កន្លែងទេសចរណ៍ស្អាតៗនៅកម្ពុជា ពុំសូវមានអ្នកទៅដល់ មើលទុកដើរលេងពេលចូលឆ្នាំ

2018-04-09 10:04:17
ចំនួនមតិ 0 | ចំនួនចែករំលែក 0

នៅថ្ងៃចូលឆ្នាំប្រពៃណីជាតិ ប្រជាជនខ្មែរតែងតែទៅវត្តដើម្បីយកចង្ហាន់ប្រគេនព្រះសង្ឃ។ អ្នកខ្លះទៅជួបជុំផៅញាតិនៅឯស្រុកកំណើត ហើយអ្នកខ្លះទៀតក៏ទៅដើរលេងជុំគ្រួសារផងដែរ។ ថ្ងៃនេះ កញ្ញា នឹងណែនាំអ្នកទាំងអស់នូវកន្លែងទេសចរណ៍ក្នុងស្រុកស្អាតៗ ដែលអ្នកពុំចាំបាច់ទៅដើរនៅឯក្រៅប្រទេសក៏បាន។

១. កោះកេរ្តិ៍ ប្រាសាទកោះកេរ្តិ៍មានទីតាំងស្ថិតនៅក្នុងខេត្តព្រះវិហារ ហើយមានចម្ងាយប្រមាណ ១២០គីឡូម៉ែត្រពីទីក្រុងសៀមរាប។ នៅក្នុងប្រវត្តិសាស្ត្រប្រាសាទនេះធ្លាប់ជាទីក្រុងមួយ នាសម័យអាណាចក្រខ្មែរ។ បើអ្នកបានទៅដល់ទីនោះ អ្នកច្បាស់ជាប្លែកភ្នែក ព្រោះនៅជុំវិញប្រាសាទ ហ៊ុមព័ទ្ធទៅ ដោយដើមឈើធំៗនិងស្មៅខៀវខ្ចី។ ហើយបើអ្នកឡើងទៅដល់លើកំពូលប្រសាទទៀតនោះ អ្នកនឹងបានឃើញទេសភាពធម្មជាតិដ៏ស្រស់ត្រកាល។ ២. ភ្នំពើងតានាន់ មានទីតាំងស្ថិតនៅក្នុងខេត្តសៀមរាប ហើយភ្នំនេះពុំសូវមានស្គាល់ច្រើនប៉ុន្មានទេ។ វាមានថ្មដុះធម្មជាតិ ហើយពេលមើលរូបថតមួយភ្លែត ហាក់បីដូចជានៅស្រុកក្រៅអីចឹង។

៣. កោះរុងសន្លឹម មានទីតាំងស្ថិតនៅក្រុងព្រះសីហនុ អ្នកមិនត្រឹមតែរីករាយនូវទេសភាពនៅលើកោះប៉ុណ្ណោះទេ អ្នកថែមទាំងអាចធ្វើការជ្រមុជទឹក ទទួលនូវទស្សនីយភាពថ្មីនៅក្រោមបាតសមុទ្រវិញម្តង។

៤. ទឹកធ្លាក់ចំប៉ី មានទីតាំងស្ថិតនៅក្នុងខេត្តក្រចេះ ហើយទឹកធ្លាក់នេះស្ថិតនៅតាមបណ្ដោយជ្រលងភ្នំ ដែលពោរពេញទៅដោយថ្ម និងផ្កាចម្រុះពណ៌។ វាមានភាពស្ងប់ស្ងាត់ អាចជួយឲ្យអ្នកសម្រាកលំហែកាយ និងកាត់បន្ថយភាពតានតឹងបានច្រើន។

៥. តារាសាគរ វាជារីស្សតឯកជនមួយកន្លែង មានទីតាំងស្ថិតនៅទីរួមខេត្តកោះកុង ប៉ុន្តែប្រសិនបើអ្នកមិនស្នាក់នៅក៍អ្នកអាច ទៅលំហែនៅឯឆ្នេរដ៏ធំល្វឹងល្វើយ បានដោយសេរី។ ៦. កោះឫស្សី

បើអ្នកចូលចិត្តកន្លែងស្ងប់ស្ងាត់ មិនសូវមានមនុស្សរញ៉េរញ៉ៃច្រើន កោះនេះជាជម្រើសល្អបំផុតសម្រាប់អ្នក។ អ្នកអាចមកដល់កោះនេះ ដោយការជិះទូក ប្រមាណពី ២០-៣០នាទី ប៉ុណ្ណោះពីក្រុងព្រះសីហនុ។

អត្ថបទ៖ ដេត ឈុនអ៉ី