អត់ចង់ធាត់ គួរកុំញ៉ាំអាហារ ៦យ៉ាងនេះនៅពេលល្ងាច

2017-03-20 09:01:05
ចំនួនមតិ 0 | ចំនួនចែករំលែក 0

អាហារពេលល្ងាចក៏ជាអាហារដ៏សំខាន់មិនចាញ់ពេលផ្សេងៗនោះឡើយ។ ប្រសិនបើមិនចង់ធាត់ខូចរាងខូចរៅទេនោះ សូមកុំញ៉ាំអាហារខាងក្រោមនេះឲ្យសោះ។ ចង់ដឹងមានអាហារអ្វីខ្លះ មកមើលខាងក្រោមនេះតែម្ដង៖

១. អាហាររសជាតិហឹរ មនុស្សជាច្រើននៅពេលបច្ចុប្បន្នប្រាកដជាចូលចិត្តញ៉ាំអាហារដែលមានរសជាតិហឹរខ្លាំង តែយកល្អគួរឈប់ ពុំដូច្នោះទេនឹងអាចធ្វើឲ្យអ្នកធាត់មិនខាន ព្រោះការទទួលទានរបស់ហឹរៗនឹងបង្កការរំខានដល់ដំណេករបស់អ្នក ធ្វើឲ្យមានអាការៈចុកសៀតក្នុងពោះ ធ្វើឲ្យប្រព័ន្ធរំលាយអាហារមានបញ្ហា និងប្រឈមមុខនឹងបញ្ហាជាតិអាស៊ីដថែមទៀតផង។ តែប្រសិនបើអ្នកនៅតែចង់ទទួលទានខានមិនបាន គួរទទួលទានយ៉ាងហោចឲ្យបាន ៣ម៉ោងមុនចូលគេង។

២. អាហារមានជាតិខ្លាញ់ អាហារប្រភេទនេះនឹងធ្វើឲ្យអ្នកមានអារម្មណ៍មិនស្រួលខ្លួនពេលគេង និងធ្វើឲ្យមានអារម្មណ៍ស្ពឹកស្រពន់ថែមទៀត ពេលក្រោកពីគេងនៅពេលព្រឹក។

៣. អាហារផ្អែមៗ ក្រោយញ៉ាំអាហារពេលល្ងាច មនុស្សជាច្រើនចូលចិត្តហូបបង្អែមតាមក្រោយ ប៉ុន្តែនេះមិនមែនជាទម្លាប់ល្អឡើយ ព្រោះអាហារផ្អែមៗនឹងធ្វើឲ្យយើងគេងលក់មិនស្ងប់ និងធ្វើឲ្យកម្រិតជាតិស្ករក្នុងឈាមកើនឡើងខ្លាំង លើសពីការញ៉ាំបង្អែមនៅពេលថ្ងៃ។

៤. អាហារសាច់សុទ្ធ អ្នកខ្លះចូលចិត្តញ៉ាំអាហារប៉ូវៗនៅពេលល្ងាច ជាពិសេសអាហារដែលមានសាច់ ដូចជាសាច់អាំង -ល- ប៉ុន្តែប្រសិនបើទទួលទានអាហារប្រភេទសាច់នៅពេលល្ងាចដូច្នេះ នឹងធ្វើឲ្យក្រពះត្រូវធ្វើការធ្ងន់ ហើយក៏ជះផលមិនល្អដល់ដំណេកផងដែរ។

៥. មិនញ៉ាំអាហារពេលល្ងាចសោះ មនុស្សជាច្រើនប្រាកដជាគិតថាការអត់អាហារពេលល្ងាចនឹងមិនធ្វើឲ្យធាត់ តែនេះគឺជាការគិតខុសទៅវិញទេ ព្រោះវានឹងធ្វើឲ្យយើងឃ្លានរហូតដល់គេងមិនលក់ ធ្វើឲ្យរាងកាយបានទទួលការសម្រាកមិនគ្រប់គ្រាន់ និងអាចនាំឲ្យញ៉ាំកាន់តែច្រើនទៀតនៅពេលបន្ទាប់។

៦. នំ និងអាហារញ៉ាំលេងផ្សេងៗ

អ្នកខ្លះមុនគេងចូលចិត្តញ៉ាំនំផ្សេងៗខណៈដែលកំពុងមើលទូរទស្សន៍ ឬធ្វើកិច្ចការផ្សេងៗ ប៉ុន្តែកុំភ្លេចថាគ្រឿងផ្សំក្នុងនំទាំងនោះ គឺមានជាតិស្ករ ដែលអាចធ្វើឲ្យអ្នកធាត់ដូចគ្នា៕