយ៉ាងណាស់ តែ កញ្ញា សូមបង្ហាញតែពីវិធីធ្វើឲ្យស្នេហា មិនបង្កឲ្យអ្នកក្បែរខ្លួនឈឺចាប់បានហើយ៖
១.កុំស្រលាញ់គ្នាងប់ងុលហួសហេតុពេក
ឲ្យតែមានពេកថា «ពេក» គឺមិនល្អឡើយ ហើយកាលណាគូស្នេហ៍ស្រលាញ់គ្នាដល់ថ្នាក់នេះ រហូតលែងស្គាល់គ្រួសារមិត្តភ័ក្ដិ នោះច្បាស់ជាអ្នកក្បែរខ្លួនខូចចិត្តមិនខាន។ ព្រោះគេអាចនឹងគិតគូរពីសង្សារច្រើនជាង។
២.បែងចែកពេលវេលាច្បាស់លាស់
ត្រូវចាំថា បើចង់ឲ្យស្នេហាទៅមុខដោយរលូន គួរចេះបែងចែកពេលវេលាឲ្យបានច្បាស់លាស់រវាងគ្រួសារ មិត្តភ័ក្ដិ សង្សារ និងពេលវេលាផ្ទាល់ខ្លួនផង។ ព្រោះកុំឲ្យម្ខាងណាតូចចិត្តតូចថ្លើមអី ហើយការទុកពេលផ្ទាល់ខ្លួន គឺដើម្បីធ្វើរឿងដែលខ្លួនចង់ធ្វើ ដោយមិនចាំបាច់ប្រាប់អ្នកដទៃ។
៣.របស់ក៏ត្រូវបែងចែកឲ្យស្មើគ្នាដែរ
មិនមែនតែពេលវេលាទេដែលត្រូវបែងចែកនោះ ចំណែកកាដូ ឬរបស់របរទិញជូនមនុស្សជុំវិញខ្លួន រួមទាំងសង្សារនៅថ្ងៃពិសេសក៏ត្រូវឲ្យមានគ្រប់គ្នាដែរ តែបើមិនស្មើក៏ត្រូវប្រហាក់ប្រហែលគ្នាដែរ។ ព្រោះមិនធ្វើឲ្យនរណាម្នាក់អន់ជាងគ្នា រវាងមនុស្សដែលអ្នកស្រលាញ់ទាំងអស់។
៤.ត្រូវប្រាកដក្នុងចិត្តថានោះជាស្នេហា មិនមែនតណ្ហា
មនុស្សមួយចំនួនមិនទាន់ចេះបែងចែកថាខ្លួនលង់ស្រលាញ់នរណាម្នាក់ដោយសារស្នេហា ឬក៏ជាចំណង់ផ្លូវភេទឡើយ។ ដូចនេះគួរប្រាកដរឿងពីរយ៉ាងក្នុងចិត្តនេះឲ្យច្បាស់ ទើបអ្នកនៅជិតខ្លួនក៏មានក្ដីសុខជាមួយ។
៥.ស្វែងរកឲ្យឃើញស្នេហាពិតមួយនឹងមួយ
មិនគួរធ្វើខ្លួនសាវាមានស្នេហាច្រើនរាប់មិនអស់នោះទេ ព្រោះបែបនេះគ្មានអ្នកនៅក្បែរខ្លួនរីករាយនឹងឃើញអ្នកជាមនុស្សមិនប្រាកដប្រជាឡើយ។ តែបើអ្នកមានស្នេហាស្មោះមួយនឹងមួយ ហើយគ្មានរឿងអាស្រូវទៀតនោះ នរណាក៏ត្រេកអរដែរ៕
ចុចអាន៖ទោះស្រឡាញ់គ្នាយូរប៉ុនណាក៏ដោយ តែកុំផ្តេកផ្តួលលើគេឲ្យសោះ!