ទោះ​បី​ជា​មាន​វ័យ​នៅ​ក្មេង​ខ្លាំង​ក៏​ដោយ តែ​កូន​ស្រី​របស់​កំពូល​តារា​ចម្រៀង​ស្រី​អាមេរិក Beyoncé រក​លុយ​បាន​ពី​វិស័យ​ច្រើន​ប្រភេទ។

កាល​ពី​ថ្ងៃ​ទី ៣០​ ខែ​តុលា​កន្លង​ទៅ​នេះ បណ្ដាញ​ព័ត៌មាន Daily Mail បាន​​រាយការណ៍​ថា កាល​ពី​ឆ្នាំ ២០១៩ ទស្សនាវដ្ដី Forbes បាន​ទទួល​​ស្គាល់​ថា តារា​ចម្រៀង​រ៉េប​អាមេរិក Jay-Z គឺ​ជា​មហាសេដ្ឋី​ពាន់​លាន​ដុល្លារ ដោយ​ទ្រព្យ​របស់​លោក​សរុប​គឺ ១.៣​ពាន់​លាន​ដុល្លារ។

យ៉ាងណាក្ដី ទោះ​បី​ជា​មាន​ឪពុក​ម្ដាយ​ជា​មហាសេដ្ឋី​ក៏​ដោយ តែ​កូន​ស្រី​របស់​តារា​ចម្រៀង Beyoncé មិន​ចាំ​បាច់​ពឹង​ទ្រព្យ​របស់​អ្នក​ទាំង​២​ក៏​មាន​ចំណូល​រាប់​រយ​លាន​ដោយ​ខ្លួន​ឯង​​ដែរ។ តាម​នោះ​ដែរ កូន​ស្រី​អាយុ​៩​ឆ្នាំ ឈ្មោះ Blue Ivy Carter មាន​ទ្រព្យ​ប្រមាណ​៥០០​លាន​ដុល្លារ យោង​តាម​បណ្ដាញ​ព័ត៌មាន South China Morning Post។

តាម​នោះ​ដែរ ក្នុង​ឆ្នាំ​២០១៧ Blue Ivy បាន​មាន​វត្តមាន​ក្នុង​អាល់ប៊ុម​ចម្រៀង  4:44 របស់​ឪពុក​ខ្លួន ហើយ​ទទួល​បាន​តម្លៃ​ខ្លួន​សិទ្ធិ​បញ្ញា​ពី​អាល់ប៊ុម​នេះ​យ៉ាង​ច្រើន។ ឆ្នាំ ២០១៩ កុមារី​អាយុ ៩​ឆ្នាំ​ក៏​ចូល​រួម​ក្នុង​បទ​ចម្រៀង​ Brown Skin Girl ដែល​ជា​បទ​ចម្រៀង​នៃ​រឿង The Lion King: The Gift។ South China Morning Post បាន​ឲ្យ​ដឹង​ថា ចម្រៀង​របស់ Ivy ទទួល​បាន​តម្លៃ​សិទ្ធិ​បញ្ញា​ខ្ពស់​បំផុត ដែល​ធ្វើ​ឲ្យ​នាង​​រក​បាន​ចំណូល​ពី​ប្រភព​នេះ​ខ្ពស់ ទោះ​​មិន​ទាន់​មាន​បទ​ចម្រៀង​ច្រើន​ក៏​ដោយ។

ក្រៅ​ពី​ចម្រៀង កុមារី​កើត​ឆ្នាំ​២០១២ ក៏​រក​បាន​ចំណូល​ខ្ពស់​កប់​ពពក​ពី​ការ​ផ្សាយ​ពាណិជ្ជកម្ម​រួម​ជាមួយ​ម្ដាយ ក៏​ដូច​ពាណិជ្ជកម្ម​ទោល​របស់​ខ្លួន​ឯង​ផង​ដែរ៕