៩ យ៉ាង មនុស្សឆ្លាតតែងធ្វើរាលថ្ងៃ ភ្លេចមិនបានទេ
- 2019-09-03 09:00:00
- ចំនួនមតិ 0 | ចំនួនចែករំលែក 0
៩ យ៉ាង មនុស្សឆ្លាតតែងធ្វើរាលថ្ងៃ ភ្លេចមិនបានទេ
មនុស្សមួយភាគធំ បាននិយាយថា អ្នកដែលកើតមកមានភាពវៃឆ្លាត គឺជាសំណាងមិនអាចកាត់ថ្លៃបាន។ ក្នុងន័យនេះមិនមែនមានន័យថា អ្នកមិនឆ្លាតគឺមានសំណាងអាក្រក់នោះទេ ព្រោះភាពវៃឆ្លាតអាចបានមកពីកំណើតនិងការប្រឹងប្រែងអនុវត្តជាប្រចាំ។ តាមការអះអាងរបស់អ្នកជំនាញបានបញ្ជាក់ទៀតថា មជ្ឈដ្ឋានជុំវិញខ្លួនក៏ជាកត្តាជួយអភិវឌ្ឍខួរក្បាលនិងការគិតរបស់អ្នកដែរ។
យ៉ាងណាក៏ដោយ មនុស្សឆ្លាតតែងបញ្ចេញនូវសកម្មភាពប្រចាំថ្ងៃស្រដៀងៗគ្នា និងមានចំណង់ចំណូលចិត្តដូចគ្នាច្រើន។
១. ខ្វល់ខ្វាយពីរឿងផ្ទាល់ខ្លួនច្រើនជាងចេះដឹងរឿងអ្នកដទៃ
ការវែកញែកនិងការនិយាយដើមគេឥតប្រយោជន៍ ជាអ្វីដែលមនុស្សឆ្លាតគ្មានចំណាប់អារម្មណ៍ ព្រោះគេមិនចង់ឈឺឆ្អាល ខ្ជះខ្ជាយពេលទៅរវល់ជាមួយនឹងជីវិតអ្នកដទៃ។ ជាពិសេស មនុស្សឆ្លាតចូលចិត្តនៅម្នាក់ឯងច្រើនជាង ព្រោះគេអាចធ្វើកិច្ចការផ្ទាល់ខ្លួន ដោយគ្មានការរំខាន។ ពួកគេមិនមែនជាមនុស្សឯកោទេ គ្រាន់តែត្រូវការពេលវេលាដើម្បីឱ្យខួរក្បាលបានសម្រាកលំហែនិងបំពេញមុខងារខ្លះ។
២. ចេះកំប្លុកកំប្លែង និងមានទំនាក់ទំនងល្អជាមនុស្សជុំវិញខ្លួន
គេជាមនុស្សម្នាក់ ដែលអាចរកនឹកឃើញរឿងកំប្លែងគួរឱ្យអស់សំណើច ព្រមទាំងធ្វើឲ្យអ្នកនៅជិតខ្លួនសើចគ្រប់ពេល។ អ្នកវិទ្យាសាស្ត្របានបញ្ជាក់ថា មនុស្សឆ្លាតមានគំនិតច្នៃប្រឌិតថ្មីប្លែកៗច្រើន ដែលនាំឱ្យការងារទៅមុខដោយរលូននិងទំនាក់ទំនងល្អជាមនុស្សគ្រប់មជ្ឈដ្ឋាន។
អាចលើកជាឧទាហរណ៍ជាក់ស្តែងដូចជាលោក Conan O’Brien ដែលជាតារាកំប្លែងជនជាតិអាមេរិកដ៏ល្បី គឺមានកម្រិត IQ ដល់ទៅ១៦០ ស្របពេលដែលមនុស្សទូទៅមានចន្លោះពី ៨៥-១១៥ តែប៉ុណ្ណោះ។
៣. និយាយសន្ទនាជាមួយខ្លួនឯង
តើអ្នកដឹងទេថា សូម្បីតែលោក Albert Einstein ដែលជាមនុស្សមានទេពកោសល្យលើលោក ក៏ចូលចិត្តនិយាយជាមួយខ្លួនឯងដែរ? អ្នកដែលតែងតែសន្ទនាជាមួយខ្លួនឯងញឹកញាប់ មិនថានិយាយឭចេញមកក្រៅឬនិយាយនៅក្នុងចិត្តឡើយ វាជាសញ្ញានៃភាពវៃឆ្លាត ដែលមនុស្សធម្មតាគ្មាន។
ការនិយាយទៅកាន់ខ្លួនឯង អាចជួយសំលៀងខួរក្បាល បង្កើតការចងចាំ និងចេះគិតពិចារណាកាន់តែល្អប្រសើរ។ អ្នកដទៃមើលមកអាចគិតថាអ្នកកើតរោគចិត្ត តាមការពិតនេះគេហៅថាឆ្លាតទៅវិញទេ។
៤. ចូលចិត្តស្តាប់ចម្រៀងខ្លាំង
នរណាក៏ចូលចិត្តតន្រ្តីដែរ ប៉ុន្តែមនុស្សដែលឆ្លាតលើសគេ តែងតែប្រទះឃើញមានកាសនៅជាប់ត្រចៀកជានិច្ច។ អ្នកដែលមានសមត្ថភាព អាចលេងឧបករណ៍តន្រ្តីបាន គឺពិតជាមនុស្សឆ្លាត ប៉ុន្តែអ្នកដែលឆ្លាតលើសពីនេះទៅទៀតគឺអ្នកដែលស្តាប់តន្រ្តីជាប់រហូត។ ជាពិសេសអ្នកចូលចិត្តប្រភេទចម្រៀងដែលមានចង្វាក់ញាប់ឬបុកកន្ត្រាក់ ដោយមិនសូវខ្វល់ពីការលើកដាក់សំឡេងនិងអត្ថន័យ។
៥. ធ្វើការដោយប្រាជ្ញាមិនមែនរំពឹងតែលើកម្លាំង
មិនមែនរាល់មនុស្សឆ្លាតសុទ្ធតែឧស្សាហ៍ទាំងអស់នោះទេ ព្រោះពេលខ្លះគេក៏ខ្ជិលណាស់ដែរ។ ហេតុនេះហើយទើបបានជាគេ ព្យាយាមរកវិធីងាយស្រួលសម្រាប់ខ្លួនឯង ធ្វើការដោយប្រើប្រាជ្ញា មិនមែនប្រើកម្លាំងអស់ពីខ្លួន។
មួយវិញទៀត អ្នកដែលមិនសូវសកម្មខ្លាំង ក៏ជាប្រភេទមនុស្សឆ្លាត ជាងអ្នកដែលមើលទៅមមាញឹកឥតល្ហែ។ ដោយសារមនុស្សឆ្លាត ប្រើខួរក្បាលនិងការគិតច្រើន ដូច្នេះរាងកាយតែងឆាប់អស់កម្លាំងល្វើយជាងមនុស្សទូទៅ។
៦. តែងឆ្ងល់និងចូលចិត្តសួរ
មនុស្សឆ្លាតតែងចេះឆ្ងល់ចង់ដឹង និងចង់ស្វែងរកចម្លើយដោយការសួរអ្នកដទៃនិងស្រាវជ្រាវដោយខ្លួនឯង។ ពួកគេចូលចិត្តអាន និងកត់ត្រាទុក ដើម្បីបង្កើនចំណេះដឹងរាល់ថ្ងៃ។
៧. ទទួលស្គាល់កំហុស
មនុស្សឆ្លាតចេះទទួលស្គាល់កំហុសដែលខ្លួនបានធ្វើ និងរៀនសូត្រដើម្បីកែតម្រូវ។ ឆ្លាតយ៉ាងណា ក៏មិនអាចល្អឥតខ្ចោះដែរ ដូច្នេះហើយបើគិតថាខ្លួនឯង ត្រូវរហូត អ្នកគឺជាមនុស្សល្ងង់ទៅវិញទេ។
៨. ចូលចិត្តញ៉ាំសូកូឡា
អ្នកចូលចិត្តញ៉ាំសូកូឡា ដល់ពេលត្រូវត្រេកអរហើយ ព្រោះសូកូឡាមានតួនាទីធ្វើឱ្យខួរក្បាលដំណើរការបានល្អ កាន់តែវៃឆ្លាត។ មនុស្សដែលចូលចិត្តញ៉ាំសូកូឡាញឹកញាប់ មានការចងចាំនិងអាចគិតគូរបានល្អប្រសើរ និយាយស្តីមានហេតុផល។
៩. មិនសូវចូលចិត្តនិយាយសាំញ៉ាំច្រើន
គេមិនមែនអន់ផ្នែកនិយាយស្តីទេ គ្រាន់តែមិនចូលចិត្តនិយាយអ្វីដែលឥតប្រយោជន៍ច្រើន។ មនុស្សឆ្លាត គេនិយាយតិចតែមានខ្លឹមសារយកជាការបាន មិនមែនសាំញ៉ាំដដែលៗ ស្តាប់មិនចូលត្រចៀកនោះទេ។
សាកសង្កេតមើលខ្លួនឯងលេងៗ មានប៉ុន្មានចំណុចដែរ?
ចុចអានបន្ត៖ ចង់ឲ្យគេស្រឡាញ់ចូលចិត្តច្រើន មនុស្សស្រីគួរយកចិត្តទុកដាក់លើរឿងនេះឲ្យមែនទែន