បើមានឱកាសសារភាព គួរតែសារភាពឲ្យហើយទៅ កុំចាំដល់គ្រប់យ៉ាងហួសពេល
- 2017-07-04 07:35:42
- ចំនួនមតិ 0 | ចំនួនចែករំលែក 0
បើមានឱកាសសារភាព គួរតែសារភាពឲ្យហើយទៅ កុំចាំដល់គ្រប់យ៉ាងហួសពេល
គ្រាន់តែស្រឡាញ់មនុស្សម្នាក់តើខុសដែរមែនទេ? អ្នកណាអាចឃាត់វាបានទៅ ព្រោះនេះជាធម្មជាតិរបស់មនុស្សទៅហើយ អ្វីដែលសំខាន់គឺយើងមិនបានទៅបង្ខំ ឬ បំបែកបំបាក់គេដើម្បីឲ្យមកស្រឡាញ់យើង។
សម្រាប់មនុស្សស្រីក៏ដោយប្រុសក៏ដោយ ការសារភាពគឺជារឿងមួយដែលពិបាក ព្រោះបើមិនជោគជ័យគឺជារឿងមួយដែលយើងពិបាកទទួលយកបំផុត ហើយជាពិសេសគឺមនុស្សស្រីតែម្ដង ទោះបីជាមានចិត្តស្រឡាញ់អ្នកណា ក៏មិនអាចនឹងនិយាយបានព្រោះតែគ្មានភាពក្លាហាននឹងប្រឈម ម្យ៉ាងទៀតបើសិនជាមនុស្សប្រុសដែលនាងស្រឡាញ់បដិសេធន៍ទៀត នោះវាអាចធ្វើឲ្យគាត់ឈឺចាប់បំផុត។
ប៉ុន្តែ តើដឹងទេថាការសារភាព គឺជារឿងមួយដ៏អស្ចារ្យបំផុត ពីព្រោះ ទោះជោគជ័យ ឬបរាជ័យក៏យើងបានបង្ហាញពីអារម្មណ៍យើងចេញមកក្រៅដែរ យ៉ាងហោចណាស់យើងមានភាពស្មោះត្រង់នឹងខ្លួនឯង និង មនុស្សប្រុសដែលយើងស្រឡាញ់។ ម្យ៉ាងវិញទៀតសារភាពហើយអាចនឹងមានចម្លើយ ២ ដែលរត់មករកអ្នក ទី ១ គឺជោគជ័យ និង ទី ២ គឺត្រូវគេបដិសេធន៍ តែបើយើងរក្សាវាមិនប្រាប់គេ គឺយើងមានចម្លើយតែ ១ ប៉ុណ្ណោះ គឺបរាជ័យ។ តើមានមនុស្សស្រីប៉ុន្មាននាក់ទៅដែលអាចសារភាពការស្រឡាញ់ចេញមក? ប្រហែលជាមិនច្រើននោះទេ ពួកគេសុខចិត្តរក្សាវារហូតដល់ស្លាប់ចិត្តទៅវិញក៏មាន ហើយខ្លះទៀតរង់ចាំរហូតដល់គេមានសង្សារ ឬ ក៏មានគ្រួសារហើយក៏ថាបាន ពេលនោះហើយទើបគ្រប់យ៉ាងត្រូវហួសពេល ទោះបីជាអ្នកចង់ប្រាប់គេក៏គ្មានឱកាសទៀតដែរ ព្រោះគេមានមនុស្សដែលគេស្រឡាញ់បាត់ទៅហើយ។ វាជាពេលដែលយើងត្រូវឈឺចាប់ និង ខូចចិត្តបំផុតដែលត្រូវឈរមើលមនុស្សដែលខ្លួនស្រឡាញ់បានទៅអ្នកផ្សេងទាំងគេទើបតែស្គាល់គ្នា។
យើងត្រូវគិតថាជីវិតដែលនៅសល់មិនយូរទេ ហើយពេលខ្លះក៏យើងមិនអាចមើលឃើញពីថ្ងៃស្អែកថាជីវិតយើង ឬ ជីវិតគេយ៉ាងម៉េចដែរ ដូច្នេះគួរតែបំពេញបំណងខ្លួនឯង កុំឲ្យមានការសោកស្ដាយក្នុងឆាកជីវិត ហើយកុំគិតថាការសារភាពជារឿងដែលត្រូវខ្មាសគេ ការពិតវាបានបង្ហាញថាយើងជាមនុស្សដែលក្លាហាន និង រឹងមាំម្នាក់ ហើយក៏មិនមានមនុស្សច្រើនដែរដែលអាចធ្វើដូចយើង។
ក្លាហានឡើង បើស្រឡាញ់នរណាម្នាក់សារភាពប្រាប់គេទៅ ទោះលទ្ធផលល្អ ឬ អាក្រក់ក៏ជាអ្វីដែលយើងត្រូវការដែរ។ ប្រាប់គេទៅ កុំលាក់ក្នុងចិត្តទៀតអី នាំតែឈឺចាប់ម្នាក់ឯងទេ។
កុំឲ្យដូចខ្ញុំ សូម្បីតែឱកាសនិយាយថា «ខ្ញុំស្រឡាញ់គេ» ក៏ខ្ញុំគ្មានដែរ ចុងក្រោយសល់តែការសោកស្ដាយ និង មិនអស់ចិត្តដែលមិនអាចសូម្បីដែលហាមាត់និយាយប្រាប់គេ៕
ពី ៖ មនុស្សស្រីដែលខ្វះភាពក្លាហានម្នាក់