កុំឲ្យសក់ជ្រុះរលើងទាំងវ័យក្មេង ស្រីៗត្រូវទប់ស្កាត់ដោយវិធី ៧យ៉ាងនេះ

2018-01-04 06:29:53
ចំនួនមតិ 0 | ចំនួនចែករំលែក 0

សក់ជ្រុះអាចបណ្ដាលមកពីមូលហេតុផ្សេងៗដូចជា ជំងឺពាក់ព័ន្ធក្រពេញទីរ៉ូអ៊ីត អាការក្រោយសម្រាលកូន ក្រោយកើតគ្រុនក្ដៅខ្លាំង ការអត់អាហារធ្ងន់ធ្ងរដើម្បីសម្រកទម្ងន់ ការប្រើថ្នាំប្រភេទមួយចំនួនដូចជា ថ្នាំព្យាបាលជំងឺមហារីក ជំងឺស្បែកមួយចំនួន ជំងឺផ្លូវចិត្តដែលចូលចិត្តដកសក់ខ្លួនឯង មហារីកអូវែ... ប៉ុន្តែមូលហេតុដែលបានរៀបរាប់នេះគឺត្រូវបានប្រទះត្រឹមតែ ៥%ប៉ុណ្ណោះក្នុងការសិក្សា ឯមូលហេតុដែលជួបប្រទះច្រើនជាងគេគឺមូលហេតុតំណពូជ ដែលត្រូវបានរកឃើញរហូត ៩៥%។ រីឯការលើកឡើងផ្សេងៗទៀតដូចជា ការមានរន្ធរោមស្ទះ ការកក់សក់ញឹកញាប់ ឬការពាក់មួកសុវត្ថិភាពយូរៗគឺមិនមែនជាមូលហេតុដែលនាំឲ្យក្បាលទំពែកនោះឡើយ។

ឥលូវនេះ កញ្ញា នឹងនាំប្រិយមិត្តមកស្វែងយល់ថាតើយើងអាចធ្វើយ៉ាងណាខ្លះដើម្បីជៀសវាងការធ្វើឲ្យជ្រុះសក់ ជាមួយវិធីសាស្ត្រសាមញ្ញៗ៖

១. បញ្ឈប់ស្ត្រេស

ស្រេ្តសច្រើន សក់ក៏ជ្រុះច្រើនដែរ។ វិធីបញ្ឈប់ការស្ត្រេសអាចធ្វើបានតាមរយៈវិធីផ្សេងៗដូចជា ការហាត់ប្រាណ ការហាត់យូហ្កា ការដើរ ឬការរត់ជាដើម។ ក្រៅពីនេះការគេង សម្រាកឲ្យបានគ្រប់គ្រាន់ក៏រឹតតែសំខាន់ដែរសម្រាប់ការបញ្ឈប់ការជ្រុះសក់។

២. ចៀសវាងប្រើសារធាតុគីមីញឹកញាប់

បច្ចុប្បន្នសរសៃសក់របស់យើងត្រូវបំផ្លាញដោយសារហេតុផលជាច្រើន មិនថាការលាបពណ៌ អ៊ុត ពន្លា ដែលសុទ្ធតែត្រូវប្រើសារធាតុគីមីចូលជាមួយទាំងអស់។ ដូច្នេះដើម្បីកាត់បន្ថយការជ្រុះសក់ អ្នកគួរចៀសវាងការប្រើប្រាស់សារធាតុគីមី ព្រោះសារធាតុទាំងនោះនឹងធ្វើឲ្យសរសៃសក់មានសុខភាពខ្សោយ ងាយជ្រុះ។ ប្រសិនបើចៀសមិនបាន អាចជ្រើសរើសប្រើផលិតផលដែលមានធាតុផ្សំពីធម្មជាតិជំនួសវិញ។

៣. ជ្រើសរើសក្រាស់សិតសក់ដែលសមរម្យ

ការជ្រើសរើសក្រាស់សិតសក់បានល្អគឺជាវិធីមួយដែលកាត់បន្ថយការជ្រុះសក់បាន ព្រោះក្រាស់សិតសក់មួយចំនួនអាចធ្វើឲ្យសរសៃសក់ឆាប់ខូច និងជ្រុះ ដូច្នេះអ្នកគួរជ្រើសរើសក្រាស់ដែលត្រូវនឹងសក់របស់ខ្លួន ដូចជាជ្រើសរើសក្រាស់ធ្មេញរង្វើលសម្រាប់អ្នកដែលមានសរសៃសក់ធំ និងក្រាស់ដើម្បីកុំឲ្យសក់ជំពាក់។

៤. កុំសិតសក់ពេលសក់សើម

មិនគួរសិតសក់នៅពេលសក់កំពុងសើមនោះទេ ព្រោះវានឹងធ្វើឲ្យសរសៃងាយសក់ជ្រុះ។ អ្នកគួរជូតសក់ឲ្យស្ងួតសិន សឹមសិតថ្នមៗ ដើម្បីឲ្យសក់ចូលភ្លីតាមសម្រួល។

៥. កុំជូតសក់ខ្លាំងៗពេក

ការជូតសក់ខ្លាំងពេក ក៏អាចបណ្ដាលឲ្យសក់ងាយជ្រុះដូចគ្នា។ ក្រណាត់ ឬកន្សែងដែលប្រើដើម្បីជូតសក់គួរតែមានលក្ខណៈទន់។ ជូត និងផ្លុំសក់របស់អ្នកឲ្យបានស្ងួតល្អ នោះសក់អ្នកនឹងមានសុខភាពល្អដែរ។

៦. ជ្រើសរើសសាប៊ូកក់សក់ដែលសក្ដិសម

បច្ចុប្បន្នសាប៊ូកក់សក់នៅលើទីផ្សារមានលក់ជាច្រើនប្រភេទដែលតម្រូវទៅតាមស្ថានភាពសក់ និងស្បែកក្បាលខុសៗគ្នា ដូចជាអ្នកខ្លះសក់ឡើងប្រេង សក់រួញ សក់លាបពណ៌ និងសក់មានអង្គែជាដើម ដែលការជ្រើសរើសសាប៊ូកក់សក់ក៏គួរតម្រូវឲ្យត្រូវតាមប្រភេទសក់នីមួយៗដូចគ្នា ដើម្បីឲ្យសរសៃសក់មានសុខភាពរឹងមាំ ហើយផលិតផលខ្លះក៏មានផលិតតម្រូវទៅតាមវ័យផងដែរ។

៧. ទទួលទានអាហារដែលមានប្រយោជន៍សម្រាប់សរសៃសក់

សរសៃសក់របស់មនុស្សយើងមានភាពខុសគ្នាទៅតាមហ្ស៊ែន អ្នកខ្លះសក់ស្ដើង អ្នកខ្លះសក់ក្រាស់ ប៉ុន្តែមិនថាសក់ប្រភេទណា ក៏អាចមានសុខភាពល្អដូចគ្នា ហើយវិធីដែលត្រូវបានអ្នកពិសោធន៍រកឃើញថាមានផលជាងគេនោះគឺការទទួលទានអាហារ។ ក្នុងនោះសរសៃសក់ប្រភេទនីមួយត្រូវការអាហារបំប៉នខុសៗគ្នា ដូចជាប្រសិនបើចង់ឲ្យសក់ខ្មៅស្អាត គួរញ៉ាំត្រីសាល់ម៉ុន ឬប្រសិនបើសក់មានអង្គែ គួរញ៉ាំគ្រាប់ល្ពៅជាដើម ៕