ឪពុកសុខចិត្តបៀមបំពង់ព្យួរសារ៉ូមក្នុងមាត់ ព្រោះខ្លាចកូនរងា

2019-12-23 05:20:00
ចំនួនមតិ 0 | ចំនួនចែករំលែក 0

សកម្មភាពដ៏រំជួលចិត្តរបស់លោកឪពុកម្នាក់មកពីប្រទេសចិន បានធ្វើឲ្យមនុស្សជាច្រើនសឹងតែទប់ទឹកភ្នែកមិនបាន ហើយបានសរសើរថានេះពិតជាទឹកចិត្តឪពុកដ៏ពិតប្រាកដមែន។

មនោសញ្ចេតនារបស់ឪពុកចំពោះកូនគឺមិនអាចវាស់វែងបានឡើយ គឺជ្រៅជាមហាសមុទ្រទៅទៀត។ ឪពុកអាចធ្វើអ្វីគ្រប់យ៉ាងដើម្បីឲ្យកូនទទួលបានអ្វីដែលល្អបំផុត។ ជាក់ស្ដែង កាលពីប៉ុន្មានថ្ងៃមុននេះ លោកឪពុកម្នាក់មកពីខេត្ត Hunan ប្រទេសចិន បានធ្វើឲ្យអ្នកប្រើបណ្ដាញសង្គមចែករំលែករឿងរបស់លោកយ៉ាងគគ្រឹកគគ្រេង។

តាមនោះដែរ បុរសខាងលើមើលកូនបណ្ដើរ បើកភ្នែកសឹងមិនរួចដោយសារហត់ខ្លាំងពេក។ ប៉ុន្តែអ្វីដែលទាក់ភ្នែកគេខ្លាំងជាងគេនោះគឺ លោកពុករូបនេះកំពុងបៀមបំពង់ព្យូរសារ៉ូមនៅក្នុងមាត់ មុនពេលទឹកសារ៉ូមនេះហូរចូលខ្លួនកូនរបស់លោក។

តាមការរាយការណ៍ កូនអាយុ១ខួបរបស់លោក បានរាគ១សប្ដាហ៍មកហើយ ទើបត្រូវចូលពេទ្យព្យួរសារ៉ូមបែបនេះ។ ប៉ុន្តែដោយសារទឹកសារ៉ូមមានសភាពត្រជាក់ ខ្លាចកូនទ្រាំមិនបាន ទើបលោកយកបំពង់មកបៀមក្នុងមាត់ ឲ្យពេលទឹកសារ៉ូមឆ្លងកាត់ នឹងលែងត្រជាក់ខ្លាំង។ ក្រោយពេលវីដេអូឃ្លីបរបស់លោកត្រូវបានចែករំលែកអនឡាញ មនុស្សជាច្រើនអត់នឹងមិនសរសើរមិននូវទង្វើរបស់លោក៕