កង់ជួយឲ្យស្ត្រីខ្មែរម្នាក់អាយុជិត៤០ឆ្នាំកាន់តែក្មេងជាងវ័យ

2017-08-03 08:24:10
ចំនួនមតិ 0 | ចំនួនចែករំលែក 0

អ្នកស្រី ហេង ស៊ីវហ្គិច ជាកីឡាការិនីប្រណាំងជម្រើសជាតិកម្ពុជាមានកាយសម្បទាមាំមួន សុខភាពល្អ និងវ័យហាក់នៅក្មេងដដែល បើប្រៀបធៀបនឹងកាលពី១០ឆ្នាំមុន។ កត្តាដែលធ្វើឲ្យអ្នកស្រីមើលទៅក្មេងជាងវ័យគឺជិះកង់។

អ្នកស្រី ស៊ីវហ្គិចដែលមានអាយុ៣៩ឆ្នាំ និងមានកូន៥នាក់បានប្រាប់ថា តាំងពីក្មេងរហូតដល់អាយុប្រហែល៣០ឆ្នាំ អ្នកស្រីមានរាងកាយមិនរឹងមាំ សាច់មិនហាប់ណែន ឧស្សាហ៍វិលមុខ ឈឺក្បាល ហើយកោសខ្យល់ជារឿយៗ។ ប៉ុន្តែនៅពេលអ្នកស្រីចាប់ផ្ដើមជិះកង់មក សុខភាពក៏កាន់តែល្អប្រសើរជាលំដាប់ កម្លាំងមាំមួន និងញុំាអាហារបានតាមចិត្ត។ ចាប់ផ្តើមជិះកង់មួយសប្តាហ៍ដំបូងបានធ្វើឲ្យអ្នកស្រីឈឺខ្លួនប្រាណខ្លះ ប៉ុន្តែក្រោយៗមកស្រួលខ្លួន ហើយអារម្មណ៍កាន់តែសប្បាយរីករាយ។

លោកស្រីបានចាប់ផ្តើមជិះកង់ប្រហែលជាអាយុ៣០ឆ្នាំដែលរហូតដល់ពេលនេះមានរយៈពេលជិត១០ឆ្នាំហើយ។ លោកស្រីជឿថា ការហ្វឹកហាត់ជិះកង់របស់លោកស្រីបានធ្វើឲ្យខ្លួនប្រាណហាក់ដូចក្មេងជាងវ័យ។ ទោះបីវ័យកាន់តែច្រើន ប៉ុន្តែលោកស្រីកាន់បានជាប់ជម្រើសជាតិកម្ពុជាសម្រាប់ចូលរួមការប្រកួតក្នុងព្រឹត្តិការណ៍កីឡាធំប្រចាំអាស៊ីអាគ្នេយ៍គឺស៊ីហ្គេមថែមទៀតផង។

ស៊ីវហ្គិចបញ្ជាក់ថា តាមធម្មតាលោកស្រីហ្វឹកហាត់ជិះកង់ចម្ងាយពី៣០ទៅ៥០គីឡូម៉ែត្រក្នុងមួយថ្ងៃ ប៉ុន្តែដើម្បីចូលរួមប្រកួតកីឡាស៊ីហ្គេម លោកស្រីត្រូវហាត់ជិះចម្ងាយពី៥០គីឡូម៉ែត្រដល់ជាង១០០គីឡូម៉ែត្រ។ រឹតតែអស្ចារ្យសម្រាប់លោកស្រីទៀតនោះគឺហាត់ជិះជាមួយបុរសៗដែលមានកម្លាំងខ្លាំងៗទៀតផង៕