៨ យ៉ាង បបូរមាត់អាចបញ្ជាក់ច្បាស់ពីសុខភាពរបស់អ្នក

2019-10-21 01:00:00
ចំនួនមតិ 0 | ចំនួនចែករំលែក 0

បបូរមាត់របស់មនុស្សយើង មានសរសៃប្រសាទរាប់លាន និងឆាប់មានប្រតិកម្មជាងចុងម្រាមដៃទៅទៀត។ បបូរមាត់តែងតែត្រូវការការថែរក្សាដោយយកចិត្តទុកដាក់។ វាក៏អាចបញ្ចេញសញ្ញាផ្សេងៗ នៅពេលដែលសុខភាពរបស់អ្នកមានបញ្ហា។ ហេតុនេះហើយ គួរចេះប្រុងប្រយ័ត្ន ប្រសិនបើឃើញបបូរមាត់បង្ហាញសញ្ញា ៨ យ៉ាងដូចខាងក្រោម។

១. ប្រេះនៅផ្នែកខាងគែមមាត់

នៅពេលទឹកមាត់បានជាប់នៅគែមបបូរមាត់ វាអាចបណ្តាលឲ្យស្បែកនៅបរិវេណនោះ មានសភាពស្ងួតនិងប្រេះ។ អ្នកអាចនឹងចង់លិឍមាត់ញឹកញាប់ ដើម្បីផ្តល់កម្តៅនិងសំណើមដល់មាត់ ប៉ុន្តែវាជាហេតុនាំឲ្យចម្លងមេរោគអាក្រក់ និងកាន់តែធ្វើឲ្យមាត់ប្រេះកាន់តែខ្លាំង។ បើអ្នកឧស្សាហ៍មានបញ្ហាបែបនេះកើតឡើង គួរទៅជួបពិគ្រោះជាមួយវេជ្ជបណ្ឌិតជំនាញ។

២. បបូរមាត់ស្ងួតនិងប្រេះជាចង្អូរ

នេះជាសញ្ញាបង្ហាញពីកង្វះជាតិទឹកនៅក្នុងរាងកាយរបស់អ្នក។ វាក៏អាចកើតឡើង ដោយសារការប្រែប្រួលអាកាសធាតុឬស្រ្តេស។ គួរផឹកទឹកឲ្យបានច្រើន និងលាបគ្រីមផ្តល់សំណើមដល់ស្បែកនិងបបូរមាត់ជាប្រចាំ។ បបូរមាត់ប្រេះជាចង្អូរអាចបណ្តាលមកពីអាលែកហ្សីផងដែរ។ មិនគួរប្រហែសដាច់ខាត ប្រសិនបើអ្នកមានអារម្មណ៍ថារមាស់។

៣. ពងបែកលើបបូរមាត់

ពេលមានពងបែកលើបបូរមាត់ អ្នកនឹងមានអារម្មណ៍ថាឈឺ និងគ្មានផាសុកភាព ប៉ុន្តែក្នុងករណីនេះ វាមិនអាចបង្កឲ្យមានគ្រោះថ្នាក់ចំពោះអ្នកទេ និងអាចលេចទៅវិញដោយខ្លួនឯង ដោយពុំចាំបាច់ប្រើវិធីព្យាបាល។ ការប្រតិកម្មជាមួយចំណីអាហារ ក៏បង្កឲ្យមានបញ្ហាបែបនេះបានដែរ។ ប្រសិនបើអ្នក មានពងបែកមាត់ញឹកញាប់ ឬយូរថ្ងៃ គួររកថ្នាំលេបព្យាបាលឲ្យបានត្រឹមត្រូវ។

៤. មានរង្វង់ពណ៌ក្រហមនៅជុំវិញបបូរមាត់

មូលហេតុចម្បងដែលនាំឲ្យមានរង្វង់ពណ៌ក្រហមនៅជុំវិញបបូរមាត់ គឺបណ្តាលមកពីបញ្ហារលាកស្បែក ដោយសារចូលចិត្តលិឍមាត់ខ្លាំងពេក។ លិឍចុះឡើងៗ ធ្វើឲ្យបាត់បង់ជាតិប្រេងធម្មជាតិដែលមាននៅលើស្បែក បង្កទៅជាក្រហមនិងឈឺចាប់។ អាចលាបគ្រីមផ្តល់សំណើម និងចោលទម្លាប់អាក្រក់ជាការស្រេច។

៥. មានស្នាមជ្រួញនៅផ្នែកបបូរមាត់ខាងលើ

បើអ្នកសង្កេតឃើញមានស្នាមជ្រួញជាច្រើននៅផ្នែកបបូរមាត់ខាងលើ អាចបណ្តាលមកពីសុខភាពផ្លូវកាយនិងផ្លូវចិត្ត។ គួរយកចិត្តទុកដាក់និងបោះបង់ចោលទម្លាប់អាក្រក់មួយចំនួនដូចជា ប្រើទុយោបឺតច្រើនពេក ជក់បារីខ្លាំងពេក និងដោយសារតែស្រ្តេសជាដើម។

៦. បបូរមាត់ស្លេកមិនសូវមានពណ៌

បបូរមាត់ដែលមានពណ៌បែបខៀវ អាចបញ្ជាក់ថាដំណើរការអុកស៊ីសែននៅក្នុងឈាម បានចុះខ្សោយ។ សញ្ញានេះក៏អាចបង្ហាញនៅលើម្រាមដៃនិងម្រាមជើងរបស់អ្នកផងដែរ។ ចំណែកឯ បបូរមាត់ពណ៌សឬស្លេកខ្លាំង អាចបង្ហាញថាអ្នកមានជំងឺស្លេកស្លាំង ដែលតម្រូវឲ្យមានការព្យាបាលដោយប្រើថ្នាំតាមក្បួនខ្នាតត្រឹមត្រូវ។ វាក៏ជាសញ្ញាមួយ ដែលបង្ហាញពីជាតិស្ករនៅខ្លួនមានកម្រិតទាប បញ្ហាដំណើរការនៃឈាម ឬខ្វះជីវជាតិសំខាន់ផ្សេងៗ។

៧. បបូរមាត់ហើម

ប្រសិនបើបបូរមាត់របស់អ្នកចាប់ផ្តើមហើមធំបន្តិចម្តងៗ វាជាសញ្ញាប្រតិកម្មជាមួយនឹងគ្រឿងសម្អាងដែលអ្នកបានប្រើប្រាស់។

៨. ស្នាមអុចខ្មៅនៅលើបបូរមាត់

វាអាចបណ្តាលមកពីមូលហេតុច្រើនយ៉ាង ដែលបង្កទៅជាស្នាមអុចខ្មៅនៅលើបបូរមាត់។ វិធីដ៏ល្អ គឺត្រូវព្យាបាលជាមួយនឹងគ្រូពេទ្យជំនាញ។

ស្នាមអុចខ្មៅឬពណ៌ត្នោតមិនមែនត្រឹមតែកើតមាននៅលើបបូរមាត់ប៉ុណ្ណោះទេ ថែមទាំងអាចកើតនៅលើថ្ពាល់ ច្រមុះនិងថ្ងាស។ ពេលខ្លះអាចដោយសារតែអ្នក ញ៉ាំអាហារដែលមានជាតិដែកច្រើនពេក។ គួរប្រុងប្រយ័ត្ន ប្រសិនបើអ្នកមានអារម្មណ៍មិនស្រួល នៅត្រង់ស្នាមអុចទាំងនោះ ព្រោះវាក៏អាចជាសញ្ញាមួយនៃជំងឺមហារីកដំណាក់កាលដំបូងផងដែរ៕

ចុចអានបន្ត៖ ឧស្សាហ៍តានតឹងអារម្មណ៍និងស្រ្តេសច្រើន គួរដឹងពីវិធីងាយៗ ដើម្បីលុបបំបាត់ឲ្យទាន់ពេលវេលា

ប្រភព៖ Brightside ប្រែសម្រួល៖ ដេត ឈុនអ៉ី