មានន័យបំផុត! សំបុត្រឪពុកផ្ដែផ្ដាំកូនស្រីទើបចូលវ័យ ២០ឆ្នាំ
- 2019-10-25 04:00:00
- ចំនួនមតិ 0 | ចំនួនចែករំលែក 0
មានន័យបំផុត! សំបុត្រឪពុកផ្ដែផ្ដាំកូនស្រីទើបចូលវ័យ ២០ឆ្នាំ
ថ្ងៃនេះជាថ្ងៃខួបកំណើតកូន។ ធ្មេចបើកៗ កូនអាយុ ២០ឆ្នាំបាត់ហើយ។ តាមទំនៀម បន្តទៅនេះកូននឹងឈានចូលវ័យជាមនុស្សធំ អាចកំណត់របៀបរស់នៅ និងផ្លូវជីវិតរបស់កូនបានដោយខ្លួនឯង។ កូននឹងបានប្រឈមមុខនឹងបញ្ហានានាក្នុងជីវិតបន្តបន្ទាប់ និងដំណាលៗគ្នាដូចជាការសិក្សា ស្នេហា ការរៀបការ ជីវិតគ្រួសារ ការងារ-មុខរបរ ជាដើម។ ការចាត់ការចំពោះបញ្ហាទាំងអស់នេះ នឹងអាចកំណត់បានថាជីវិតរបស់កូនស្រីនឹងមានក្ដីសុខឬក៏អត់។
ក្នុងឱកាសដ៏សំខាន់នេះ ពុកសូមផ្ដាំកូនស្រីថា...
មនុស្សយើងត្រូវធ្វើដំណើរបន្តទោះបីក្នុងគ្រាលំបាក ដូច្នេះចូរកូនកុំរអ៊ូរទាំច្រើនដាច់ខាត។ ខ្សែជីវិតពេលខ្លះប្រៀបដូចជាខ្សែទឹក កើតនៅឯណា ហូរឆ្លងកាត់ទីណា ទៅដល់ទីណា យើងមិនអាចកំណត់។ គ្មានអ្វីដែលហៅថាល្អរហូត និងអាក្រក់រហូតទេ អ្វីដែលយើងធ្វើបានគឺមានតែប្រឈមមុខជាមួយវា និងទទួលយកវាប៉ុណ្ណឹង។ ការរអ៊ូរទាំគឺជាសភាពរបស់មនុស្សទន់ខ្សោយ ហើយក៏មិនបានជួយអ្វី គ្មានផលល្អទាំងសម្រាប់ខ្លួនឯង និងអ្នកដទៃ។
**ទុក្ខ ឬសុខ នៅឃ្លាតពីគ្នាបន្តិចប៉ុណ្ណោះ** មានគំនិតគិតក្នុងផ្លូវល្អជីវិតយើងនឹងសុខ។ សុខ ឬទុក្ខ មិនពាក់ព័ន្ធនឹងយើងមានតិច ឬច្រើន ព្រោះរបស់ខ្លះ (ឬមនុស្សខ្លះ) បានមកក៏គ្មានអ្វីគួរឲ្យរំភើប បាត់ទៅវិញក៏គ្មានអ្វីគួរឲ្យស្ដាយ។ ចូរកូនរៀនរាប់មិត្តកសាងទំនាក់ទំនងល្អ មានភាពស្មោះត្រង់ នោះទាំងមនុស្ស និងទេវតានឹងថែរក្សាកូន ឲ្យមានក្ដីសុខគ្រប់កន្លែង។ ការមានគំនិតអាក្រក់នឹងធ្វើឲ្យជីវិតយើងជួបតែរឿងអាក្រក់ និងសុបិនអាក្រក់។
តម្លៃមនុស្សស្ថិតលើការចេះ “ឲ្យ” ចំណែកការ “សុំ” ចាត់ទុកថាជារឿងគួរឲ្យខ្មាស។ ចេះឲ្យ មានន័យថាកូនមាន ចំណែកចាំតែសុំ គឺបញ្ជាក់ថាកូនខ្វះខាត។ បានជួយអ្នកដទៃ យើងទទួលបានក្ដីសុខ ចាំតែសុំពីអ្នកដទៃ អ្វីដែលបានមកគឺប្ដូរជាមួយតម្លៃរបស់យើង។ សំណាងអាក្រក់មិនមែនសុខៗក៏កើតឡើងទេ ប៉ុន្តែទាំងអស់គឺសុទ្ធតែជាឧបនិស្ស័យ។ ឧបនិស្ស័យល្អនាំមកនូវសំណាងល្អ និស្ស័យល្អត្រង់នេះអាចសំដៅលើ ចិត្តនឹងនរមិនច្រាស់ច្រាល់ ចេះប្រុងប្រយ័ត្ន ល្អិតល្អន់ ម៉ត់ចត់។
ការសិក្សាគឺជាសមត្ថភាពម្យ៉ាង ហើយក៏ជាការលេងហ្គេមមួយដែរ ក្រេបជញ្ជក់ចំណេះដឹងបានមួយជំនាញ យើងនឹងអាចទទួលបានកន្លែងឈរសមរម្យមួយក្នុងសង្គម។ ចំណេះជំនាញ មិនមានជំនាញណាខ្ពស់ ជំនាញណាទាបនោះទេ វាអាស្រ័យលើយើងចូលចិត្ត និងប្រើប្រាស់បាន។ ចំណេះដឹងមិនសំខាន់លើរៀនបានតិច រៀនបានច្រើន សំខាន់លើយើងចេះយកវាមកប្រើឲ្យត្រូវ។
ការធ្វើការ មិនមែនគ្រាន់តែដើម្បីរកលុយចិញ្ចឹមក្រពះ ប៉ុន្តែក៏ដើម្បីក្ដីសុខដែរ។ ធ្វើការងារអ្វីមិនសំខាន់ សំខាន់យើងចូលចិត្ត យើងធ្វើបាន លុយតិចច្រើនមិនសំខាន់ ឲ្យតែល្មមចាយ គឺគ្រប់គ្រាន់ហើយ។ សំខាន់បំផុតនោះគឺយើងបានបញ្ចេញសមត្ថភាពរបស់យើងពេញទំហឹងក្នុងការងារ ធ្វើអ្វីដែលធ្វើឲ្យយើងមានក្ដីសុខ កសាងស្នាដៃកេរ្តិ៍ឈ្មោះដោយភាពសុចរិត។
ស្នេហា មិនមែនជាការបានគ្រប់គ្រង ប៉ុន្តែគឺជាការផ្ដល់ឲ្យគ្នាទៅវិញទៅមក។ ការស្រវាតាមចាប់ស្នេហា គឺមិនឈ្នះការចាត់ការជាមួយខ្លួនឯងនោះឡើយ។ ចង់បានស្នេហាល្អមួយ យើងត្រូវដុសខាត់ខ្លួនឯងឲ្យបានល្អទាំងខាងក្នុង និងខាងក្រៅ នោះស្នេហានឹងមករកយើង។ មនុស្សចិត្តល្អ ស្មោះត្រង់គឺមនុស្សដែលគួរទុកចិត្តបំផុត មិនបាច់ស្វែងរកអ្នកល្អឥតខ្ចោះព្រោះគ្មានមនុស្សល្អដូចចិត្តយើងគ្រប់យ៉ាងនោះទេ។
ពិភពលោកនេះធំ ប៉ុន្តែក៏វិលជុំដែរ ចូរកូនចេះស្រលាញ់ខ្លួនឯង ចេះយល់ចិត្តអ្នកដទៃ ឲ្យតម្លៃធម្មជាតិ មានគំនិតវិជ្ជមាន ចេះសប្បាយរីករាយនឹងជីវិត។ ទ្រព្យសម្បត្តិ ឋានៈ គឺសុទ្ធតែជាគ្រឿងលម្អខ្លួន ប៉ុន្តែអ្វីដែលសំខាន់ពិតប្រាកដរបស់មនុស្សគឺចិត្ត ចូរធ្វើជាមនុស្សចិត្តទូលាយ មិនរករឿង ឆ្កឹះឆ្កៀល មិនប្រៀបធៀប នោះទុក្ខសោកទាំងឡាយនឹងរសាត់ចេញតាមខ្យល់ ៕
ចុចអានបន្ត៖
“មនុស្សស្រីកាឡកិណី" អត្ថបទសាងកម្លាំងចិត្ត ដែលគ្រប់គ្នាគួរអានដល់ចប់
បុរសបែបណាអាចផ្ដល់ក្ដីសុខឲ្យអ្នកមួយជីវិត? អត្ថបទល្អដែលមនុស្សស្រីគួរអាន និងស៊ែរ