គុណសម្បត្តិនិងគុណវិបត្តិ ពេលលង់ស្នេហ៍បុរសដែលធ្លាប់លែងលះគ្នាពីមុនមក
- 2019-08-06 07:20:00
- ចំនួនមតិ 0 | ចំនួនចែករំលែក 0
គុណសម្បត្តិនិងគុណវិបត្តិ ពេលលង់ស្នេហ៍បុរសដែលធ្លាប់លែងលះគ្នាពីមុនមក
ទោះបីជាមនុស្សដែលធ្លាប់លែងលះគ្នាដាច់ស្រេចហើយ អាចចាត់ទុកដូចជាអ្នកនៅលីវក៏ដោយ នៅតែមានគុណសម្បត្តិនិងគុណវិបត្តិផ្សេងៗ ដែលអ្នកនឹងប្រឈម ពេលគាត់ចង់ចាប់ផ្ដើមម្ដងទៀត។ យ៉ាងណាក្តី មនុស្សទាំងអស់មិនមែនសុទ្ធតែដូចគ្នានោះទេ វាអាស្រ័យលើស្ថានការណ៍ដែរ ដូចជាអ្នកខ្លះទើបតែលែងលះ ខ្លះលែងគ្នាយូរហើយ ឯអ្នកខ្លះទៀតមានកូននៅជាប់ពាក់ព័ន្ធក៏មាន។
ខាងក្រោមនេះ គឺជាគុណសម្បត្តិនិងគុណវិបត្តិ ដែលអ្នកគួរដឹង ពេលលង់ស្នេហ៍បុរសដែលធ្លាប់លែងលះគ្នាពីមុនមក៖
គុណសម្បត្តិ
១. ពេលវេលា៖ ការលែងលះអាចបណ្ដាលមកពីធ្លាប់សម្រេចលឿនពេកពេលស្រលាញ់គ្នា ដោយមិនបានពិចារណាវែងឆ្ងាយ ដូច្នេះហើយគាត់នឹងចេះប្រើពេលវេលាគិតគូរឲ្យបានល្អិតល្អន់ត្រឹមត្រូវ មុនជឿជាក់ថាអ្វីៗអាចទៅរួចដូចការគិត ដើម្បីជៀសវាងកុំឲ្យមានកំហុសដូចមុន។
២. ការតាំងចិត្ត៖ មនុស្សដែលធ្លាប់ឆ្លងកាត់ការលែងលះ អាចដឹងច្បាស់ជាងមុន ថានឹងមានបញ្ហាអ្វីកើតឡើង។ ថ្វីត្បិតតែត្រូវប្រើពេលយូរបន្តិច ប៉ុន្តែបើគាត់តាំងចិត្តថាស្រលាញ់អ្នកហើយ លើកនេះគាត់នឹងព្យាយាមថែរក្សាឲ្យជាប់លាប់។
៣. បទពិសោធន៍៖ មនុស្សដែលធ្លាប់ឈឺចាប់ពីអតីតកាល ធ្វើឲ្យគាត់មានអារម្មណ៍វិលវល់ ខ្លាចបាត់បង់ម្តងទៀត។ បទពិសោធន៍បានបង្រៀនគាត់ឲ្យស្គាល់ពីខ្លួនឯងកាន់តែច្បាស់ ដឹងថាអ្វីសំខាន់ និងមានតម្លៃ នៅពេលផ្តើមស្នេហ៍ជាថ្មី។
៤. បើកចិត្តទូលាយ៖ កាលពីមុនគាត់អាចជាមនុស្សពិបាកនិយាយគ្នា ប៉ុន្តែក្រោយពីជួបរឿងរ៉ាវជាច្រើនរួចមក គាត់នឹងព្យាយាមបើកចិត្តទូលាយ សម្របខ្លួន រៀនបត់បែន និងយល់ពីអារម្មណ៍អ្នកដទៃបានល្អប្រសើរ។
៥. ការប្រាស្រ័យទាក់ទង៖ ទំនាក់ទំនងល្អ អាចជួយធ្វើឲ្យគូស្នេហ៍នៅជាមួយគ្នាឋិតថេរបានយូរអង្វែង។ អ្នកដែលធ្លាប់រៀបការ និងរស់នៅជាមួយដៃគូផ្សេងទៀត អាចនឹងមានការវិវត្តផ្នែកប្រាស្រ័យទាក់ទង ដែលពុំធ្លាប់ដឹងសោះ។
គុណវិបត្តិ
១. ធ្លាប់ជួបមេរៀនឈឺចាប់កន្លងមក៖ មូលហេតុនេះហើយ ទើបបានជាគាត់ពុំសូវមានភាពត្រេកត្រអាលរំភើបក្នុងការរៀបការសារជាថ្មី។ គួរពិចារណាឲ្យបានច្បាស់លាស់បន្តិចសិន ថាអាចទោរួចដែរទេ មុនសម្រេចចិត្តថាផ្ញើជីវិតលើគាត។
២. ប៉ះពាល់ផ្លូវអារម្មណ៍៖ ការបែកបាក់ដោយមិនប្រើសន្តិវិធី អាចបន្សល់ទុកនូវកំហឹង ភាពល្វីងជូរចត់ រួមទាំងក្តីឈឺចាប់ផ្សេងៗ។ វាត្រូវការពេលវេលា ដើម្បីព្យាបាលរបួស និងតទល់ជាមួយបញ្ហា។ បើអ្នកប្រញាប់ឈានចូលទៅលឿនពេក អ្នកក៏ងាយនឹងប្រឈមហានិភ័យដូចគ្នា។
៣. ទំនុកចិត្ត៖ ជារឿងធម្មតាទេ សម្រាប់អ្នកដែលជួបរឿងឈឺចាប់ ការទុកចិត្តនរណាម្នាក់ ក៏ថយចុះទៅតាមហ្នឹងដែរ។ អ្នកត្រូវតែមានភាពអត់ធ្មត់ មុននឹងគាត់អាចជឿជាក់ទាំងស្រុងបាន។
៤. មានបញ្ហាជាប់ពាក់ព័ន្ធ៖ ក្នុងនោះរួមមាន បញ្ហាបែងចែកផ្ទះសម្បែងឬដីធ្លី នៅមិនទាន់ដោះស្រាយដាច់ស្រឡះជាដើម។
៥. បញ្ហាគ្រួសារ៖ បើគាត់មានកូន អ្នកត្រូវតែទទួលយក ដោយមិនប្រកាន់ពីអាយុ ឬត្រូវរស់នៅជាមួយគ្នាក៏ដោយ។ នេះហើយជាបញ្ហា ដែលអាចធ្វើឲ្យអ្នកពិបាក ប្រសិនបើថ្ងៃណាមួយ ត្រូវរស់នៅជុំគ្នាពិតមែន។
កុំបារម្ភខ្លាំងពេក ស្ថានភាពរបស់មនុស្សម្នាក់ៗមិនដូចគ្នាទាំងស្រុងឡើយ ប៉ុន្តែអ្នកត្រូវច្បាស់ខ្លួនឯងថា តើទំនាក់ទំនងបែបនេះជាអ្វីដែលខ្លួនត្រូវការពិតប្រាកដនិងអាចទទួលយកបានដែរទេ? អ្នកមិនអាចវាយតម្លៃមនុស្ស ដោយផ្អែកលើប្រវត្តិលែងលះតែមួយមុខឡើយ សំខាន់ត្រូវចេះសង្កេតដោយខ្លួនឯង៕
ចុចអានបន្ត៖ ស្រីៗឲ្យតែមាន៤យ៉ាងនេះ ទោះមិនស្អាតខ្លាំងក៏ប្រុសតំរៀបជួរគ្នាសុំស្រលាញ់ដែរ