ការសិក្សាថ្មី៖ ប្ដីប្រពន្ធចេះជួយលាងចានគ្នា ទើបស្នេហាគង់វង្សយូរអង្វែង

2018-07-10 07:27:00
ចំនួនមតិ 0 | ចំនួនចែករំលែក 0

បច្ចុប្បន្ននេះបុរសនិងស្រ្តីគឺសុទ្ធតែមានសិទ្ធិតម្លៃស្មើៗគ្នា អាចចេញទៅរកលុយខាងក្រៅទាំងពីរនាក់ ដែលធ្វើឲ្យពេលវេលាសម្រាប់ការងារផ្ទះក៏ត្រូវចំណាយស្ទើរតែអស់ជាមួយការងារខាងក្រៅ។ ភាគច្រើននៅពេលល្ងាច ចានឆ្នាំងប្រឡាក់នៅទាំងគៗ ហើយសម្រាប់ស្ត្រីដែលត្រូវធ្វើទាំងការងារក្នុងផ្ទះផង ការងារក្រៅផ្ទះផង ហើយត្រូវមើលថែកូនតូចៗទៀត គឺប្រាកដជាត្រូវនឿយហត់ អារម្មណ៍មិនល្អ ដែលចុងក្រោយគឺចៀសមិនផុតពីការឈ្លោះគ្នា។

ពាក់ព័ន្ធនឹងបញ្ហាការងារផ្ទះនេះដែរ ថ្មីៗនេះក្រុមប្រឹក្សាសុខុមាលភាពគ្រួសារនៃសហរដ្ឋអាមេរិក (Council of Contemporary Families) បានតាមដានសិក្សាពីទំនាក់ទំនងរវាងការធ្វើការងារផ្ទះ និងការបែកបាក់ស្នេហារបស់គូស្នេហ៍ដែលមានឋានៈមធ្យមៗ ដោយមើលលើការងារផ្ទះជាច្រើនប្រភេទដូចជា ការទិញអីវ៉ាន់ចូលផ្ទះ បោកខោអាវ អ៊ុតខោអាវ និងការសម្អាតផ្ទះ។

ការសិក្សាខាងលើនេះបានរកឃើញថាអ្នកដែលទទួលបន្ទុកការងារលាងចានភាគច្រើនគឺជាភាគីខាងស្រី ហើយបើពួកគេមិនទទួលបានការជួយសម្រាលពីខាងបុរសទេ ពួកគេនឹងមានអារម្មណ៍នឿយណាយក្នុងជីវិតគូ ព្រមទាំងរឿងលើគ្រែ រហូតអាចមានបញ្ហាឈ្លោះទាស់ទែងខ្លាំងៗទៀតផង។ ប្រៀបធៀបជាមួយស្រីៗដែលមានគូស្នេហ៍ខាងប្រុសចាំជួយឆ្លាស់គ្នាលាងចាន ក្រុមនេះគឺមានទំនាក់ទំនងស្នេហារលូនជាង ហើយខាងស្រីក៏មានចិត្តសប្បាយរីករាយខ្លាំង ដែលគូស្នេហ៍ហុចដៃជួយការងារនេះ។

ក្រៅពីនេះការសិក្សាខាងលើក៏បានរកឃើញបញ្ហាគួរឲ្យកត់សម្គាល់មួយទៀតដែរលើមនុស្សស្រី នោះគឺមនុស្សស្រីច្រើនតែត្រូវរុញឲ្យធ្វើការងារផ្ទះដែលប្រឡូកប្រឡាក់ ដូចជា បោកខោអាវ លាងបង្គន់ និងលាងចាន ខណៈដែលប្រុសៗធ្វើការងារសប្បាយៗដូចជាកាត់ស្មៅ យកសំរាមចោល ឬការងារផ្សេងៗទៀតដែលមិនសូវជាប្រឡាក់ប្រឡូក។

បញ្ហាដែលមើលទៅជារឿងតូចតាចទាំងនេះ នឹងកើនឡើងបន្តិចម្ដងៗ រហូតធ្វើឲ្យមនុស្សស្រីមានអារម្មណ៍ថាខ្លួនប្រៀបដូចជាអ្នកបម្រើ រហូតអស់ការអត់ធ្មត់ក្នុងជីវិតគូ និងត្រូវបញ្ចប់ដោយការលែងលះនៅទីបំផុត។ ដូច្នេះហើយ គូស្នេហ៍ដែលចង់ឲ្យជីវិតគូរបស់ខ្លួនគង់វង្សយូរអង្វែង គួរតែចាប់ផ្ដើមចេញពីរឿងតូចៗដូចជាការជួយសម្រាលបន្ទុកការងារផ្ទះ ឆ្លាស់គ្នាធ្វើ ម្ដងម្នាក់ កុំប្រចាំមើលបំណាំគ្នា ទើបក្ដីស្រលាញ់ និងក្ដីសុខក្នុងជីវិតគូឆាប់កើតឡើង ៕

ចុចអាន៖

ប្រភព៖ Mthai ប្រែសម្រួល៖ ស្វាយ វ៉ាន់ថន