យល់ដឹងពី កត្តាដែលបណ្តាលឲ្យមានការឆ្លងមេរោគក្រោយការវះកាត់?
- 2023-12-27 03:10:00
- ចំនួនមតិ 0 | ចំនួនចែករំលែក 0
យល់ដឹងពី កត្តាដែលបណ្តាលឲ្យមានការឆ្លងមេរោគក្រោយការវះកាត់?
និយាយដល់រឿងវះកាត់ ជាទូទៅ ត្រូវការពេលវេលាយូរបន្តិចក្នុងការជាសះស្បើយត្រឡប់ទៅផ្ទះវិញ បើធៀបទៅនឹងការព្យាបាលផ្សេងៗ ហើយការវះកាត់ ក៏ទាមទារឱ្យ មានការមើលថែខ្លួនឲ្យបានដិតដល់ដើម្បីឱ្យឆាប់ជាសះស្បើយពីរបួស និងជៀសវាងការឆ្លងមេរោគមួយចំនួនផងដែរ។
បើតាមសម្តីរបស់ វេជ្ជបណ្ឌិត អ៊ុក សុវណ្ណវិចិត្រា ឯកទេសវះកាត់កែសម្ផស្សប្រចាំការនៅគ្លីនិក មៀរ៉ា ធ្វើការបកស្រាយជាមួយកញ្ញាលម្អិតថា ដើម្បីអោយការវះកាត់មួយទទួលបានជោគជ័យ គឺតម្រូវអោយមានកត្តាចូលរួម ៣ធំៗ ដែលរួមមាន៖
១. មុនការវះកាត់ ការពិគ្រោះយោបល់ជាមួយវេជ្ជបណ្ឌិតឯកទេស បូករួមជាមួយការពិនិត្យសុខភាព។
២. អំឡុងពេលវះកាត់ ប្រព្រឹត្តទៅជាមួយវេជ្ជបណ្ឌិតដែលមានបច្ចេកទេសត្រឹមត្រូវ បូករួមជាមួយ សម្ភារៈ បរិក្ខារទំនើប និងមានស្តង់ដារ។
៣. ក្រោយការវះកាត់ តម្រូវអោយអ្នកជំងឺចូលរួមសហការក្នុងការថែទាំ លាងសម្អាត និងមកតាមដានតាមការណាត់។ ជាការពិតណាស់ កត្តាទាំងបីខាងលើនេះចូលរួម និងដើរតួយ៉ាងសំខាន់ក្នុងការរួមចំណែក ឲ្យការវះកាត់មួយទទួលបានជោគជ័យ និងប្រកបដោយសុវត្ថិភាព។
ផលវិបាកដែលយើងសង្កេតឃើញជាញឹកញាប់ក្រោយការវះកាត់នោះគឺការឆ្លងមេរោគ ដែលវាបង្កឡើងពីកត្តាច្រើនរួមមាន៖
• សម្ភារៈប្រើប្រាស់មិនមានអនាម័យ ឬមិនបានឆ្លងកាត់ការសម្លាប់មេរោគត្រឹមត្រូវ
• បន្ទប់វះកាត់មិនគោរពតាមស្តង់ដារវេជ្ជសាស្ត្រ
• ការវះកាត់ជាមួយបុគ្គលដែលមិនមែនជាវេជ្ជបណ្ឌិតឯកទេស
• មិនមានការប្រើប្រាស់ថ្នាំសម្លាប់ មេរោគ (Antibiotics) អំឡុងពេល និងក្រោយការវះកាត់
• អ្នកជំងឺមិនបានយល់ដឹងអំពីការថែទាំរបួសក្រោយការវះកាត់
• មិនមានការលាងសម្អាត និងពិនិត្យរបួសទៀងទាត់ដោយអ្នកជំនាញ
ចំណុចចាំបាច់ដែលត្រូវធ្វើក្រោយពេល វះកាត់អ្នកទាំងអស់គ្នាត្រូវថែទាំខ្លួនឱ្យបានល្អ បើមិនអីចឹងទេ អាចបណ្តាលឱ្យមុខរបួសប្រេះ ឬឆ្លងរោគដែលអាចបង្កបញ្ហាសុខភាពច្រើន។ នឹងគួរទៅជួបគ្រូពេទ្យតាមការណាត់ដើម្បីធ្វើការពិនិត្យសុខភាពឡើងវិញ ឬតាមការណែនាំរបស់គ្រូពេទ្យក្នុងគោលបំណងឱ្យគ្រូពេទ្យពិនិត្យសុខភាពទូទៅ ស្នាមវះឬរបួសជាសះស្បើយហើយឬនៅជាល្អបំផុត៕