ពាក្យសម្ដីដែលមនុស្សថ្លៃថ្នូរ មិនគួរឲ្យរបូតចេញពីមាត់

2018-08-31 04:06:22
ចំនួនមតិ 0 | ចំនួនចែករំលែក 0

មនុស្សថ្លៃថ្នូរមិនសំដៅយកការកើតក្នុងត្រកូលអ្នកមាន ត្រកូលអ្នកអភិជនអីទេ តែវាសំដៅទៅលើឫកពា មាយាទ និងការអប់រំដែលមនុស្សម្នាក់ៗមាន។ បើសិនជាអ្នកចង់កា្លយជាមនុស្សដែលមានភាពថ្លៃថ្នូរ រស់ក្នុងសង្គមមួយដ៏ខ្ពង់ខ្ពស់សម្រាប់ខ្លួនឯងនោះ អ្នកមិនត្រូវប្រើពាក្យទាំងប៉ុន្មានខាងក្រោមនេះទេ ៖

រូបតំណាង

**១. ពាក្យអាក្រក់ៗស្ដាប់**

បើសិនជាអ្នករស់ក្នុងសង្គមមួយដែលថ្លៃថ្នូរដែរនោះ ពាក្យអាក្រក់ៗស្ដាប់មិនគួរណាឲ្យរបូតចេញពីមាត់របស់អ្នកនោះទេ។ ទោះអ្នកកំពុងស្ថិតក្នុងស្ថានភាពបែបណាក៏ដោយក៏អ្នកមិនគួរប្រើណាដែលពិបាកស្ដាប់ឡើយ ទោះពេលខ្លះអ្នកមានចេតនាលេងសើចក៏ដោយ។

២. ពាក្យពេលកំពុងខឹង

មនុស្សដែលកំពុងខឹងគឺភាគរយខ្ពស់ណាស់ក្នុងការនិយាយអីដោយមិនបានគិត មិនបានប្រុងប្រយ័ត្ន ដែលជាហេតុធ្វើឲ្យរឿងមិនល្អកើតឡើង។ អ្នកគួរតែរៀនគ្រប់គ្រងខ្លួនឯងពេលដែលខឹងអ្វីមួយឲ្យបានប្រសើរ ព្រោះពេលខ្លះដោយសារតែពាក្យអ្នកនិយាយចេញមកនោះ ធ្វើឲ្យអ្នកស្ដាយក្រោយក៏ថាបាន។

៣. ពាក្យដែលធ្វើឲ្យគេឈឺចាប់

ពាក្យណាដែលអាចធ្វើឲ្យមនុស្សឈឺចាប់ អ្នកមិនគួរនិយាយទៅកាន់គេនោះទេ។ ធ្លាប់ឮទេថា «ពាក្យសម្ដីអាចសម្លាប់មនុស្សបាន» ដូច្នេះហើយអ្នកគួរតែយកចិត្តគេដាក់ចិត្តខ្លួនឯងថាតើ បើគេនិយាយពាក្យនោះមកកាន់អ្នក តើអ្នកឈឺចាប់ទេ?

៤. ពាក្យកុហក

មនុស្សដែលនិយាយកុហកត្រូវបានគេចាត់ទុកថាជាមនុស្សមិនស្មោះត្រង់ ហើយក៏ជាពាក្យដែលមិនគួរឲ្យមានសម្រាប់អ្នកដែរ។ នៅពេលដែលអ្នកនិយាយកុហកច្រើនដងពាក្យអ្នកនឹងក្លាយជាមនុស្សដែលគេលែងទុកចិត្ត និងជឿជាក់ទៀតហើយ ពេលនោះតម្លៃអ្នកក៏អន់ទៅតាមនោះដែរ។

៥. រឿងសម្ងាត់របស់នរណាម្នាក់ដែលអ្នកដឹង

បើសិនជាមានមិត្តស្និទ្ធស្នាលប្រាប់អ្នកនូវរឿងសម្ងាត់របស់គេមកឲ្យអ្នកដឹងនោះ អ្នកត្រូវប្រាកដថាអ្នករក្សារឿងនេះឲ្យគេបាន។ ការដែលដឹងរឿងរបស់គេហើយ យកវាទៅចែករំលែកអ្នកដទៃទៀតគឺជាទង្វើដ៏អសីលធម៌បំផុតដែលមនុស្សថ្លៃថ្នូរមិនគួរធ្វើ។

រូបតំណាង

៦. រឿងផ្ទៃក្នុងគ្រួសារ

ទោះអ្នកមិនពេញចិត្តជាមួយគ្រួសារអ្នក ឬសាច់ញាតិអ្នកយ៉ាងណាក៏ដោយអ្នកមិនគួរដើរចេញនិយាយប្រាប់គេប្រាប់ឯងពីរឿងផ្ទៃក្នុងគ្រួសារអ្នកដែរ។ ល្អអាក្រក់អ្នកគួរតែដោះស្រាយក្នុងគ្រួសារអ្នក មិនមែនដើរហែកកេរ្តិ៍គ្នានោះទេ។

សម្ដីដែលរបូតចេញពីមាត់អ្នកហើយពេលខ្លះមិនអាចយកទៅវិញទេ ដូច្នេះអ្នកត្រូវគិតឲ្យមែនទែនមុននិយាយវាចេញមក៕

ចុចអាន៖៤ហេតុផលសំខាន់ៗ ដែលមនុស្សស្រីត្រូវធ្វើខ្លួនឲ្យរឹងមាំ

ប្រភព៖ Guu ប្រែសម្រួល៖ ផេង ផលធិតា