ឈ្វេងយល់ពីរោគសញ្ញាបង្កនៃ ជំងឺបាក់ស្បាត

2024-02-19 01:52:15
ចំនួនមតិ 0 | ចំនួនចែករំលែក 0

ការថែទាំសុខភាពរាងកាយជារឿងសំខាន់មួយសម្រាប់មនុស្សគ្រប់គ្នាទាំងការទទួលទាន ការរស់នៅប្រកបដោយអនាម័យនិងការប្រុងប្រយ័ត្ននៅការឆ្លងពីបរិយាកាសជុំវិញផងដែរដើម្បីទទួលបាននូវសុខភាពល្អគ្មានជំងឺឆ្លងនិងរោគប្រចាំកាយ។ ដោយឡែកបើទោះរាងកាយមានសុខភាពល្អយ៉ាងណាក៏ដោយប្រសិនបើអ្នកព្រងើយកន្តើយក្នុងការថែទាំសុខភាពផ្លូវចិត្តគឺមានការប៉ះពាល់ខ្លាំងដល់ការរស់នៅប្រចាំថ្ងៃដែលរំខានដល់ការរស់នៅរបស់អ្នកបន្តិចម្តងៗរហូតឈានដល់បញ្ហាធ្ងន់ធ្ងរដល់អាយុជីវិតបើមិនទទួលការព្យាបាលទានពេលវេលា។

បញ្ហាផ្លូវចិត្តមានច្រើនប្រភេទហើយការចាប់ផ្តើមមានរោគបង្កខុសៗគ្នា ដូចជាសញ្ញាបង្កមួយគឺជំងឺបាក់ស្បាត។ ចំពោះបុគ្គលដែលមានសញ្ញាបង្ហាញបែបនេះ អាចជា ជំងឺបាក់ស្បាត ហើយជំងឺនេះបានលេចចេញនូវរោគសញ្ញាបង្ហាញលើផ្លូវកាយ និងបង្ហាញលើផ្លូវចិត្ដដែលអ្នកជំនាញប្រឹក្សាបញ្ហាផ្លូវចិត្តរបស់ គ្លីនិកវីឃែរបញ្ជាក់ឲ្យក្រុមគ្រួសាររបស់អ្នកជំងឺក៏ដូចជាអ្នកជំងឺឈ្វេងយល់ពីអាការៈនិងរោគសញ្ញាគួរកត់សំគាល់ខាងក្រោមគឺ ៖

១-រោគសញ្ញាបង្ហាញផ្លូវចិត្ដ ៖ ឆាប់ភ័យ ឆាប់រន្ធត់តក់ស្លុតធ្លាប់ជាមនុស្សដែលមានភាពចងចាំល្អបែរជាមនុស្សឆាប់វង្វេង វង្វាន់ ឆាប់ភ្លេច ឆាប់ភ្ញាក់ផ្អើល ឆាប់មួម៉ៅឡេះឡះ ផ្លាស់ប្ដូរអាកប្បកិរិយាពីសុភាពរាបសាទៅជាឆេវឆាវឆាប់ខឹង មានអារម្មណ៍ស្ពឹកខ្លួន ដូចជាពិការមួយចំហៀងខ្លួន មានអារម្មណ៍ទុក្ខសោក ចេះតែកើតទុក្ខដេកស្រមៃឃើញរូបភាព ឬព្រឹត្ដិការណ៍អាក្រក់នោះស្រស់ៗនៅនឹងមុខធ្វើឱ្យមានការភ័យខ្លាចមួយរំពេច ។

២-រោគសញ្ញាបង្ហាញផ្លូវកាយ ៖ ញ័រដើមទ្រូង ញ័រដៃជើង អស់កម្លាំងល្ហិតល្ហៃ ស្រវាំងភ្នែកមើលអ្វីឃើញមិនច្បាស់(ព្រាល)វិលមុខ គេងមិនលក់ ចេះតែធីងធោងរសាប់រសល់ បែកញើសពេញខ្លួន ត្រជាក់ចុងដៃចុងជើង ឆ្អល់ពោះ ហូបអ្វីមិនបាន ឈឺក្បាល ចុកចាប់ពេញរាងកាយ និងធ្វើឱ្យអ្នកជំងឺអាចក្អួតចង្អោរជាដើម ។

៣-ការជួបនូវហេតុការណ៍ធំៗដែលនាំឱ្យមានភាពតក់ស្លុតបង្កឱ្យមានជំងឺបាក់ស្បាត។ សូមកុំបណ្ដែតបណ្ដោយនិងចេះតែសម្ងំ បៀមទុក្ខរឿងអាក្រក់ទាំងនោះតែម្នាក់ឯង ព្រោះអាចឱ្យមានជំងឺផ្លូវចិត្ដឬកើតវិបត្តិផ្លូវចិត្តធ្ងន់ធ្ងរ ។

លោកអ្នកគួរប្រាប់ទៅមិត្ដ ឬអ្នកជាទីស្រឡាញ់ ឬក៏អ្នកជំនាញណាមួយ ដែលគិតថាទទួលបានយោបល់ផ្ដល់ជាដំនោះស្រាយ ចំពោះលោកអ្នកដើម្បីរំសាយរូបភាពខ្មៅងងឹតនោះបន្ដិចម្ដងៗកុំឱ្យដក់ជាប់ក្នុងអារម្មណ៍តទៅទៀត។

៤-សូមស្វះស្វែងរកការព្យាបាលជាមួយអ្នកជំនាញ ដើម្បីវាយតម្លៃស្ថានភាពរោគសញ្ញាឲ្យបានទាន់ពេល។ ការព្យាបាលមួយដែលមានការវាយតម្លៃត្រឹមត្រូវច្បាស់លាស់ដោយអ្នកជំនាញ នោះធ្វើឲ្យអ្នកជំងឺឆាប់ធូរស្បើយឡើងវិញ និង អាចជៀសផុតពីបញ្ហាធ្ងន់ធ្ងរផងដែរ៕

ប្រភព៖ WCMC

អត្ថបទ៖ សិរីរត្នន៍