តារាប្រុសស្រីជប៉ុនបង្កចម្រូងចម្រាស់ព្រោះឡើងក្លាយជាឪពុកម្ដាយគេនៅវ័យ ១៦ឆ្នាំ

2020-05-12 04:30:00
ចំនួនមតិ 0 | ចំនួនចែករំលែក 0

ព័ត៌មានតារាប្រុសស្រីជប៉ុន មិនទាន់ដល់អាយុពេញវ័យមួយគូ តែក្លាយបានមានកូនហើយ បានធ្វើឲ្យប្រជាជនប្រទេសជ្រួលច្របល់ជាខ្លាំង។ មិនថាជារឿងមង្គលការ ឬមានផ្ទៃពោះនោះទេ រឿងទាំង២នេះសុទ្ធតែជារឿងធំដែលទាមទារការពិចារណាច្បាស់លាស់។ ជាពិសេសគឺរឿងពពោះ ត្បិតវាមិនត្រឹមតែពាក់ព័ន្ធនឹងម្ចាស់សមីខ្លួនផ្ទាល់នោះទេ វាក៏ប៉ះពាល់ដល់អនាគតដល់កូនក្នុងផ្ទៃផងដែរ ប្រសិនបើអ្នកពពោះគ្មានទំនួលខុសត្រូវ។ ជាក់ស្ដែង ទោះបីជាមានវ័យជ្រេម្ភៃក្រាស់ ចូលសាមសិបហើយក្ដី គូស្វាមីភរិយាមួយចំនួននៅតែមិនទាន់ហ៊ានយកកូន ត្បិតខ្លាចមិនទាន់ជ្រមជ្រែងរួច។

ផ្ទុយមកវិញ គូស្នេហ៍ជប៉ុនមួយគូទើបរៀនថ្នាក់វិទ្យាល័យបែរជាឡើងតំណែងជាឪពុកម្ដាយគេទៅហើយ។ នោះគឺគូស្នេហ៍តារាជប៉ុន ដែលឪពុកគឺប្រុសស្អាត Maeda Shun អាយុ ១៧ឆ្នាំ និងមិត្តស្រី Shigekawa Maya អាយុ ១៦ឆ្នាំ។ គូស្នេហ៍មួយគូនេះ គឺសុទ្ធតែជាតារាទូរទស្សន៍វ័យក្មេងរបស់ជប៉ុនទាំងអស់។

ក្មេងៗទាំង២នាក់នេះ ជួបគ្នាដំបូងតាមរយៈកម្មវិធី Kyou, Suki ni Narimashita បន្ទាប់មកក៏ស្រលាញ់គ្នាតែម្ដង។ ក្រោយស្រលាញ់គ្នាតែមួយឆ្នាំ ស្រាប់តែខាងស្រីបង្ហោះលើបណ្ដាញសង្គមនូវរូបភាពឆ្លុះអេកូរបស់ខ្លួន។ ហើយអ្វីដែលភ្ញាក់ផ្អើលនោះគឺ ទោះទើបស្រលាញ់គ្នាតែ ១ឆ្នាំ តែស្រីស្អាតនេះបានពពោះ ៨ខែមកហើយ។ ទោះបីជាមានផ្ទៃពោះហើយក្ដី តែតាមច្បាប់ជប៉ុន ទាល់តែខាងប្រុសអាយុគ្រប់១៨ឆ្នាំ ទើបពួកគេអាចចុះឈ្មោះអាពាហ៍ពិពាហ៍បាន មានន័យថា ពួកគេត្រូវរង់ចាំមួយឆ្នាំទៀត។

ទស្សនិជនបានលាន់មាត់ថា តារាវ័យក្មេងទាំង២នេះ ក្លាហានណាស់ ត្បិតពួកគេអាយុក្រៅសាមសិបហើយក្ដី ក៏ពួកគេមិនទាន់ហ៊ានគិតដល់ការមានកូនផង។ ហើយពួកគេមានចម្ងល់ថា បើឪពុកម្ដាយរៀនវិទ្យាល័យបែបនេះ កើតមកតើកូននេះអ្នកណាមើល៕