Spider Man: No Way Home រកចំណូលបានជាង១ពាន់លានដុល្លារ បំបែកកំណត់ត្រាប្រវត្តិសាស្ត្រ

2022-01-05 02:30:00
ចំនួនមតិ 0 | ចំនួនចែករំលែក 0

កំពូលខ្សែភាពយន្តពីមនុស្សពីងពាង Spider Man: No Way Home រកចំណូលសរុបបាន ១.៣៧ពាន់លានដុល្លារ ហើយនៅតែបន្តរកបានចំណូលយ៉ាងច្រើន។

កាលពីថ្ងៃទី ៣ ខែមករាកន្លងទៅនេះ បណ្ដាញព័ត៌មាន Variety បានរាយការណ៍ថា ឱកាសកាលពីចុងសប្ដាហ៍មុននេះ ខ្សែភាពយន្ត Spider Man: No Way Home នៅតែឈរលំដាប់លេខ១សម្រាប់រឿងដែលមានចំណូលចាក់បញ្ចាំងខ្ពស់ជាងគេ ដោយគិតត្រឹមតែទីផ្សារអាមេរិក គឺរឿងនេះរកចំណូលសរុបបានដល់ទៅ ៦០៩លានដុល្លារ។

ជាមួយជោគជ័យខាងលើ ស្នាដៃមួយនេះមានវត្តមាននៅក្នុងចំណោមរឿងទាំង១០រកចំណូលបានច្រើនជាងគេក្នុងប្រវត្តិសាស្ត្រអាមេរិក។ រីឯចំណូល ១.៣៧ពាន់លានដុល្លារ បានធ្វើឲ្យរឿងនេះជាប់លេខទី១២ លើពិភពលោក។

ជាមួយថវិការរកបានជាងមួយពាន់លានដុល្លារបែបនេះ ភាគថ្មីនៃខ្សែភាពយន្តខាងលើ ក៏ក្លាយទៅជាភាគដែលរកបានចំណូលខ្ពស់ជាងគេបំផុតក្នុងប្រវត្តិសាស្ត្រចាប់ពីពេលរឿងមនុស្សពីងពាងចេញផ្សាយដំបូងផងដែរ។ Variety ឲ្យដឹងថាចំណូលរបស់ Spider Man បានជួយឲ្យវិស័យភាពយន្តហូលីវូដភ្លឺស្វាងឡើងវិញ ក្រោយមួយឆ្នាំត្រូវងងឹតដោយសារតែវិបត្តិកូវីដ ១៩៕

ប្រភព៖ news.zing.vn ប្រែសម្រួល៖ Caramel