រក​ឃើញ​បុរស​ដែល​ខ្លួន​ឯង​ពេញ​ចិត្ត​ហើយ តែ​មិន​ដឹង​ថា​ធ្វើ​ម៉េច​ឲ្យ​គេ​ចាប់​អារម្មណ៍​លើអ្នក​មែន​ទេ​?​​ អ្នក​មិន​អាច​បង្ខំ​នរណា​ម្នាក់​ឲ្យ​មក​ស្រលាញ់​អ្នក​បាន​ទេ ប៉ុន្តែ​អ្នក​អាច​ប្រើ​មន្ដ​ស្នេហ៍​ពី​ធម្មជាតិ​របស់​​អ្នក​ទាក់​ទាញ​បុរស​ម្នាក់​នោះ​បាន។ ព្រោះរូបសម្រស់របស់មនុស្សស្រី កាន់តែលេចធ្លោមួយកម្រិតទៀតនៅពេលដែលរក្សាបានចរិយាមាយាទទាំងនេះ៖

១. មិនអួតអាងអត់ប្រយោជន៏

មនុស្សស្រីដែលស្រស់ស្អាតទាំងចរិយាមាយាទ ថ្វីត្បិតតែមានចំនេះដឹងខ្ពង់ខ្ពស់យ៉ាងណាក៏ដោយ មិនចូលចិត្តអួតអាង និង សម្ញែងអោយអ្នកដទៃនោះទេ។ ទោះជាពេលមានអ្នកដទៃអួតសរសើរពីខ្លួនក្ដី ក៏មិនមានអារម្មណ៏ថាខ្លួនឯងប្រសើរជានរណានោះដែរ។ រីឯមនុស្សស្រីដែលចេះតែអួតអាង និង ចង់អោយគេលើកតម្កើងខ្លួនឯងវិញនោះ អ្នកដែលឆ្លាតពិតប្រាកដច្បាស់ជាមិនគោរព និង អោយតម្លៃនោះទេ។

២.ចេះលើកសរសើរអ្នកដទៃ

ក្រៅពីមិនចំនាយពេលទៅអង្គុយច្រណែនឈ្នានីសពីភាពជោគជ័យរបស់អ្នកដទៃនោះ មនុស្សស្រីប្រភេទនេះមិនខ្លាចក្នុងការបង្ហាញពីការគោរព និង កោតសរសើរដែលនាងមាន។ ការសម្ដែងចិត្តស្មោះមកបែបនេះ មិនត្រឹមតែជួយអោយខ្លួនឯងកាន់តែប្រឹងប្រែងដើម្បីជោគជ័យផ្ទាល់ខ្លួនច្រើនជាងមុននោះទេ ថែមទាំងរក្សាបានទំនាក់ទំនងល្អជាមួយមនុស្សជុំវិញខ្លួនទៀត។

៣.មិនយកអារម្មណ៏មកប្រើ និង ទាញកំហឹងមកដោះស្រាយបញ្ហា

ត្បិតតែពេលខ្លះអារម្មណ៏ពិបាកនឹងហាមឃាត់ពិតមែន តែការដែលអនុញ្ញាតអោយភាពឆេវឆាវមួយពេលនេះលេចចេញមកខាងក្រៅ អាចនឹងក្លាយជាការខាតបង់ដ៏ធំធេងមួយ។ ហេតុនេះពេលដែលដឹងថាអ្នកខឹងសម្បាររហូតទប់មិនបានហើយនោះក៏ប្រញាប់ដកថយ ដើរចេញជៀសជៀងអង្គុយស្រាយព្រោះតែអារម្មណ៏មួយពេលនោះ។

៤. មិនចូលចិត្តរឿងរិះគន់អ្នកដទៃផ្ដេសផ្ដាស

នៅពេលដែលមិនទាន់បានស្វែងយល់ពីហេតុផល និង មនុស្សណាម្នាក់អោយបានត្រឹមត្រូវនោះទេ មិនគួរវាយតម្លៃតែពីអ្នកដែលអ្នកសម្លឹងឃើញពីខាងក្រៅនោះ។ ទម្លាប់បែបនេះហើយ ដែលធ្វើអោយអ្នកមិនអាចមានទំនាក់ទំនងជាមួយអ្នកដទៃ មិនមែនតែជាស្នេហានោះទេ ធ្វើអោយអ្នកមើលទៅអ្ជាមនុស្សដែលមិនស្រស់ស្អាត ព្រោះតែទម្លាប់មិនល្អមួយនេះ។ ធម្មតាទេ មនុស្សម្នាក់ៗ មិនអាចគិតគូរសព្វគ្រប់ជ្រុងជ្រោយរហូត មិនដែលបណ្ដោយអោយខ្លួនឯងធ្វើខុសសោះនោះទេ តែបើអ្នកសំលឹងយល់ឃើញថាកំហុសនោះអចេតនា ហើយគេក៏មានចិត្តដឹងខុសដែរនោះ កុំទៅមានគំនិតគុំគួន និង ល្អក់កករជាមួយគេអី។