មង្គលបានសុខ លុះត្រាទាំងប្ដីប្រពន្ធស្កប់ស្កល់នឹងអ្វីដែលខ្លួនកំពុងមាន

2019-04-02 02:35:13
ចំនួនមតិ 0 | ចំនួនចែករំលែក 0

ខ្លួនជាប្ដី កុំស្រលាញ់គេតែពេលគេនៅក្មេង សូមស្រលាញ់ ទាំងនៅពេលគេមានស្នាមជ្រួញលើមុខផង។ ព្រោះបើស្រលាញ់តែពេលគេស្អាត គ្រួសារនឹងឆាប់បែកបាក់។ សូមស្កប់ស្កល់នឹងបាយមួយពេលជុំគ្នាពេលល្ងាច ព្រោះមានតែបែបនេះទើបរក្សាសុភមង្គលបាន។

មង្គលការជាច្រើនបែកបាក់គ្នា ប្ដីប្រពន្ធនាំគ្នាទៅតុលាការលែងលះគ្នា មិនមែនដោយសារផិតក្បត់ឡើយ គឺដោយសារភាគីសងខាងមិនរកឃើញសុភមង្គល។ នៅពេលកាន់ដៃគ្នាដំបូង សុទ្ធតែស្បថស្បែថានឹងស្រលាញ់គ្នាដល់ចាស់ តែនៅជីវិតជាក់ស្ដែង ពេលមានតែភាពអស់សង្ឃឹម ភាពធុញទ្រាន់ និងឯកាក្នុងមង្គលការរបស់ខ្លួនឯងនោះ ក៏ដើរដល់ផ្លូវបែកគ្នាតែម្ដង។

ក្រោយរួមរស់ជាមួយគ្នាយូរឆ្នាំ ទាំងប្ដី ទាំងប្រពន្ធ សុទ្ធតែទទួលឃើញថា ដៃគូជីវិតរបស់ខ្លួនខុសពីមុនឆ្ងាយណាស់។ នៅពេលឈានដល់ផ្លូវបំបែកហើយ ក្នុងភ្នែកភាគីទាំងសងខាង អ្នកណាក៏លែងដូចមុនទាំងអស់។ ប្ដីលែងខ្វាយខ្វល់ និងស្រលាញ់ប្រពន្ធដូចមុន។ រីឯសម្រាប់ប្ដីវិញ ប្រពន្ធរបស់ខ្លួន គឺពោរពេញទៅដោយកំហុស ហើយមានតែការរអ៊ូ គួរឲ្យធុញ។

រស់ជាមួយគ្នាយូរ ភាពអំនួតរៀងខ្លួន កាន់តែកើនឡើង។ គេមើលឃើញតែការទើសភ្នែករបស់ខ្លួនឯង ដោយមិនបានមើលឃើញទុក្ខបាក របស់មនុស្សម្នាក់ទៀតឡើយ។ មនុស្សស្រីតែងប្រៀបធៀបថា ម៉េចក៏ប្ដីគេរកលុយបានច្រើន តែនៅតែមានពេលសម្រាប់គ្រួសារ ឯប្ដីខ្លួនរកព្រឹកខ្វះល្ងាច នៅតែគ្មានពេលសម្រាប់គ្រួសារ។ ឯខាងមនុស្សប្រុសវិញ ក្រោយច្រើនឆ្នាំ នៅតែរំពឹងឲ្យប្រពន្ធនៅស្អាតដូចក្រមុំ ចេះយកចិត្តប្ដី ធ្វើម្ហូបឆ្ងាញ់។ ជាមួយនឹងគំនិតទាំងនេះ មិនយូរមិនឆាប់ ក៏គង់តែបែកគ្នាទេ។

យើងត្រូវចាំថា គ្មានអ្វីដែលពេលវេលាមិនអាចបំផ្លាញបានឡើយ។ យើងត្រូវចេះស្កប់ស្កល់នឹងអ្វីដែលកំពុងមាន ព្រោះបើនៅស្រមៃបានអ្វីដែលល្អបំផុត ហើយទទួលមិនបាន នឹងធ្វើឲ្យខកចិត្ត នាំឲ្យធុញទ្រាន់ដៃគូជីវិត។

ខាងប្រុសសូមគិតពីរាល់ការពលីដែលប្រពន្ធបានធ្វើដើម្បីរក្សាគ្រួសារមួយនេះ។ សូមឲ្យតម្លៃបាយល្ងាចមួយពេលដែលនាងប្រឹងធ្វើ ទាំងខ្លួនមានការរាប់រយជំពូក។ ឯខាងស្រី សូមគិតដល់អម្រែកដែលប្ដីត្រូវរែកជារៀងរាល់ថ្ងៃផង ទម្រាំបានប្រគល់លុយឲ្យខ្លួន រៀបចំទុកដាក់ផ្ទះសំបែងនេះ៕

ចុចអាន៖ឪពុកមហាសេដ្ឋីផ្ដាំកូនក្នុងថ្ងៃរៀបការ៖ ចង់ជោគជ័យ កូនកុំចាត់ទុកប្រពន្ធដូចជាមិត្តភ័ក្ដិ

ប្រភព៖ Guu ប្រែសម្រួល៖ Caramel