មិនថាស្នេហា ការងារ ឬមិត្ត បើដល់ដំណាក់កាលនេះហើយ គឺល្មមដល់ពេលលែងដៃ

2018-04-10 02:21:43
ចំនួនមតិ 0 | ចំនួនចែករំលែក 0

រស់នៅកាន់តែយូរ ជីវិតកាន់តែជួបរឿងស្មុគស្មាញច្រើនឡើងៗ។ មិនថាជីវិតស្នេហា ការងារ មិត្តភក្ដិ ឬបញ្ហាផ្ទាល់ខ្លួនជាច្រើនទៀត កំពុងតែធ្វើទុក្ខបុកម្នេញអ្នកជារៀងរាល់ថ្ងៃ។ គូស្នេហ៍ដែលមិនយល់ចិត្ត ការងារដែលពោរពេញដោយភាពចម្រូងចម្រាស មិត្តភក្ដិដែលចាំតែគេងចំណេញ តើអ្នកព្យាយាមឱបក្រសោបដល់ពេលណាទៀត? ប្រសិនអ្នកសង្កេតឃើញសញ្ញាទាំង៥យ៉ាងនេះ មានន័យថាសម្ពាធទាំងនោះធ្ងន់ណាស់ ដូច្នេះអ្នកត្រូវដោះលែងវាជាប្រញាប់៖

១. អ្នកតែងតែក្រៀមក្រំចិត្ត

មួយថ្ងៃៗអ្នករវល់ វីវក់ខ្លាំង មិនដែលទំនេរដៃ ប៉ុន្តែទឹកមុខបៀមជាប់ភាពក្រៀមក្រំគ្រប់ពេល។ប្រសិនអ្នកចំណាយពេលវេលាស្ទើរតែទាំងអស់ ធ្វើរឿងដែលខ្លួនមិនចូលចិត្ត ជីវិតអ្នកពិតជាគ្មានន័យសោះតែម្ដង។ គ្មានពាក្យថា “យឺតពេល” ក្នុងការចាប់ផ្ដើមជាថ្មីនោះទេ។ មិនថាមានហេតុផលត្រឹមត្រូវជាច្រើនតម្រូវឲ្យអ្នកធ្វើកិច្ចការនោះ ប៉ុន្តែអ្នកពិតជាមិនអាចបូជាសេចក្ដីសុខផ្ទាល់ខ្លួនមួយជីវិតដើម្បីវាតទៅទៀតឡើយ។

២. អ្នកមិនទទួលបានការគោរព

អ្នកស្រឡាញ់ និងផ្ដល់ការគោរពចំពោះគាត់អស់ពីបេះដូង ប៉ុន្តែគាត់បែរជាមើលស្រាលក្ដីស្រឡាញ់របស់អ្នក ចាត់ទុកអ្នកត្រឹមជាស្ពានឆ្លង និងសម្រាប់បោកប្រើទៅវិញ។ អ្នកដឹងច្បាស់ ប៉ុន្តែនៅតែព្យាយាមតោងគាត់ស្អិតព្រោះតែហេតុផលចាំបាច់នានា។ បញ្ឈប់ភាពងប់ងុលខ្លួនឯង ក្រោកឈរជាថ្មី ឈប់ធ្វើជាឈ្នាន់ឲ្យមនុស្សដែលមិនស្គាល់តម្លៃរបស់អ្នក ជាន់ឈ្លីតាមអំពើចិត្តទៀត។

៣. ជីវិតហាក់បីដូចជាសោះកក្រោះ

សកម្មភាពប្រចាំថ្ងៃរបស់អ្នកគឺដដែលៗ គ្មានការផ្លាស់ប្ដូរអ្វីបន្តិចសោះ។ ការប្លែកអារម្មណ៍ ភាពរំភើបរំជើបរំជួល លែងមានតាំងពីយូរយាណាស់មកហើយ។ អ្នកមានអារម្មណ៍ដូចជាកំពុងរស់នៅក្នុងទ្រុងអញ្ចឹង។ ជាក់ស្ដែង អ្នកគួរតែបន្ថែមរសជាតិឲ្យជីវិតខ្លះ ដូច្នេះកុំខ្លាចជ្រុលពេក ហ៊ានបើកចិត្តទទួលយកការប្រថុយប្រថានខ្លះក៏ល្អម៉្យាងដែរ។

៤. អ្នកកំពុងរងទុក្ខវេទនា

អ្នកពិតជាស្អប់ការងារនេះ និងចង់លាលែង ចាកចេញពីកន្លែងនេះឲ្យបាត់ៗ ប៉ុន្តែអ្នកបារម្ភថាមិនអាចរកបានការងារថ្មី ដែលល្អជាងនេះបានភ្លាមៗ។ ទោះជាធ្លាប់ជាជនរងគ្រោះដោយសារអំពើហិង្សាពីដៃគូច្រើនលើកច្រើនសា ប៉ុន្តែអ្នកនៅតែសង្ឃឹមថាគាត់នឹងដឹងខ្លួន ប្រែជាមនុស្សថ្មីនៅថ្ងៃណាមួយ។ សូមឈប់រង់ចាំ ស្ទាក់ស្ទើរទៀត ព្រោះរឿងខ្លះទោះអ្នកអត់ធ្មត់ពេញមួយជីវិតក៏វាគ្មានថ្ងៃផ្លាស់ប្ដូរដែរ។

៥. អ្នកមិនខ្វល់ពីជីវិតបច្ចុប្បន្ន

អ្នកតែងព្រួយបារម្ភ ចំពោះរឿងនានាដែលអាចកើតឡើងនៅថ្ងៃអនាគត ឬស្រមោលអតីតកាលតាមលងបន្លាចអ្នករាល់ថ្ងៃ។ សម្ពាធផ្លូវចិត្តដ៏សែនធ្ងន់បែបនេះ ពិតជាបំផ្លាញសុភមង្គលរាល់ថ្ងៃរបស់អ្នកអស់គ្មានសល់? រីករាយជាមួយជីវិតបច្ចុប្បន្ន សើច ញញឹម ឲ្យបានច្រើន។ រឿងនៅថ្ងៃស្អែក ទុកឲ្យខ្លួនអ្នកនៅថ្ងៃស្អែក ដោះស្រាយទៅចុះ ៕

ចុចអាន៖

ប្រភព៖ Likelovequotes ប្រែសម្រួល៖ អូន បញ្ញា