ត្រៀមៗ! វេទិកាអប់រំបើកសេរី សម្រាប់អ្នកចង់ទៅរៀននៅអាមេរិក

2019-09-17 07:51:36
ចំនួនមតិ 0 | ចំនួនចែករំលែក 0

វេទិកាថ្នាក់តំបន់លើកដំបូងស្ដីពីការអប់រំ នឹងរៀបចំពិព័រណ៍ថ្នាក់ឧត្ដមសិក្សានៅសហរដ្ឋអាមេរិក ក្នុងរាជធានីភ្នំពេញនាសប្តាហ៍នេះ។ នេះជាឱកាសល្អ សម្រាប់និស្សិតទាំងអស់ ពិសេសនិស្សិតស្រី ដែលមានបំណងសិក្សាបន្តអាចចូលរួមដោយសេរី ដើម្បីសាកសួរព័ត៌មាន ឬប្រឹក្សាយោបល់ជាមួយអ្នកជំនាញអប់រំ។ នេះបើតាមសេចក្ដីប្រកាសព័ត៌មានរបស់ស្ថានទូតសហរដ្ឋអាមេរិកប្រចាំនៅកម្ពុជា។

ការបើកពិធីពិព័រណ៍ថ្នាក់ឧត្ដមសិក្សានៅសហរដ្ឋអាមេរិក នឹងរៀបចំនៅឯសណ្ឋាគារសុខាភ្នំពេញ នៅថ្ងៃទី ២០ ខែកញ្ញា ឆ្នាំ២០១៩ វេលាម៉ោង ៨ ដល់ ម៉ោង ១១:៣០ ព្រឹក។

និស្សិតខ្មែរទាំងអស់ នឹងអាចជួបតំណាងមកពីសាកលវិទ្យាល័យ និងអ្នកអាជីពផ្នែកការអប់រំនៅអាមេរិក ដើម្បីសួរ ឬប្រឹក្សាយោបល់ផ្ទាល់ ពីព័ត៌មានថ្មីៗពេញលេញ និងត្រឹមត្រូវ ស្ដីពីឱកាសសិក្សាថ្នាក់ឧត្ដម នៅតាមស្ថាប័នឧត្ដមសិក្សាដែលមានការទទួលស្គាល់ នៅក្នុងសហរដ្ឋអាមេរិក។

សូមបញ្ជាក់ថា វេទិកានេះ នឹងបើកឱកាសឲ្យអ្នកចូលរួមសួរសំណួរជាមួយអ្នកប្រឹក្សាយោបល់ EducationUSA ដែលជាបណ្ដាញមួយ នៃក្រសួងការបរទេសសហរដ្ឋអាមេរិក ដែលមានមជ្ឈមណ្ឌលផ្ដល់ប្រឹក្សាដល់និស្សិតអន្តរជាតិចំនួន៤០០មជ្ឈមណ្ឌល នៅតាមប្រទេសជាង១៧០នៅលើពិភពលោក៕

ចុចអាន៖ ខុសពីឆ្នាំមុនៗដាច់! លំដាប់ពិន្ទុរបស់សិស្សបាក់ឌុបត្រូវចាំដល់ចេញវិញ្ញាបនបត្រ

អត្ថបទ៖ ពៅ រក្សា