៩ ប្រយោគពី Meghan Markle លើកទឹកចិត្តស្រ្តីឲ្យរឹងមាំ និងជឿជាក់លើខ្លួនឯង
- 2020-01-09 04:00:00
- ចំនួនមតិ 0 | ចំនួនចែករំលែក 0
៩ ប្រយោគពី Meghan Markle លើកទឹកចិត្តស្រ្តីឲ្យរឹងមាំ និងជឿជាក់លើខ្លួនឯង
Meghan Markle មិនមែនជាមនុស្សស្រីធម្មតាឡើយ នាងមានចក្ខុវិស័យ និងបានទាមទារសមភាពដោយការតស៊ូមតិ តាំងពីមិនទាន់ចូលវ័យជំទង់ម្ល៉េះ។ ក្នុងវ័យទើបតែ ១១ ឆ្នាំ នាងបានសរសេរសំបុត្រផ្ញើទៅ អ្នកស្រី Hillary Clinton ដើម្បីតវ៉ាឲ្យផ្លាស់ប្តូរការផ្សព្វផ្សាយពាណិជ្ជកម្មរបស់ក្រុមហ៊ុនសាប៊ូលាងចានមួយ ដែលនិយាយថាមនុស្សស្រីមានតួនាទីនៅតែផ្ទះបាយ។
ទោះបីមានវ័យក្មេងក៏ដោយ Meghan Markle បានខិតខំដើម្បីរកសិទ្ធិស្មើគ្នាឲ្យមនុស្សស្រីទាំងអស់។ រហូតមកទល់ពេលនេះ នាងត្រូវបានអញ្ចើញ ឲ្យឡើងនិយាយពីសមភាពយេនឌ័រ ក្នុងថ្ងៃសិទ្ធិនារីអន្តរជាតិ និងក្លាយជាឯកអគ្គរដ្ឋទូតពិភពលោករបស់ World Vision Canada ថែមទាំងជាផ្នែកមួយនៃ យុទ្ធនាការទឹកស្អាត (Clear Water Campaign ) ផងដែរ។
Markle ក៏បាននិយាយពីការបែកចែកឲ្យច្បាស់រវាងការងារសប្បុរសនិងការងារអាជីព ដោយភ្ជាប់ជាមួយនឹងប្រយោគលើកទឹកចិត្តដល់មនុស្សស្រី ឲ្យចេះប្រើជីវិតរស់នៅ ប្រកបដោយភាពរឹងមាំនិងជឿជាក់។
១. មុនស្រលាញ់អ្នកដទៃ ត្រូវចេះស្រលាញ់មើលថែខ្លួនឯងឲ្យបានល្អ។
២. មនុស្សស្រីចេះ Make Up ជាងពាក់កណ្តាលពិភពលោកទៅហើយ ប៉ុន្តែយើងក៏ត្រូវចេះបញ្ចេញមតិដូចគ្នា ពុំនោះទេយើងគ្មានសិទ្ធិ ដើម្បីសម្រេចចិត្តលើកិច្ចការធំៗឡើយ។
៣. ជីវិតរបស់មនុស្សម្នាក់ៗ មិនមែនសំខាន់លើពណ៌សម្បុរនោះទេ ឲ្យតែអ្នកមានជំហរជឿជាក់លើខ្លួនឯង ខ្មៅឬសគ្មានអ្វីត្រូវខ្វល់។
៤. ទោះអ្នកធ្វើជាចាហ្វាយនៅក្នុងក្រុមហ៊ុន ឬជាថៅកែស្រីក៏ដោយ ត្រូវចេះបែងចែកតួនាទីឲ្យបានច្បាស់ពេលមកដល់ផ្ទះវិញ ឬទៅកន្លែងណាផ្សេង ចូររក្សាតម្លៃឲ្យថ្លៃថ្នូរមិនក្រអើតក្រទម។
៥. មនុស្សភាគច្រើនឆ្ងល់ថា ហេតុអីខ្ញុំខំថតកុនផង យកលុយទៅធ្វើការងារសប្បុរសផង ហើយខ្ញុំក៏សួរទៅវិញថា មានអ្វីដែលធ្វើមិនបាននោះ?
៦. កើតជាមនុស្សស្រី មិនមែនមានន័យថា អ្នកមិនអាចធ្វើការងារណាដែលមនុស្សប្រុសអាចធ្វើបាននោះទេ។
៧. បើអ្នកមានឱកាសក្លាយជាមនុស្សល្បី កុំភ្លេចមានទំនួលខុសត្រូវផង ធ្វើជាគម្រូល្អ និងចេះរកវិធីដើម្បីលើកទឹកចិត្តអ្នកដទៃ។
៨. អ្នកប្រាកដជាចង់ធ្វើជាមនុស្សស្រីដែលស្រស់ស្អាត យ៉ាងណាកុំភ្លេចជួយការពារសិទ្ធិរបស់ស្រីៗគ្នាឯងផង។
៩. ក្នុងរឿងស្នេហា មនុស្សពីរនាក់ស្រលាញ់គ្នា សង្ឃឹមថាអ្នកផ្សេងបានយល់ និងមិនលូកដៃក្នុងជីវិតឯកជនរបស់គេ ព្រោះវាជាសុភមង្គលផ្ទាល់ខ្លួនរបស់មនុស្សម្នាក់ៗ។
សរុបមក Meghan Markle ត្រូវបានគេស្គាល់ថាជាមនុស្សស្រី ដែលមានភាពជឿជាក់ មានទំនុកចិត្តខ្ពស់ មានជំហរឹងមាំលើខ្លូនឯង និងអាចធ្វើរឿងពីរក្នុងពេលតែមួយ ដូច្នេះហើយបានជានាងសង្ឃឹមថា ការចែករំលែកបទពិសោធន៍តិចតួច អាចផ្តល់ប្រយោជន៍ធំដល់មនុស្សស្រីទាំងឡាយដែលបានអានអត្ថបទមួយនេះ។
ចុចអានបន្ត៖ Meghan ចែករំលែកអាថ៌កំបាំងទាំង ៥ ដែលជួយឲ្យនាងក្លាយជាស្រ្តីជោគជ័យ