អាយុ២៣ឆ្នាំ រយៈពេលរសាត់អណ្ដែតបំផុតរបស់ជីវិតមនុស្ស
- 2017-06-09 07:10:49
- ចំនួនមតិ 0 | ចំនួនចែករំលែក 0
អាយុ២៣ឆ្នាំ រយៈពេលរសាត់អណ្ដែតបំផុតរបស់ជីវិតមនុស្ស
២៣ គឺជាតួលេខដែលធ្វើឲ្យមនុស្សវិលវល់មិនដឹងថាទៅណាមកណា នៅពេលដែលទើបចេញពីសាលាហើយឈានជើងចូលក្នុងសង្គមមួយដែលធំជាងយើងស្រមៃពីមុនឆ្ងាយណាស់។
មានថ្ងៃខ្លះ យើងបាត់បង់ទាំងស្រុងនូវទិសតំបន់ មិនដឹងថាគួរចាប់ផ្ដើមពីណា និងត្រូវធ្វើអ្វី? យើងគ្រាន់តែចង់ព្រលែងចោលទាំងអស់ ឈប់បារម្ភពីរឿងអ្វីមួយ។ អាយុ២៣ អ្នកខ្លះគិតថាជាពេលវេលាដ៏ស្អាតបំផុតក្នុងជីវិតមនុស្ស តែហេតុអ្វីបានជាយើងគិតថាវាគឺជាពេលដែលរសាត់អណ្ដែតបំផុតក្នុងជីវិតទៅវិញ។
អាយុ២៣ យើងដឹងថាយើងមិនមែនតូចទៀតទេ ដឹងថាជីវិតនេះគឺពោរពេញទៅដោយឧបសគ្គ មនុស្សមានល្បិចកលច្រើន។ ឈានជើងចេញពីសកលវិទ្យាល័យ ហើយចាប់ផ្ដើមចេញធ្វើការដើម្បីរកប្រាក់ចិញ្ចឹមជីវិត។ យើងមានអារម្មណ៍ថាហត់ ពេលត្រូវប្រកួតប្រជែងជាមួយគ្នា។ អ្នកណាពូកែនឹងត្រូវគេស្អប់ អ្នកអន់នឹងត្រូវគេមើលងាយ។ យើងចង់ឲ្យពេលវេលាត្រលប់ថយក្រោយ នៅពេលដែលយើងនៅរៀននៅឡើយ ហើយមិនចង់ឈ្នះចាញ់ជាមួយអ្នកណា តែពេលគិតឡើងវិញមានតែការស្រងាកចិត្ត ព្រោះយើងមិនទាន់មានអ្វីទាំងអស់នៅក្នុងដៃ។ មានអារម្មណ៍ខ្លួនឯងមិនទាន់រកឃើញផ្លូវដើរសម្រាប់ជីវិត។
អាយុ២៣ យើងដឹងថាអ្វីគឺជាសម្ពាធនៅក្លាយជាមនុស្សធំ។ យើងដឹងថាយើងមិនអាចទទួលបានការចិញ្ចឹមបីបាច់ និងថែរក្សារបស់គ្រួសារតទៅទៀត។ យើងដឹងថា ពេលនេះខ្លួនទីពឹងខ្លួន ដើម្បីចិញ្ចឹមខ្លួន។ ហើយតែងតែប្រឈមនឹងសំនួរចាក់ដោតដូចជា៖ រៀនចប់មានការងារឬនៅ? ធ្វើអី? ប្រាក់ខែយ៉ាងម៉េចដែរ? យើងត្រូវតែទទួលខុសត្រូវនូវរាល់ការសម្រេចចិត្តរបស់ខ្លួន។ យើងចាប់ផ្ដើមដឹងពីតម្លៃរបស់លុយ ហើយនៅពេលរកមិនបានត្រូវគេគិតថាយើងបរាជ័យ។
អាយុ២៣ ស្រលាញ់គ្នាបាន តែបើគិតពីរឿងរៀបការវិញគឺមិនអាចទៅរួចទេ។ តែងតែប្រទះសំណួរថា៖ មានប្ដីនៅ? អាជីពការងារមិនទាន់ទាំងមានផង យកប្ដីមកបានអីហូប? មានទាន់បានត្រៀមខ្លួនរួចរាល់ដើម្បីធ្វើប្រពន្ធ ធ្វើម្ដាយគែឯណា។ អ្នកជិតខាងចេះតែស៊ិះស៊ូស ឯម៉ែឪចេះតែតឿន។
អាយុ២៣ មានអារម្មណ៍ថាខ្លួនឯងរសាត់អណ្ដែតខ្លាំងមែនទែន នៅពេលដែលអ្វីក៏មិនទាន់មានឲ្យប្រាកដ។ ចរិតវិញគឺច្របូកច្របល់រវាងក្មេង និងចាស់។ រាល់យប់គឺជាការគិតពីអនាគត ការពិបាកចិត្តរបស់មនុស្សពេញវ័យ មិនដឹងថាខ្លួនត្រូវធ្វើអ្វីខ្លះ?