អ្នកចូលចិត្តសាកថ្មទូរសព្ទដាក់លើពូក ប្រយ័ត្នឆេះខ្ទេចដូចនារីម្នាក់នេះ

2017-07-31 02:15:52
ចំនួនមតិ 0 | ចំនួនចែករំលែក 0

នាយកដ្ឋានអគ្គិភ័យក្នុងក្រុង Newton សហរដ្ឋអាមេរិកបានឱ្យដឹងថា តាមការស្រាវជ្រាវមានយុវវ័យ និងអ្នកប្រើប្រាស់ស្មាតហ្វូនប្រមាណ៥៣% ដែលចូលចិត្តយកទូរសព្ទតាមខ្លួនដល់លើគ្រែ ជាពិសេសមុនពេលគេង ឬអ្នកខ្លះដាក់វាចោលក្រោមខ្នើយជាដើម។

ក្រៅពីនេះ នៅមានអ្នកខ្លះសាកថ្មទូរសព្ទដល់លើគ្រែ ទុកចោលរហូតដល់ភ្លឺក៏មាន ដែលនេះជាហេតុបណ្ដាលឱ្យមានគ្រោះថ្នាក់ដល់សុខភាពផង និងដល់រាងកាយខាងក្រៅផង។ តាមរយៈ Post មួយនោះលើហ្វេសប៊ុករបស់នាយកដ្ឋានខាងលើ បានព្រមានដល់អ្នកដែលចូលចិត្តធ្វើទង្វើខាងលើនេះ ឱ្យគិតគូរឡើងវិញពីសុវត្ថិភាព ព្រោះការសាកថ្មដាក់លើពូក ឬដាក់ក្រោមខ្នើយ ឬអ្នកខ្លះសាកថ្មបណ្ដើរស្ដាប់ចម្រៀង ឬប្រើប្រាស់បណ្ដើរ វាអាចបណ្ដាលឱ្យទូរសព្ទនិងខ្សែសាកឡើងក្ដៅ បង្កជាអគ្គិភ័យបាន។

មានករណីជាក់ស្ដែងមួយកាលពីពេលថ្មីៗនេះ នារីម្នាក់បានសាកថ្មទូរសព្ទដាក់លើពូក ហើយក៏បង្កជាភ្លើងឆេះបន្ទប់គេងខ្ទេចគ្មានសល់។ ក្រៅពីការព្រមានពីគ្រោះថ្នាក់ដោយអគ្គិភ័យ ក៏មានការផ្សព្វផ្សាយពីគ្រោះថ្នាក់ដោយជាតិវិទ្យុសកម្មរបស់ទូរសព្ទដែលអាចប៉ះពាល់ប្រព័ន្ធប្រសាទ និងខួរក្បាលទៀតផង។ ប៉ុន្តែទោះបីមានអ្នកដឹងពីគ្រោះថ្នាក់យ៉ាងណាក្ដី តែចំនួននៃការយកទូរសព្ទតាមខ្លួននៅពេលចូលគេង នៅតែមានចំនួនស្ទើរតែដដែល៕