រលាកក្រពះ ទុកមិនព្យាបាលត្រឹមត្រូវអាចបង្កជាបញ្ហាធ្ងន់ធ្ងរ

2023-09-13 01:21:19
ចំនួនមតិ 0 | ចំនួនចែករំលែក 0

រលាកក្រពះ គឺសម្ដៅដល់ការរលាកស្រទាប់ខាងក្នុងរបស់ក្រពះ ហើយការរលាកនេះអាចបណ្ដាលមកពីឆ្លងបាក់តេរី ដែលបាក់តេរីនេះដូចគ្នាទៅនឹងបាក់តេរីបង្កជំងឺដំបៅក្រពះ។ ការផឹកគ្រឿងស្រវឹង ក៏អាចធ្វើឲ្យមានបញ្ហារលាកក្រពះនេះដែរ។

បញ្ហារលាកក្រពះ អាចជាបញ្ហាស្រួចស្រាល់ ឬបញ្ហារ៉ាំរ៉ៃ។ ក្នុងករណីខ្លះបញ្ហារលាកក្រពះអាចនាំឲ្យក្លាយជាដំបៅក្រពះ និងអាចនាំឲ្យមានហានិភ័យកើតជំងឺមហារីកក្រពះផងដែរ បើសិនជាមិនបានព្យាបាលត្រឹមត្រូវ។ យ៉ាងណា មនុស្សភាគច្រើន បញ្ហារលាកក្រពះមិនមានជារឿងធ្ងន់ធ្ងរទេ និងអាចបានធូរស្បើយវិញលឿន ក្រោយបានទទួលការព្យាបាលត្រឹមត្រូវ។

រោគសញ្ញាជំងឺរលាកក្រពះ

សញ្ញា និងរោគសញ្ញាជំងឺរលាកក្រពះមានដូចជា៖

ក្រហាយ ឬឈឺក្នុងពោះផ្នែកខាងលើ ដែលពេលខ្លះអាចធ្វើទុក្ខក្រោយញ៉ាំអាហារ ឬក៏អាចធូរស្បើយក្រោយញ៉ាំអាហារ
ចង្អោរ
ក្អួត
មានអារម្មណ៍ថាតឹងពោះផ្នែកខាងលើក្រោយញ៉ាំអាហាររួច ពេលខ្លះជំងឺរលាកក្រពះ ក៏មិនបង្ហាញសញ្ញា ឬរោគសញ្ញាដែរ។

ពេលណាគួរប្រឹក្សាជាមួយគ្រូពេទ្យ?

មនុស្សភាគច្រើនអាចជួបបញ្ហាមិនស្រួលក្នុងពោះ ឬមានបញ្ហាក្រពះខ្លះៗ ហើយករណីភាគច្រើនកើតមានក្នុងរយៈពេលខ្លី និងមិនត្រូវការការព្យាបាលនោះទេ។ ប៉ុន្តែបើសិនជាយើងមានសញ្ញា ឬរោគសញ្ញាទាក់ទងនឹងបញ្ហារលាកក្រពះ ដូចបានរៀបរាប់ខាងលើចាប់ពីមួយសប្ដាហ៍ ឬលើសនេះ គួរតែប្រឹក្សាជាមួយគ្រូពេទ្យហើយ។

មួយវិញទៀត បើសិនជាយើងមានអាការៈឈឺចាប់ខ្លាំង គឺត្រូវទៅជួបគ្រូពេទ្យភ្លាមៗ ក៏ដូចជាមានអាការៈក្អួត ចង្អោរ ឬធេងធោង វិលមុខជាដើម។ យើងក៏គួរប្រាប់គ្រូពេទ្យដែរថាយើងមានបញ្ហាក្រពះនេះក្រោយពេលញ៉ាំថ្នាំណាមួយឬអត់ ពិសេសថ្នាំបំបាត់ការឈឺចាប់។

ដូចគ្នាដែរ បើយើងក្អួតមានឈាម មានឈាមក្នុងលាមក ឬលាមកប្រែជាក្រមៅ គឺពិតណាស់ត្រូវតែស្វែងរកការពិគ្រោះ និងព្យាបាលភ្លាមៗដែរ។

កត្តាប្រឈមមួយចំនួនអាចនាំឲ្យកើតបញ្ហានេះ

ឆ្លងបាក់តេរី៖ ទោះបីជាការឆ្លងបាក់តេរីប្រភេទ Helicobacter pylori គឺជារឿងទូទៅមួយនៅលើពិភពលោក ប៉ុន្តែមានមនុស្សមួយចំនួនការឆ្លងបាក់តេរីនេះអាចនាំឲ្យមានបញ្ហារលាកក្រពះ។ គ្រូពេទ្យជឿថាបញ្ហានេះអាចមកពីតំណពូជ ឬមកពីបែបបទនៃការស់នៅដូចញ៉ាំអាហារមិនល្អ និងជក់បារី។

ប្រើប្រាស់ថ្នាំបំបាត់ការឈឺចាប់ជាប្រចាំ៖ ការប្រើប្រាស់ថ្នាំបំបាត់ការឈឺចាប់ច្រើន ឬញឹកញាប់អាចនាំឲ្យមានបញ្ហារលាកក្រពះស្រួចស្រាល់ ឬរ៉ាំរ៉ៃបាន។

កត្តាវ័យ៖ មនុស្សវ័យចំណាស់មានហានិភ័យខ្ពស់ក្នុងការរលាកក្រពះ ព្រោះថាស្រទាប់ក្នុងរបស់ក្រពះក៏មានសភាពស្ដើងទៅតាមវ័យដែរ។ មួយវិញទៀតមនុស្សវ័យចំណាស់ក៏ទំនងជាងាយឆ្លងបាក់តេរី Helicobacter pylori ជាងមនុស្សវ័យក្មេងដែរ។

ផឹកគ្រឿងស្រវឹងច្រើន៖ គ្រឿងស្រវឹងធ្វើឲ្យក្រពះមានបញ្ហា និងអាចធ្វើឲ្យសឹកស្រទាប់ខាងក្នុងរបស់ក្រពះ ដែលអាចធ្វើឲ្យក្រពះងាយរងគ្រោះពីអាស៊ីតក្រពះ។ ផឹកគ្រឿងស្រវឹងច្រើនអាចមានលទ្ធភាពច្រើនក្នុងការកើតបញ្ហារលាកក្រពះស្រួចស្រាល់។

ប្រភព៖ mayoclinic | Cleveland Clinic អត្ថបទ៖ ទូច សុខា