ក្រុមហ៊ុនស្តង់ដារពាណិជ្ជកម្មរបស់រដ្ឋ Suffolk នៃចក្រភពអង់គ្លេសបាននិយាយថា សត្វមាន់ទាជាង ៨២,០០០ ក្បាលបានស្លាប់ដោយសារតែមានការផ្ទុះឡើងនៃជំងឺផ្តាសាយបក្សីថ្មីមួយទៀត។ មេរោគ​ផ្តាសាយ​បក្សី​ ឬហៅកាត់ថា (H5N1) ត្រូវបានគេរកឃើញនៅក្នុងកន្លែងផ្គត់ផ្គង់សាច់នៅទីក្រុង Debach ដែលនៅជិតទីក្រុង Woodbridge កាលពីចុងសប្តាហ៍មុននេះ។

ក្រុមហ៊ុនផ្គត់ផ្គង់ និងផលិតសាច់របស់ Redgrave ត្រូវបានរងផលប៉ះពាល់នៅដើមខែនេះ ដោយសារការស្លាប់របស់សត្វមាន់ទាចិញ្ចឹមចំនួនជាង ៣៥,០០០ ក្បាលដោយសារជំងឺផ្ដាសាយបក្សីថ្មី។

នាយកដ្ឋានបរិស្ថាន អាហារ និងកិច្ចការជនបទបានជំរុញឲ្យអ្នកចិញ្ចឹមមាន់ទានៅក្នុងរដ្ឋ Suffolk ទាំងអស់បង្កើនការខិតខំប្រឹងប្រែង និងការប្រុងប្រយ័ត្នរបស់ពួកគេ ខណៈពេលដែលចក្រភពអង់គ្លេសកំពុងតែប្រឈមមុខទៅនឹង «​ផ្ទុះឡើងនៃជំងឺផ្ដាសាយបក្សី» ដ៏ធំបំផុត។ ប្រធានពេទ្យសត្វលោកវេជ្ជបណ្ឌិត Christine Middlemiss បាននិយាយថា ចក្រភពអង់គ្លេសកំពុងតែទទួលរងនូវ “ការផ្ទុះឡើងនៃជំងឺផ្តាសាយបក្សី” ដ៏អាក្រក់បំផុតដែលមិនធ្លាប់មានពីមុនមកឡើយ ជាពិសេសនៅក្នុងរដ្ឋ Suffolk បានរកឃើញការកើនឡើងយ៉ាងខ្លាំងនៃការឆ្លងក្នុងចំណោមសត្វស្លាប។

ចាប់តាំងពីចុងសប្តាហ៍មុនមក កសិដ្ឋានបានចាត់វិធានការប្រុងប្រយ័ត្ន ហើយមិនមានចលនាសត្វស្លាប ឬសម្ភារៈផ្សេងទៀតចេញពីកន្លែងនោះទេ។ ឥឡូវនេះ កសិដ្ឋាននេះកំពុងតែស្ថិតនៅក្រោមការគ្រប់គ្រងរបស់ភ្នាក់ងារសុខភាពសត្វ និងរុក្ខជាតិរបស់រដ្ឋ។

ភ្នាក់ងារសុខភាពសត្វ និងរុក្ខជាតិបាននិយាយថា សុខុមាលភាព ស្តង់ដារខ្ពស់បំផុតក្នុងអនាម័យ និងសុខុមាលភាពសត្វនៅទូទាំងកសិដ្ឋានគឺជារឿងចាំបាច់ដែលត្រូវគ្រប់គ្រងមុនគេ ដើម្បីធានាថាវានឹងមិនមានផលប៉ះពាល់ចំពោះមនុស្ស៕

ចុចអានបន្ដ៖ ចំនួនអ្នកស្លាប់ដោយសារកូវីដ ប្រហែលបីដងខ្ពស់ជាងកំណត់ត្រាដែលធ្លាប់មាន