វិធីដកមនុស្សម្នាក់ចេញពីបេះដូង ដោយមិនបាច់បង្ខំខ្លួនឯង
- 2018-11-17 09:12:45
- ចំនួនមតិ 0 | ចំនួនចែករំលែក 0
វិធីដកមនុស្សម្នាក់ចេញពីបេះដូង ដោយមិនបាច់បង្ខំខ្លួនឯង
បំភ្លេចមនុស្សម្នាក់ដែលធ្លាប់ស្រឡាញ់គឺជារឿងលំបាកមួយព្រោះពេលខ្លះកាន់តែចង់ភ្លេចកាន់តែចងចាំ។ ការពិតអ្វីដែលសំខាន់មិនមែនបំភ្លេចគាត់នោះទេ តែត្រូវធ្វើចិត្តឲ្យប្រសើរឡើងវិញ ព្រោះខួរក្បាលយើងមានការចងចាំ ដូច្នេះភ្លាមៗមិនអាចលុបនរណាម្នាក់ឡើយ។ អត្ថបទខាងក្រោមនេះ នឹងបង្ហាញវិធីធ្វើចិត្តឲ្យរឹងមាំមកវិញខ្លះ នៅពេលអ្នកកំពុងនឹងគេខ្លាំង ៖
១. ទទួលយកអ្វីដែលបានកើតឡើង
បើមានអារម្មណ៍ថាឈឺចាប់ខ្លាំង ក៏យំទៅ ស្រែកទៅ កុំបាច់លាក់ទុកក្នុងទ្រូងនាំតែពិបាកដកដង្ហើម។ បន្ទាប់មក អ្នកនឹងត្រូវទទួលរងអារម្មណ៍ឯកា ដូច្នេះអ្នកគួរតែចែករំលែកវាទៅគ្រួសារ ឬក៏មិត្តភក្តិដែលអ្នកទុកចិត្ត ឬ សរសេរវាក្នុងសៀវភៅកំណត់ហេតុដើម្បីឲ្យបានធូរស្រាលជាជាងលាក់ទុកម្នាក់ឯង។
**២. កុំព្យាយាមបង្ខំខ្លួនឯងឲ្យស្អប់គេ**
នៅពេលដែលអ្នកព្យាយាមស្អប់នរណាម្នាក់ ម្នាក់នោះនឹងក្លាយជាផ្នែកមួយនៃការគិតរបស់អ្នក។ កុំបង្ខំខ្លួនឯងអី ធ្វើតាមសម្រួលទៅ ទុកឲ្យអ្វីៗទៅតាមដំណើររបស់វា។ អ្វីដែលអ្នកត្រូវធ្វើគឺព្យាយាមគិតថាគេគ្មានតម្លៃទៀតទេក្នុងជីវិតអ្នក។
៣. ស្រឡាញ់ខ្លួនឯងឡើងវិញ
ពេលខ្លះប្រហែលអ្នកអាចភ្លេចស្រឡាញ់ខ្លួនឯងនៅពេលអ្នកស្រឡាញ់គេខ្លាំងពេក ដូច្នេះពេលនេះគួរតែជាពេលដ៏ល្អដែលអ្នកត្រូវមើលថែខ្លួនឯងម្ដងហើយ។ កុំចំណាយពេលគិតពីគេ ឬរំលឹករឿងពីមុនអី គួរតែឆាប់ចូលគេង ឆាប់ក្រោក ហើយធ្វើអ្វីដែលខ្លួនឯងសប្បាយចិត្ត ព្រោះគ្មានអ្នកណាអាចស្រឡាញ់អ្នកជាងខ្លួនឯងនោះទេ។
៤. កុំព្យាយាមធ្វើ ឬគាស់កកាយរឿងពីមុនៗ
ក្រែងអ្នកចង់បំភ្លេចគេណាស់មែនទេ?ហេតុអីត្រូវធ្វើរឿងដែលអ្នកនិងគេធ្លាប់ធ្វើពីមុន? ពេលដែលអ្នកធ្វើបែបនេះអ្នករឹតតែឈឺចាប់ និងនឹកគេកាន់តែខ្លាំងប៉ុណ្ណោះ។
៥. បង្កើតការចងចាំថ្មី
ស្គាល់មនុស្សថ្មី ទៅកន្លែងថ្មីៗ ញ៉ាំអីដែលអ្នកមិនធ្លាប់ញ៉ាំ ធ្វើអ្វីដែលអ្នកមិនធ្លាប់ធ្វើដើម្បីបង្កើតការចងចាំថ្មីៗដើម្បីលុបការចងចាំចាស់ៗ។ ជំនួសឲ្យរឿងមិនល្អដែលធ្លាប់មានស្នាមក្នុងចិត្ត អ្នកត្រូវព្យាយាមបង្កើតរឿងថ្មីៗ រឿងល្អៗ ទើបចិត្ត និង ងារម្មណ៍អ្នកជ្រះស្រឡះទៅតាមនោះ។
៦. កុំបន្តទាក់ទងគេទៀត
បើសិនជាអ្នកនៅតែបន្តទាក់ទងគេក្នុងឋានៈអ្វីក៏ដោយ អ្នកពិតជាពិបាកនឹងធ្វើចិត្តឲ្យស្រួលឡើងវិញណាស់ ព្រោះមនុស្សធ្លាប់ស្រឡាញ់គ្នា មនុស្សធ្លាប់មានអនុស្សាវរីយ៍ជាមួយគ្នា។អ្នកគួរតែដើរចេញឲ្យឆ្ងាយពីគាត់ទើបល្អ ចាំពេលណាខ្លួនឯងរឹងមាំហើយ សឹមត្រឡប់មករាប់អានគ្នាក៏មិនខាតបង់អីដែរ។
៧. ផ្លាស់ប្ដូរការរស់នៅរបស់អ្នក
រៀបចំបន្ទប់អ្នកឲ្យស្អាត បោះចោលរបស់ណាដែលពាក់ព័ន្ធរវាងអ្នកនឹងគេ និងរបស់ដែលគេធ្លាប់ឲ្យអ្នក ដើម្បីកុំឲ្យពេលដែលអ្នកឃើញវាអ្នកនឹកដល់ម្ចាស់។ ពេលចេញទៅក្រៅរៀបចំខ្លួនឲ្យស្អាត ធ្វើអីដែលនាំឲ្យខ្លួនកាន់តែខ្ពស់បែបនេះទើបជាការតបស្នងនៅពេលគេចាកចេញ។
៨. កុំព្យាយាមបញ្ឈឺគេ
អ្នកត្រូវចាំថាត្រូវរក្សាខ្លួនឯងឲ្យមានតម្លៃ ការសងសឹក ការបញ្ឈឺមិនមែនជាវិធីដែលអ្នកត្រូវធ្វើនោះទេ ព្រោះពេលអ្នកធ្វើបែបនេះគឺអ្នកគ្មានថ្ងៃភ្លេចគេនោះទេ ហើយរឹតតែឲ្យគេយល់ថាអ្នកនៅស្រឡាញ់គេទៀតផង។
៩. បើកឱកាសឲ្យខ្លួនឯង
កុំព្យាយាមឃុំខ្លួនឯងក្នុងអតីតកាលដោយសារគេអី ត្រូវគិតថាគេជាមនុស្សដែលមិនសក្ដិសមជាមួយអ្នក ហើយអ្នកនឹងអាចទទួលបានស្នេហាដែលល្អជាងនេះ។ ក្នុងពិភពលោកនេះមិនមែនមានតែគេម្នាក់ឡើយ ហើយថ្ងៃណាមួយគូព្រេងពិតនឹងមកជួបអ្នកមិនខាន។
ត្រូវឆ្លងកាត់ដំណាក់កាលនេះឲ្យបានល្អបំផុត ព្រោះវាជាពេលដែលអ្នកឆ្ពោះទៅរកផ្លូវមួយដែលល្អជាងនេះ៕
ចុចអាន៖បើគេបង្ហាញសញ្ញាទាំងនេះចេញមក វាគ្រប់គ្រាន់ឲ្យអ្នកដើរចេញពីស្នេហានោះហើយ