ល្អហួសស្មាន! ផឹកតែអាចជួយការពារការកើតជំងឺបេះដូង និង ការដាច់សរសៃឈាមខួរក្បាល

2020-01-20 03:50:00
ចំនួនមតិ 0 | ចំនួនចែករំលែក 0

តើអ្នកជាម្នាក់ក្នុងចំណោមអ្នកចូលចិត្តពិសារទឹកតែដែរឬទេ? បើអ្នកជាម្នាក់ក្នុងចំណោមនោះ អ្នកនឹងរីករាយនឹងអត្ថប្រយោជន៍ក៏អស្ចារ្យរបស់ទឹកតែជាមិនខាន។ ការស្រាវជ្រាវថ្មីមួយបានបង្ហាញថា សរសៃឈាមបេះដូងរបស់អ្នកដែលផឹកតែលើសពី ៣ដងក្នុងមួយសប្តាហ៍មានសភាពល្អប្រសើរគួរឱ្យកត់សម្គាល់។

បើតាមអ្នកជំនាញ អត្ថប្រយោជន៍ដ៏ល្អគាប់ចិត្តនៅក្នុងតែ គឺបណ្តាលមកពីឥទ្ធិពលនៃប៉ូលីហ្វេណុលដែលមានផ្ទុកនៅក្នុងតែបៃតង និង តែខ្មៅ។

តែបៃតង

តែខ្មៅ

ប៉ូលីហ្វេណុល (Polyphenol) ត្រូវបានបញ្ចេញតាមរុក្ខជាតិ ជាពិសេសរុក្ខជាតិមានផ្កា។ សារជាតិ ប៉ូលីហ្វេណុលនេះផងដែរត្រូវបានគេរកឃើញថាវាជាផ្នែកមួយក៏សំខាន់ដែលជួយសម្រួលដល់សរសៃឈាមក្នុងបេះដូងដូចជា ជួយសម្រួលដល់ចរន្តឈាម និង ទប់ស្កាត់ការរួមតូច និង តឹងណែនរបស់សរសៃឈាម។ មិនត្រឹមតែប៉ុណ្ណោះ វាជួយបង្កើននូវជាតិកូលេស្តេរ៉ុលល្អនៅក្នុងរាងកាយ ដែលមានតួនាទីយ៉ាងសំខាន់ក្នុងការការពារបេះដួង ព្រមទាំងមានតួនាទីជួយកាត់បន្ថយនូវការរលាក និង ធ្វើឱ្យប្លាកែត និង កត្តាកំណកឈាមក្នុងរាងកាយមានសភាពរាវ មិន សូវស្អិត ដែលជួយសម្រួលដល់ដំណើរការនៃចរន្តឈាមក្នុងរាងកាយទាំងមួល។

យ៉ាងណាមិញ អ្នកជំនាញក៏បានបញ្ជាក់ដែរថាសារជាតិនេះមិនស្ថិតនៅក្នុងរាងកាយរយៈពេលយូរនោះឡើយ។ ដូច្នេះ បើចង់ឃើញប្រសិទ្ធភាព អ្នកគួរពិសារតែជាប់ជាទម្លាប់។

តើតែបៃតង និង តែខ្មៅ មួយណាមានអត្ថប្រយោជន៍ជាង?

តែខ្មៅទឹកដោះគោ

បើយោងតាមការស្រាវជ្រាវ តែទាំងពីរប្រភេទសុទ្ធតែមានផ្ទុកនូវសារជាតិ ប៉ូលីហ្វេណុល ប៉ុន្តែគ្រាន់តែគេឧស្សាហ៍ឃើញប្រសិទ្ធភាពរបស់វានៅក្នុងតែបៃតងច្រើនជាង។ នេះអាចបណ្តាលមកពី កត្តានៃការចម្រាញ់តែបៃតងដែលអាចធ្វើឱ្យកាត់បន្ថយនូវឥទ្ធិពលនៃសារជាតិ ប៉ូលីហ្វេណុល (Polyphenol) ខ្លះជាពិសេសព្រោះ តែខ្មៅច្រើនត្រូវបានគេពិសារដោយបន្ថែមនូវជាតិទឹកដោះគោ និង រូបមន្តផ្សេងៗទៀត។ ការស្រាវជ្រាវ បានបង្ហាញថា ៤៩% នៃអ្នកផឹកតែជាប្រចាំគឺចូលចិត្តតែបៃតង ឯសម្រាប់តែខ្មៅគឺមានត្រឹម ៨% តែប៉ុណ្ណោះ។