គន្លឹះទប់ទល់អារម្មណ៍ឆេវឆាវ
- 2017-01-18 11:08:51
- ចំនួនមតិ 0 | ចំនួនចែករំលែក 0
គន្លឹះទប់ទល់អារម្មណ៍ឆេវឆាវ
គ្មានអ្នកណាដែលសប្បាយចិត្តរហូតនោះទេ អារម្មណ៍មិនល្អ ខឹង ស្មុគស្មាញ គឺជារឿងមួយដែលមនុស្សជៀសមិនផុត ជាពិសេសស្រីៗ ព្រោះការងារកំប៉ិកំប៉ុក១០០ជំពូក។ ប៉ុន្តែបើសិនជាយើងបណ្ដោយតាមតែអារម្មណ៍ខឹងនោះវាមិនល្អឡើយព្រោះវានាំឲ្យយើងខាតប្រយោជន៍ និង សៅហ្មង។
ដូច្នេះខាងក្រោមនេះជាវិធីដែលអាចជួយឲ្យអ្នកចេះគ្រប់គ្រងអារម្មណ៍នៅពេលដែលអ្នកខឹង៖
1. គិតមុននឹងនិយាយ៖ មិនថាអ្នកឬក៏គេទេឲ្យតែខឹងគឺអីក៏និយាយដែរ ប៉ុន្តែអ្នកនឹងអាចស្ដាយក្រោយនៅពេលដែលអ្នកនិយាយតាមតែចិត្តខឹងបែបនេះ។ អ្នកគួរតែចំណាយពេលបន្តិចដើម្បីគិតមុននឹងអ្វីៗជ្រុលហួសអស់។
2. តាំងចិត្តឲ្យត្រជាក់សិនចាំបង្ហាញពីកំហឹងអ្នកតាមក្រោយ៖ នៅពេលដែលអ្នកបាត់ខឹងហើយនោះជាពេលល្អដែលអ្នកអាចនិយាយឬបង្ហាញពីអារម្មណ៍របស់អ្នកដើម្បីឲ្យគេដឹង ព្រោះពេលនោះអ្នកអាចគ្រប់គ្រងអារម្មណ៍ខ្លួនឯងបាន ហើយមិនសូវជាបង្កបញ្ហាដល់អ្នក និងអ្នកដទៃផងដែរ។
3. ធ្វើលំហាត់ប្រាណខ្លះៗ៖ ការហាត់ប្រាណគឺជាសកម្មភាពមួយដែលអាចជួយកាត់បន្ថយភាពស្មុគស្មាញ។ បើសិនជាអ្នកមានអារម្មណ៍មិនល្អឬខឹងនឹងរឿងអ្វីមួយ អ្នកគួរតែទៅហាត់ប្រាណ ឬ ធ្វើចលនាខ្លួនប្រាណអ្វីមួយដែលអាចជួយឲ្យអ្នករីករាយ និង ធូរស្រាលជាងមុន។
4. សម្រាករយៈពេលខ្លី៖ អ្នកគួរតែសម្រាកបន្តិច នៅពេលដែលអ្នកមានអារម្មណ៍មិនល្អ។ ការសម្រាកដោយស្ងប់ស្ងាត់អាចជួយឲ្យអ្នកមានអារម្មណ៍ល្អឡើងវិញក្នុងការដោះស្រាយបញ្ហាដោយមិនធ្វើតាមតែចិត្តខឹងនោះឡើយ។
5. កំណត់ដំណោះស្រាយដែលអាចធ្វើបាន៖ បើអាចសូមកុំផ្ដោតទៅលើអ្វីដែលធ្វើឲ្យអ្នកខឹងអី គួរតែស្វែងរកដំណោះស្រាយដ៏ល្អវិញទើបប្រសើរ។ បើសិនជា កូនរបស់អ្នកធ្វើឲ្យបន្ទប់រញ៉េរញ៉ៃនោះ អ្នកគួរតែបិទទ្វារបន្ទប់ហើយដើរចេញ ជាជាងការបញ្ចេញកំហឹងដាក់កូន។
6. អភ័យទោស៖ អភ័យទោសគឺជារឿងមួយដ៏ល្អដែលអ្នកគួរតែធ្វើ ព្រោះវាអាចធ្វើឲ្យខ្លួនអ្នកមានតម្លៃ ហើយអាចឲ្យរឿងដែលមិនល្អកន្លងទៅដោយមិនធ្វើឲ្យនរណាម្នាក់ឈឺចាប់។
អ្នកគួរតែព្យាយាមអនុវត្តនូវវិធីទាំងនេះក្នុងការទប់ទល់ពេលដែលអ្នកខឹង ឬស្មុគស្មាញ នឹងរឿងអ្វីមួយ ជាជាងយកការបញ្ចេញកំហឹងមកដោះស្រាយបញ្ហា ដែលអាចឲ្យអ្នកដទៃឈឺចាប់ និង អាចឲ្យអ្នកមានវិប្បដិសារីផងដែរ។
ប្រភព៖ Mayoclinic