គុណសម្បត្តិ Vs គុណវិបត្តិ ពេលមិនប្រើគ្រឿងសម្អាង
- 2017-02-16 02:22:23
- ចំនួនមតិ 0 | ចំនួនចែករំលែក 0
គុណសម្បត្តិ Vs គុណវិបត្តិ ពេលមិនប្រើគ្រឿងសម្អាង
សម្រាប់ស្ត្រី ការផាត់មុខតែងខ្លួនជារឿងចំបង និង សំខាន់ ប៉ុន្តែក៏មាននារីៗមួយចំនួនសម្រេចចិត្តមិនប្រើគ្រឿង Make up ដែរ។ ខាងក្រោមនេះគឺជាគុណប្រយោជន៍ និងគុណវិបត្តិមួយចំនួនពេលស្រីៗយើងជ្រើសរើសមិនប្រើគ្រឿងសម្អាង៖
គុណសម្បត្តិ
១. រៀនរស់ និងទទួលយកសម្រស់ធម្មជាតិរបស់ខ្លួន៖ បើយើងមានទម្លាប់ប្រើគ្រឿង Make up រយៈពេលយូរ យើងនឹងមិនមានទំនុកចិត្តនោះទេពេលមិនមានពួកវា។ ទោះយ៉ាងណា ស្រីគ្រប់រូបគួរដឹងថាយើងអាចរស់ដោយគ្មានវា ហើយក៏អាចមានទុកចិត្តលើខ្លួនឯងដែរ។
២. មិនចំណាយពេលច្រើន៖ មិនបាច់ត្រូវងើបពីព្រលឹមដើម្បីលាបក្រេមម្សៅ តែងខ្លួនរាល់ថ្ងៃ។ យើងអាចចំណាយពេលគេងបន្ថែម និងញ៉ាំអាហារពេលព្រឹកបានតាមសម្រួល។
៣. មានទំនុកចិត្តជាងមុន៖ ពេលទម្លាប់មិនប្រើបានហើយ យើងនឹងមានអារម្មណ៍ថាមានទំនុកចិត្តជាងពេលមុនៗ ក្នុងការបង្ហាញនូវអ្វីដែលជាយើងពិតប្រាកដ មិនមែនត្រូវលាក់ខ្លួននៅពីក្រោមក្រេមម្សៅរហូតទេ។
៤. ស្បែកមានសុខភាពល្អជាងមុន៖ ប្រើគ្រឿង Make up ច្រើនប្រភេទ និងរយៈពេលយូរប្រាកដជាប៉ះពាល់ដល់ស្បែកមិនខាន។ ពេលយើងឈប់ប្រើរបស់ទាំងនោះ ស្បែកនឹងត្រឡប់មករកភាពស្អាតដើមរបស់វាវិញបន្តិចម្ដងៗ។
៥. កាត់បន្ថយចំណាយ៖ បើសរុបទៅ ការចំណាយរបស់ស្ត្រីយើងក្នុងមួយខែៗ ទៅលើគ្រឿង Make up អស់មិនតិចនោះទេ។
គុណវិបត្តិ
១. គ្មានភាពខុសប្លែក និងទាក់ទាញ៖ ទោះបីយើងអាចសន្សំលុយបានច្រើន តែសម្រស់របស់យើងនឹងគ្មានអ្វីប្រែប្រួលនោះទេ។ ការតែងខ្លួននឹងជួយឲ្យយើងមានគំនិតថ្មីៗ រកអ្វីដែលប្លែក និងស្អាតៗ។
២. មើលទៅស្លេក៖ ជាពិសេសពេលថតរូប។ បើចង់ឲ្យស្បែកស្អាត ទាល់តែយើងថែរក្សាស្បែកឲ្យបានដិតដល់ដូចជាញ៉ាំអាហារ ផឹកភេសជ្ជៈ និងគេងឲ្យបានត្រឹមត្រូវ។
៣. មិនអាចលាក់បាំងមុន ឬ ស្នាមលើមុខបាន៖ មិនមានស្បែកណាដែលល្អ ១០០% នោះទេ ហេតុនេះហើយទើបគ្រឿងតែងមុខសំខាន់ពេលយើងចង់លាក់បាំងពួកវា។
៤. ចូលចំណោមមិនចុះ៖ បើយើងមិនបានតាមដាន ឬ ប្រើប្រាស់គ្រឿងសម្អាងរយៈពេលយូរ យើងមិនដឹងទេថាគេដើរដល់ណាហើយ។ នេះជាមូលហេតុដែលយើងចូលគេមិនចុះពេលមិត្តភ័ក្ដិនិយាយរឿងអស់នេះ។
៥. ពេលអស់កម្លាំង មើលឆាប់ដឹង៖ ព្រោះគ្មានអ្វីបិទបាំងភាពស្លក់នោះទេ ជាពិសេសរង្វង់ភ្នែកខ្មៅ៕