អាថ៌កំបាំងជួយឲ្យអ្នកស្គាល់ពីខ្លួនឯងច្បាស់ដូចថ្ងៃ
- 2019-04-09 06:04:16
- ចំនួនមតិ 0 | ចំនួនចែករំលែក 0
អាថ៌កំបាំងជួយឲ្យអ្នកស្គាល់ពីខ្លួនឯងច្បាស់ដូចថ្ងៃ
កាលណា អ្នកដឹងថាខ្លួនឯងជានរណា ចង់ធ្វើអ្វី ត្រូវការអ្វីពិតប្រាកដ អ្នកច្បាស់ជាអាចជ្រើសរើសផ្លូវដើរដោយខ្លួនឯង ដោយមិនយកគំនិតយោបល់របស់អ្នកដទៃជាធំ ហើយអ្នកក៏មិនខ្ជះខ្ជាយពេលវេលាធ្វើរឿងដែលផ្ទុយពីឧត្តមគតិរបស់់ខ្លួនដែរ។ អ្នករីករាយក្នុងការធ្វើកិច្ចការផ្សេងៗដែលអាចនាំទៅរកភាពជោគជ័យធំនាពេលអនាគត។
១. រាយឈ្មោះការងារដែលអ្នកចូលចិត្តក្នុងបញ្ជី
ដំបូងគ្រាន់តែយកក្រដាសសស្អាតមួយ បន្ទាប់មកត្រូវរាយឈ្មោះការងារណាដែលអ្នកចូលចិត្តឲ្យបាន១០មុខ។ ក្នុងចំណោមការងារទាំង១០ អ្នកមានសិទ្ធិជ្រើសរើសតែមួយគត់ដែលគិតថាចង់ធ្វើវាបំផុត នោះអ្នកនឹងដឹងច្បាស់ថា ការងារណាដែលអ្នកស្រលាញ់ជាងគេ។
២. តើអ្នកចូលចិត្តធ្វើអ្វីពេលទំនេរ?
មនុស្សគ្រប់គ្នា តែងមានចំណង់ចំណូលចិត្តធ្វើរឿងខុសៗគ្នានៅពេលទំនេរដូចជា ស្តាប់ចម្រៀងលេងតន្ត្រី តែងនិពន្ធ ដាំផ្កា ធ្វើម្ហូប...។ សកម្មភាពទាំងនេះហើយ ដែលអាចជួយឲ្យអ្នកស្វែងយល់ពីខ្លួនឯងខ្លាំងបំផុត។ ដោយតែអ្នកអាចជ្រើសរើសជំនាញឬការងារណា ដែលត្រូវនឹងចំណង់ចំណូលចិត្ត មិនមែនជាការធ្វើដោយបង្ខំ។
៣. ធ្លាប់ស្រមៃចង់ធ្វើអ្វីមួយ
កាលនៅពីក្មេង អ្នកស្រមៃពេលធំឡើងចង់ក្លាយជាវេជ្ជបណ្ឌិត គ្រូបង្រៀន ឬវិស្វករជាដើម ប៉ុន្តែពេលធំឡើង ក្តីសុបិនទាំងនោះបានប្រែប្រួល។ ប្រហែលមានកត្តាច្រើនយ៉ាងទើបបណ្តាលឲ្យការងារក្នុងក្តីសុបិនផ្លាស់ប្តូរ ដូចជាអ្នកមានគំនិតចាស់ទុំជាងមុន មានក្តីសុបិនថ្មី ប៉ុន្តែយ៉ាងហោចណាស់ អ្នកគួរសាកល្បងដើម្បីឲ្យបំណងប្រាថ្នាក្លាយជាការពិត។
៤. ជ្រើសរើសអ្វីដែលសមនឹងអ្នក
គ្រប់គ្នាមានទេពកោសល្យពីកំណើតរៀងៗខ្លួន ដូច្នេះហើយអ្នកអាចកែច្នៃវាឲ្យទៅជាប្រយោជន៍បាន។ ឧទាហរណ៍ថា អ្នកពូកកែខាងធ្វើម្ហូបឆ្ងាញ់ប្លែកៗ ដូច្នេះអ្នកអាចរកចំណូលបាន ដោយចាប់ផ្តើមធ្វើវាលក់ និងអាចពង្រីកពីតូចរហូតដល់ធំដុំ។
៥. ចាត់ទុកការងារជាភាពរីករាយមួយនៃជីវិត
កុំមើលការងារក្នុងផ្លូវអាប់អួ ឬចាត់ទុកវាត្រឹមជាទំនួលខុសត្រូវ។ ប្រសិនបើអ្នក កំពុងធ្វើការងារដែលប្រើគំនិតនិងចំណេះដឹងផ្ទាល់ខ្លួន គួរចាត់ទុកវា ជាលទ្ធផលគួរឲ្យស្ញប់ស្ញែងនិងភាពរីករាយមួយក្នុងជីវិត ព្រោះមិនមែនមនុស្សទាំងអស់សុទ្ធតែមានសមត្ថភាពដូចអ្នកឡើយ។
៦. មានទំនួលខុសត្រូវខ្ពស់លើការងារ
ពេលអ្នកអាចស្វែងរកការងារដែលស័ក្តិសមហើយ អ្នកមានទំនួលខុសត្រូវគ្រប់បែបយ៉ាង ដោយមិនខ្លាចក្នុងការជួបបញ្ហាតូចធំ ថែមទាំងក្លាហានរឹងមាំ ក្នុងការរកដំណោះស្រាយផងដែរ។
៧. ស្តាប់នូវមតិរិះគន់របស់អ្នកដទៃ
នរណាក៏មានគុណសម្បត្តិនិងគុណវិបត្តិដែរ ម្ល៉ោះហើយបើមានគេនិយាយរិះគន់ក្នុងន័យស្ថាបនា អ្នកគួរទទួលយក ដើម្បីអភិវឌ្ឍកែលម្អខ្លួនឲ្យបានប្រសើរជាងនេះ៕
ចុចអានបន្ត៖
ដើម្បីក្លាយខ្លួនជាមេដឹកនាំល្អម្នាក់នៅកន្លែងធ្វើការ ៥យ៉ាងនេះមនុស្សស្រីត្រូវមាន
មួយជីវិតគួរតែចំណាយពេលទៅលើរឿងសំខាន់ ៥យ៉ាងនេះទើបជីវិតមានន័យ