៥យ៉ាងត្រូវជៀសដាច់ខាត បើមិនចង់មានវិប្បដិសារីក្នុងជីវិត

2018-08-20 06:15:49
ចំនួនមតិ 0 | ចំនួនចែករំលែក 0

មនុស្សគ្រប់រូបបានដឹងហើយថា ពេលវេលាដែលកន្លងផុតទៅមិនអាចបកក្រោយវិញបានទេ។ អ្វីដែលអ្នកសម្រេចចិត្តនៅថ្ងៃនេះ អាចធ្វើឲ្យអ្នកមានភាពស្តាយក្រោយទៅថ្ងៃមុខ។ ហេតុនេះហើយ បើសិនជាអ្នកមិនចង់មានវិប្បដិសារី ត្រូវតែជៀសឲ្យឆ្ងាយពីរឿង៥យ៉ាង។

១. សម្រេចចិត្តដោយផ្អែកលើគំនិតអ្នកដទៃ

កើតមកជាមនុស្ស អ្នកមានសិទ្ធិគ្រប់គ្រងជីវិតខ្លួនឯង ដូច្នេះហើយការជ្រើសរើសធ្វើរឿងអ្វីមួយដែលខ្លួនស្រលាញ់ពេញចិត្ត វាជាការសម្រេចរបស់អ្នកផ្ទាល់។ សម្តីអ្នកដទៃ គ្រាន់តែជាផ្នត់គំនិតផ្សេងមួយទៀត ដែលអ្នកមិនគួរយកអារម្មណ៍ទៅខ្វាយខ្វល់ពេកនោះទេ។

២. គិតតែពីរឿងការងារ គ្មានពេលធ្វើអ្វីផ្សេង

លុយពិតជាសំខាន់ណាស់ ទើបបានជាមនុស្សម្នាក់ៗ ខិតខំប្រឹងប្រែងធ្វើការឥតស្រាកស្រាន្ត រហូតពេលខ្លះភ្លេចគិតពីគ្រួសារក៏មាន។ ទោះបីជារវល់យ៉ាងណាក៏ដោយ ត្រូវចេះលៃលកពេលវេលា សម្រាប់ខ្លួនឯង និងមនុស្សជាទីស្រលាញ់ ដូចជាការដធ្វើដំណើរកម្សាន្ត ការជួបជុំគ្នាជាដើម ដើម្បីបង្កើតអនុស្សាវរីយ៍ល្អៗ ព្រោះអ្នកមិនអាចដឹងទេថា ថ្ងៃណាមួយអ្នកនឹងខកខានឱកាសដ៏កម្រមួយនេះ។

៣. មិនបានបង្ហាញអារម្មណ៍ពិត ឬបញ្ជាក់អ្វីមួយឲ្យបានច្បាស់លាស់

ទោះបីជាអ្នកដឹងពីរបៀបគ្រប់គ្រងអារម្មណ៍បានល្អយ៉ាងណា ប៉ុន្តែត្រូវចេះនិយាយបង្ហាញពីអ្វីដែលមាននៅក្នុងចិត្ត ដោយមិនលាក់លៀមនាំឲ្យគ្រាំទ្រូងនោះទេ។ ឧទាហរណ៍ថា អ្នកស្រលាញ់នរណាម្នាក់ ប៉ុន្តែមិនហ៊ានប្រាប់ឲ្យគេបានដឹង អ្នកនឹងអាចស្តាយក្រោយទៅថ្ងៃមុខ។ ត្រូវមានភាពក្លាហាន ហ៊ានសាកល្បង និងហ៊ានទទួលយកលទ្ធផល ប្រសើរជាងការលាក់ទុកក្នុងចិត្តតែម្នាក់ឯង។

៤. គ្មានទំនាក់ទំនងជាមួយមិត្តភ័ក្ដិ

នៅក្នុងជីវិតតែងតែមានលាយឡំរវាងមិត្តល្អនិងមិត្តអាក្រក់។ ពិតណាស់ មិត្តអាក្រក់ត្រូវចម្រុះចោលឲ្យអស់ កុំទុកនាំអំពល់ក្នុងជីវិត ប៉ុន្តែមិត្តល្អត្រូវព្យាយាម ថែរក្សាទំនាក់ទំនងឲ្យបានរឹងមាំ ដើម្បីជីវិតពោរពេញដោយភាពស្រស់បំព្រង ហ៊ុមព័ទ្ធដោយមនុស្សល្អៗ ចេះជួយយកអសារនិងការលើកទឹកចិត្ត។ រាប់អានមិត្តថ្មី តែកុំភ្លេចមិត្តចាស់។

៥. បណ្តោយឲ្យការឈឺចាប់ មកគ្រប់ដណ្តប់លើជីវិត

ជីវិតមានសប្បាយ ហើយក៏មានទុក្ខមកជាមួយគ្នា គ្មាននរណាជៀសផុតឡើយ។ មានមនុស្សជាច្រើន ជាប់គាំងជាមួយនឹងទុក្ខ ងើបទៅមុខលែងរួច ហើយទុក្ខទាំងនោះនឹងរារាំងអ្នក ពីក្តីសុខ និងភាពសប្បាយរីករាយនៅក្នុងជីវិត។ ត្រូវតាំងចិត្តឲ្យមុះមុត ជម្នះនូវការឈឺចាប់និងឧបសគ្គទាំងឡាយ ដើម្បីកសាងខ្លួនឲ្យរឹងមាំ និងគ្មានវិប្បដិសារីក្នុងមួយជាតិនេះ ៕