ប្រពន្ធមានលក្ខណៈសម្បត្តិ ៥ យ៉ាងនេះ ជាទីមោទនភាពរបស់ស្វាមីគ្រប់រូប

2016-11-26 02:48:22
ចំនួនមតិ 0 | ចំនួនចែករំលែក 0

មនុស្សប្រុសពិតជាសប្បាយចិត្តបំផុត ពេលដែលខ្លួនមានភរិយាជានារីដ៏អស្ចារ្យ។ ដូចនេះបើប្រពន្ធមានលក្ខណៈសម្បត្តិ ៥ យ៉ាងនេះ ស្វាមីមានមោទនភាពខ្លាំងណាស់៖

១.មានរបៀបស្លៀកពាក់ស្អាតបាតជានិច្ច

ប្រពន្ធដែលធ្វើឲ្យស្វាមីរីកមុខមាត់បាន ត្រូវចេះដឹងតាំងពីរបៀបស្លៀកពាក់ខ្លួនឯង និងគ្រួសារឲ្យបានសមរម្យតាំងពី គេងយប់ នៅផ្ទះ ឬការចេញដើរក្រៅ ជាពិសេសសម្រាប់ខ្លួនឯងតែម្ដង។ ពេលស្វាមីបណ្ដើរទៅកម្មវិធីជប់លៀងម្ដងៗ ហើយយើងស្លៀកពាក់តុបតែងខ្លួនបានស្អាត និងមានអ្នកសរសើរទៀតនោះ ស្វាមីរឹតតែមានមោទនភាព។ សំលៀកបំពាក់មិនចាំបាច់តែម៉ាក់ថ្លៃៗ ល្បីឈ្មោះនោះទេ សំខាន់ចេះរៀបចំខ្លួនឲ្យស្អាត។

២.ចេះកិច្ចការផ្ទះ

ស្វាមីណាក៏ដូចគ្នាដែរ ពេញចិត្តបំផុតពេលមានភរិយាជាស្ត្រីមេផ្ទះដ៏ចំណាន ចេះរៀបចំទុកដាក់ផ្ទះសំបែង និងប៉ិនប្រសព្វលើកិច្ចការចង្ក្រានជើងឆ្នាំង។ ប្រសិនបើមានភរិយាបែបនេះ គាត់នឹងដើរអួតមិត្តភ័ក្ដិ ឬសាច់ញាតិជាមិនខាន និងតែងតែមកញ៉ាំអាហារនៅផ្ទះជានិច្ច។

៣.រួសរាយរាក់ទាក់

ភរិយាដែលមានភាពរួសរាយរាក់ទាក់ ទោះជាទៅដល់ទីណាតែងលើកមុខមាត់ដល់ស្វាមីជានិច្ច។ការញញឹមរាក់ទាក់នេះធ្វើឲ្យមនុស្សផងទាំងពួងស្រលាញ់ ចូលចិត្ត និងមានការប្រាស្រ័យទាក់ទងគ្នាបានល្អ។

៤.ផ្ដល់សិទ្ធសេរីភាព

ការទៅញ៉ាំអាហារខាងក្រៅជាមួយមិត្តភ័ក្ដិគឺជារឿងធម្មតា ដូចនេះភរិយាត្រូវផ្ដល់សិទ្ធសេរីភាពដល់ ស្វាមី។ នៅពេលស្វាមីចេញក្រៅជួបមិត្តនោះ ពួកគេនឹងពោលសរសើរស្វាមីអ្នកដែលមានប្រពន្ធល្អចេះយល់ដឹងពីការជួបជុំ និងមិនឃាត់ខាំងប្ដីមិនឲ្យទៅក្រៅ។

៥.មិនរអ៊ូពេលប្ដីស្រវឹង

មានស្ត្រីជាភរិយាមិនច្រើនទេដែលមានចំណុចពិសេសនេះ។ ពេលស្វាមីស្រវឹងអ្នកគួរតែជួយរៀបចំទឹកភេសជ្ជៈដើម្បីបន្សាបជាតិស្រវឹង ឬជួយប្ដូរសំលៀកបំពាក់ និងរៀបចំកន្លែងគេងដល់គាត់។ ព្រឹកថ្ងៃបន្ទាប់គួរតែរៀបអាហារពេលព្រឹក និងមិនចាំបាច់សួរដេញដោលរឿងពីយប់ឡើយ៕