មិនចង់ខ្មាសគេធំនៅព្រលាន គួរដឹងរឿងតិចតួចពេលជិះយន្តហោះលើកដំបូង
- 2019-01-24 06:00:00
- ចំនួនមតិ 0 | ចំនួនចែករំលែក 0
មិនចង់ខ្មាសគេធំនៅព្រលាន គួរដឹងរឿងតិចតួចពេលជិះយន្តហោះលើកដំបូង
ពេលធ្វើដំណើរទៅណាមកណាតាមជើងយន្តហោះ អ្នកចាំបាច់ត្រូវត្រៀមខ្លួនច្រើនយ៉ាង តាំងពីការកក់សំបុត្រ រៀបចំវ៉ាលី និងរឿងជាច្រើនទៀតដែលត្រូវធ្វើនៅប្រលាន។ ហេតុនេះហើយ បើអ្នកបារម្ភមិនដឹងគួរប្រុងប្រយ័ត្នបែបណាខ្លះ ដើម្បីការពារមិនឲ្យខ្មាសគេ បាក់មុខមុនឡើងយន្តហោះ គួរដឹងចំណុចខាងក្រោមនេះសិន។
១. មិនយឺតយ៉ាវ
ការគ្រប់ពេលវេលាពិតជាសំខាន់ខ្លាំងណាស់ បើហ៊ានយឺតតែបន្តិច អ្នកនឹងខកជើងយន្តហោះមិនខាន ព្រោះពេលទៅដល់ព្រលានភ្លាម មិនមែនបានចូលភ្លែតឯណា ត្រូវតម្រង់ជួររង់ចាំផង ឆែកឆេរផង ដូច្នេះកុំធ្វើអ្វីតក់ក្រហល់ឲ្យសោះ បើអាចមកដល់មុន ២-៣ ម៉ោងកាន់តែល្អ។
២. មានការអត់ធ្មត់ពេលតម្រង់ជួរ
មិនត្រូវគិតថាអ្វីៗងាយស្រួលដូចការរំពឹងទុកនោះទេ។ ពេលខ្លះមានមនុស្សណែនតាន់តាប់ ឬមានបញ្ហាអ្វីមួយដែលតម្រូវឲ្យអ្នកឈរតម្រង់ជួរយូរ ដូច្នេះមិនត្រូវមួម៉ៅក្តៅចិត្ត មកក្រោយចង់បានមុនដាច់ខាត។ អ្នកចង់ប្រញាប់លឿន អ្នកផ្សេងក៏ចង់ប្រញាប់ដូចគ្នា គ្រាន់តែគេចេះអត់ធ្មត់ និងមានភាពស៊ាំក្នុងការរង់ចាំនៅប្រលាន។
៣. មិនបាញ់ទឹកអប់ច្រើនពេក
ត្រូវហើយពេលដើរឬអង្គុយជិតអ្នកដទៃ អ្នកតែងភ័យខ្លាចមានក្លិនមិនល្អ អាចធ្វើឲ្យគេមានអារម្មណ៍មិនល្អចំពោះអ្នក។ យ៉ាងណាមិញ ក៏មិនគួរបាញ់ទឹកអប់ច្រើនពេកដែរ ព្រោះវាអាចនឹងឈួលខ្លាំង និងបំពុលបរិយាកាសដល់អ្នកដែលមិនចូលចិត្តក្លិនបែបនេះ។ យល់ល្អគួរបាញ់ល្មមៗ ឬប្រើឡេលាបក្លៀកតែមួយមុខក៏គ្រប់គ្រាន់ដែរ។
៤. មិនត្រូវលេបថ្នាំងងុយគេង
ធ្វើដំណើរផ្លូវឆ្ងាយពិបាកគេង មានតែលេបថ្នាំទើបអាចជួយបាន ប៉ុន្តែអ្នកដឹងទេថា លេបថ្នាំងងុយគេង ពេលជិះយន្តហោះ អាចធ្វើឲ្យអ្នកប្រឈមនឹងហានិភ័យ ដូចជាកកឈាមនៅជើងរហូតដល់ស្លាប់បាន។
៥. មិនផឹកគ្រឿងស្រវឹងច្រើនពេក
ពេលនៅលើយន្តហោះ អ្នកនឹងបាត់បង់ជាតិទឹក មិនសូវមានសំណើមក្នុងខ្លួន ដូច្នេះបើផឹកគ្រឿងស្រវឹងច្រើនទៀត អ្នកនឹងអាចស្ពឹកជើងពិបាកទ្រាំ។ ត្រូវផឹកទឹកឲ្យច្រើនទើបល្អ។
៦. មិនត្រូវថតរូបមនុស្សដែលពុំធ្លាប់ស្គាល់ បើគ្មានការអនុញ្ញាតជាមុន
ថតរូបមនុស្សដែលពុំធ្លាប់ស្គាល់គ្នាសោះ ហើយយកទៅបង្ហោះក្នុងបណ្ដាញសង្គមដោយគ្មានការអនុញ្ញាតជាមុន គឺជារឿងដែលមិនគប្បីទាល់តែសោះ។ វាប្រៀបបាននឹងទង្វើអសីលធម៌ គ្មានការចេះដឹង ថែមទាំងអាចធ្វើឲ្យអ្នកដទៃមានគ្រោះថ្នាក់ដោយសារតែអ្នក។
៧. អានបទបញ្ជាហាមឃាត់ក្នុងវ៉ាលីយួរដៃ
នេះជារឿងសំខាន់ ដែលអ្នកគួរដឹងថាឥវ៉ាន់ណាខ្លះអាចដាក់ក្នុងវ៉ាលីយួរដៃ របស់ណាខ្លះដែលគេហាមឃាត់ ជៀសវាងពេលចូលម៉ាស៊ីនស្គេន ត្រូវគេរើកកាយដកហូតខ្ទេចខ្ទីគ្មានសល់។
៨. ស្លៀកខោអាវមានធាតុលោហៈច្រើនពេក
ពេលអ្នកពាក់ខ្សែក្រវាត់ ស្លៀកខោអាវ ឬ ពាក់ស្បែកជើង ដែលមានរូតមានជាតិលោហៈច្រើនពេក អ្នកត្រូវដោះរបស់ទាំងនោះចេញសិន នៅច្រកចូលពិនិត្យឆែកឆេរ។ ហេតុនេះត្រូវរើសសម្លៀកបំពាក់ឲ្យបានត្រឹមត្រូវ ទើបមិនស្មុគស្មាញយូរការ៕
ចុចអានបន្ត៖ អ្នកត្រៀមនឹងឡើងយន្តហោះ គួរដឹងរបៀបតែងខ្លួនទាំងនេះ