អ្នកឧស្សាហ៍ចូលគេងយប់ជ្រៅក្នុងវ័យខ្ទង់២០ឆ្នាំ ជៀសមិនផុតពីផលប៉ះពាល់ទាំងនេះឡើយ
- 2019-08-30 03:40:00
- ចំនួនមតិ 0 | ចំនួនចែករំលែក 0
អ្នកឧស្សាហ៍ចូលគេងយប់ជ្រៅក្នុងវ័យខ្ទង់២០ឆ្នាំ ជៀសមិនផុតពីផលប៉ះពាល់ទាំងនេះឡើយ
វ័យ២០ឆ្នាំនេះគឺជាវ័យដែលត្រូវចំណាយពេលវេលាច្រើនទៅលើការងារ មិត្តភ័ក្ដិ ស្នេហានិងរឿងផ្សេងៗទៀត ជាពិសេសនៅពេលយប់ រហូតត្រូវនៅដល់យប់ជ្រៅ ហើយត្រូវក្រោកពីព្រលឹមដូចគេដូចឯង។ អ្នកជំនាញផ្នែកសុខភាពធ្លាប់បានណែនាំច្រើនមកហើយថា រាងកាយមនុស្សយើងត្រូវការសម្រាកហោចណាស់ឱ្យបាន៧ទៅ៩ម៉ោងក្នុងមួយយប់សម្រាប់មនុស្សវ័យជំទង់។
ការគេងមិនបានគ្រប់គ្រាន់ មិនត្រឹមតែធ្វើឱ្យអ្នកមានអារម្មណ៍មិនស្រឡះក្នុងខ្លួននៅព្រឹកបន្ទាប់នោះទេ តែការដែលទម្លាប់ចូលគេងយប់ជ្រៅៗបែបនេះរយៈពេលយូរ នឹងបង្កផលប៉ះពាល់ខ្លាំងដល់រាងកាយ ហើយបើមិនគិតគូរយកចិត្តទុកដាក់ទេ វាអាចបណ្ដាលឱ្យកើតមានជំងឺរ៉ាំរ៉ៃទៀតផងដូចជា៖
១. សម្ពាធឈាមអាចឡើងខ្ពស់
ការគេងមិនបានគ្រប់គ្រាន់នឹងធ្វើឱ្យរាងកាយ និងស្មារតីស្ថិតក្នុងសភាពមួយដែលនាំឱ្យសម្ពាធឈាមឡើងខ្លាំង។ កាលណាបន្តនៅបែបនេះរយៈពេលយូរ វាអាចនឹងប៉ះពាល់ដល់បេះដូង សរសៃឈាម តម្រងនោម ឬឈានទៅដល់ការដាច់សរសៃឈាមខួរក្បាលក៏មាន បាត់បង់ការចងចាំ និងជាការបើកផ្លូវឱ្យរាងកាយឆាប់ទទួលរងជំងឺខុសពីអ្នកដទៃ។
២. ឧស្សាហ៍ស្ត្រេសទាំងគ្មានមូលហេតុ
អ្នកដែលមិនសូវបានគេងគ្រប់គ្រាន់ ប្រហែលធ្លាប់មានបទពិសោធន៍ថា ហេតុអីនៅសុខៗខ្លួនបែរជាមានអារម្មណ៍ស្ត្រេស ធុញថប់ទាំងគ្មានមូលហេតុ ឬគ្មានអ្នកណាមកធ្វើអ្វីក៏ដោយ។ ការពិតការគេងមិនគ្រប់គ្រាន់ រាងកាយនឹងបញ្ចេញអរម៉ូនស្ត្រេសម្យ៉ាងឈ្មោះថា Cortisol។ ហេតុនេះហើយ បើអ្នកចង់ដឹងច្បាស់ ចូលគេងពីព្រលប់ ឬគេងឱ្យគ្រប់ម៉ោងតាមដែលរាងកាយត្រូវការ អ្នកនឹងបាត់អារម្មណ៍ស្ត្រេសនេះវិញជាមិនខាន។
៣. បញ្ញាចុះខ្សោយ គិតអីក៏មិនសូវចេញ
ការសិក្សាផ្នែកវេជ្ជសាស្ត្របានឱ្យដឹងថា ភាពរស់រវើក និងសមត្ថភាពការគិតរបស់ខួរក្បាលត្រូវរក្សាទុកព័ត៌មាន និងការចងចាំឡើងវិញក្នុងអំឡុងពេលរាងកាយសម្រាក។ ហេតុនេះហើយ បើអ្នកជាទីទុយពេលរាត្រី ចូលគេងយប់ជ្រៅ ឬគេងមិនគ្រប់ចំនួន ខួរក្បាលរបស់អ្នកនឹងចុះខ្សោយទៅតាមនោះ ពិបាកផ្ចង់អារម្មណ៍ធ្វើការអ្វីមួយឱ្យបានល្អណាស់។
៤. ឆាប់ខឹងឆេវឆាវ
នេះជាភ័ស្តុតាងបញ្ជាក់ថា ភាពនឿយហត់អស់កម្លាំងនឹងធ្វើឱ្យអ្នកទៅជាឆេវឆាវ មួម៉ៅបានដោយងាយ។ វាផ្សារភ្ជាប់ទៅនឹងចំណុចខាងលើ កាលណាខួរក្បាលមានការចុះខ្សោយការគិត វានឹងធ្វើឱ្យអ្នកមិនអាចសម្រេចអ្វីបានល្អ អារម្មណ៍ក៏មិននឹងនរ ទើបប្រែជាឆាប់ឆេវឆាវ ឆាប់ខឹងបែបនេះ។ ផ្ទុយទៅវិញ កាលណារាងកាយបានសម្រាកគ្រប់គ្រាន់ អរម៉ូនល្អៗក៏ត្រូវបានបញ្ចេញមកក្នុងរាងកាយបានគ្រប់គ្រាន់ អារម្មណ៍របស់អ្នកក៏នឹងប្រែទៅជាល្អដូចគ្នាដែរ។
៥. ភ្នែកឧស្សាហ៍ញាក់ព្រើតៗ
មិនមែនញាក់ភ្នែកព្រោះហេងឬស៊យតាមប្រផ្នូលឡើយ។ តែនេះជាការញាក់ ព្រោះតែភ្នែករបស់អ្នកមិនបានសម្រាកគ្រប់គ្រាន់។ ក្រៅពីរឿងញាក់ភ្នែកនេះ អ្នកក៏មានអារម្មណ៍ថាក្រហាយភ្នែក ក្ដៅភាយៗ ឬបើកភ្នែកស្ទើរតែមិនរួចក៏មាន។
៦. បាត់បង់ចំណង់ផ្លូវភេទ
អាចចំណាំមើលចុះ អ្នកដែលនៅដល់យប់ជ្រៅយូរពេក អារម្មណ៍ពុះកញ្ជ្រោលផ្នែកផ្លូវភេទក៏ត្រូវចុះខ្សោយទៅតាមនោះដែរ ព្រោះតែរាងកាយមានតែភាពនឿយហត់ ទើបគ្មានការបង្កើតអរម៉ូនផ្លូវភេទ។ ដូច្នេះសម្រាប់អ្នកមានជីវិតស្នេហាអាចនឹងប៉ះពាល់ដល់ចំណងមេត្រីលើគ្រែ ដោយសារតែការគេងមិនបានគ្រប់គ្រាន់នេះក៏ថាបាន។
៧. កើតមុនមិនឈប់
ស្រីៗមួយចំនួនចេះតែឆ្ងល់ថា ហេតុអីមុខរបស់ខ្លួនចេះតែឡើងមុនមិនឈប់ ហើយជាមុនប្រភេទធំៗទៀតផង ទោះព្យាបាលដោយថ្នាំ ឬគ្រឿងសម្អាងអ្វីក៏មិនបាត់។ ចម្លើយអាចនៅក្នុងអត្ថបទនេះ។ កាលណារាងកាយមិនបានសម្រាកគ្រប់គ្រាន់ កម្រិតអរម៉ូនស្ត្រេសក៏បញ្ចេញមកកាន់តែច្រើន ដែលជាអ្នករារាំងការវិវត្តរបស់ស្បែក បង្កឱ្យកើតមុន ស្បែកឡើងស្ងួត បាត់បង់ជាតិសំណើមជាដើម។
៨. មើលទៅចាស់ជាងវ័យ
អាចប្រៀបធៀបរវាងមនុស្សដែលចូលគេងពីព្រលប់ និងអ្នកដែលចូលចិត្តនៅយប់ជ្រៅ ពួកគេទោះបីអាយុស្របាលគ្នាក៏មើលទៅឃើញខុសគ្នាដែរ។ នៅពេលអរម៉ូន Cortisol ត្រូវបានបញ្ចេញមកក្នុងរាងកាយកាន់តែច្រើន វានឹងចូលទៅកាត់បន្ថយកម្រិតខូឡាជេនដែលជាប្រូតេអ៊ីនសំខាន់ក្នុងការធ្វើឱ្យស្បែករលោង ម៉ត់ និងតឹងណែន។ ហេតុនេះហើយទើបស្បែកអ្នកនឹងប្រែជាជ្រីវជ្រួញ មានស្នាមអុជខ្មៅ និងបណ្ដាលឱ្យមើលទៅឃើញចាស់ជាងវ័យ។
៩. អាចកើតជំងឺផ្លូវចិត្ត
អ្នកស្រាវជ្រាវជាច្រើនបានអះអាងថា ការគេងនិងជំងឺផ្លូវចិត្តមានទំនាក់ទំនងគ្នាទៅវិញទៅមក។ អ្នកជំនាញសុខភាពក៏បានលើកឡើងថា អ្នកដែលគេងមិនសូវបានគ្រប់គ្រាន់ទំនងអាចទទួលរងជំងឺផ្លូវចិត្តធ្ងន់ធ្ងរជាងមនុស្សធម្មតា ព្រោះតែហេតុផលដ៏អវិជ្ជមានដូចបានរៀបរាប់ខាងលើ៕
ចុចអាន៖ អាហារនាំឲ្យកើតមហារីក ១០ មុខ ដែលអ្នកញ៉ាំចូលពោះស្ទើររាល់ថ្ងៃដោយមិនដឹងខ្លួន