ដើរលេងគ្រាន់តែចង់ផ្តល់វីតាមីនឲ្យខ្លួនឯងមានកម្លាំងជាងមុន មិនមែនចង់បង្អួតអ្នកណាឡើយ

2019-07-17 03:10:00
ចំនួនមតិ 0 | ចំនួនចែករំលែក 0

ពីច័ន្ទដល់សុក្រ មនុស្សគ្រប់គ្នារវល់ការងារនិងការសិក្សា ព្រលឹមមិនទាន់ក៏រូតរះចេញពីផ្ទះជិះម៉ូតូឡាន ទាំងស្ទះចរាចរណ៍។ ដោយសារតែហត់នឿយនឹងសម្ពាធជីវិត ពេលខ្លះគ្រាន់តែចង់ឲ្យកាដូខ្លួនឯង ទៅដើរលេងទីណាស្អាតៗឲ្យស្រាលខួរក្បាលម្ដង។

រូបតំណាង

តែសម័យនេះ ពេលឃើញយើងឧស្សាហ៍ដើរលេង បង្ហោះរូបលើបណ្ដាញសង្គម គេបែរជាគិតថាយើងមិនគិតសន្សំលុយទេ គិតតែដើរលេងសប្បាយហ៊ឺហារ។ ខ្លះទៀតថា ដើរលេងរហូតចាំមើលតែពេលឈឺ អត់លុយមើលខ្លួនបានដឹងប្រឹង។ តែដោយសារមិនចង់ធុញថប់ មិនចង់ស្រេ្តសខ្លាចឈឺហ្នឹងហើយ ទើបខំឆ្លៀតពេលដើរលេងខ្លះ ឲ្យធូរក្នុងចិត្ត ព្រោះមិនចង់យកលុយរកបានពីការងារទាំងយប់ទាំងថ្ងៃទៅឲ្យពេទ្យ។

រូបតំណាង

តាមពិតខ្ញុំមិនមែនជាអ្នកមានសល់ទ្រព្យច្រើនអីនោះទេ តែខ្ញុំគ្រាន់តែចង់ឲ្យជីវិតមុនស្លាប់ទៅយ៉ាងហោចណាស់បានស្គាល់តំបន់ទេសចរណ៍ល្បីៗនិងស្អាតនៅស្រុកយើងខ្លះប៉ុណ្ណោះ។ ពេលទៅដល់កន្លែងមានទេសភាពស្អាតៗ គ្រាន់តែចង់ថតរូបហើយផុសក្នុង Account ផ្ទាល់ខ្លួនប៉ុណ្ណោះ មិនបានតាំងចិត្តចង់បង្អួតឬទាក់ទាញចំណាប់អារម្មណ៍អ្នកណាឡើយ។

ម្យ៉ាងទៀតពេលដើរលេង ខ្ញុំដឹងពីរបៀបចាយវាយ ធ្វើយ៉ាងណាកុំឲ្យចំណាយច្រើនពេក។ បើទៅជាមួយមិត្តភក្កិគឺចែកគ្នាចេញថ្លៃបន្ទប់គេង អាហារ និងឡានជិះ ហើយបើទៅគ្នាកាន់តែច្រើន កាន់តែអស់លុយតិច។ ពេលខ្លះទៅដើរលេងជាមួយអ្នកផ្ទះ កាន់តែចាយអស់តិចតួចថែមទៀត ព្រោះខ្ចប់បាយម្ហូបពីផ្ទះទុកញ៉ាំតាមផ្លូវអីជាដើម។

រូបតំណាង

ចូលចិត្តដើរលេងមិនមែនសុទ្ធតែជាមនុស្សចាយវាយមិនចេះគិតនោះទេ គ្រាន់តែចង់ឲ្យជីវិតមានពេលសប្បាយ មានពេលកម្សាន្តនឹងធម្មជាតិខ្លះ ។ ព្រោះរស់នៅតែក្នុងទីក្រុង មួយថ្ងៃៗហិតតែផ្សែងពុល ប្រជ្រៀតគ្នាជិះឡើងស្ទះពេញផ្លូវ អាប់អួរខ្លាំងណាស់៕

ចុចអាន៖ ទៅស្រុកគេតិចច្រឡំធ្វើរឿងទាំងនេះ ដឹងតែខ្មាសគេខ្លាំង

អត្ថបទ៖ លឹម សុនា