ចង់ដឹងថាគាត់ជាសុភាពបុរស ឆ្លាតវៃ រឹងមាំទាំងក្នុងទាំងក្រៅ ធ្វើតេស្ដលើរឿង ៣ យ៉ាងនេះ

2018-04-12 03:00:00
ចំនួនមតិ 0 | ចំនួនចែករំលែក 0

វាជារឿងទូទៅដែលនារីគ្រប់រូបតែងប្រាថ្នាចង់បានគូស្នេហ៍ជាសុភាពបុរសពិតៗ ពោរពេញទៅដោយភាពឆ្លាតវៃ និងរឹងមាំ។ ទោះជាយ៉ាងណា មិនមែនមនុស្សប្រុសគ្រប់គ្នាសុទ្ធតែមានគុណសម្បត្តិល្អៗបែបនេះទុកឲ្យអ្នកជ្រើសរើសទេ។ បុរសមួយចំនួនព្យាយាមបង្ហាញទង្វើល្អៗនៅចំពោះមុខ ក៏ព្រោះចង់បានក្ដីស្រឡាញ់ពីអ្នកឲ្យបានលឿនប៉ុណ្ណោះ។ ហេតុនេះដើម្បីកុំឲ្យរាប់អានចំមនុស្សខុស ប៉ះចំសុភាពបុរសក្លែងក្លាយ ស្រីៗត្រូវធ្វើតេស្ដ ឬសង្កេតរឿង ៣ យ៉ាងនេះសិន៖

១.ធ្វើដំណើរកម្សាន្តផ្លូវឆ្ងាយជាមួយគ្នា

ពេលខ្លះត្រឹមតែការនិយាយអួតសរសើរអំពីខ្លួនឯងនៅតុកាហ្វេ នរណាក៏ធ្វើបានដោយងាយដែរ។ ដូច្នេះអ្នកត្រូវសង្កេតដោយផ្អែកលើទង្វើជាក់ស្ដែងវិញម្ដង។ ពេលជួបហេតុការណ៍លំបាកៗដូចជា វង្វេងផ្លូវ បែកកង់ឡាន ការកក់បន្ទប់សណ្ឋាគារជួបបញ្ហាជាដើម តើគាត់នឹងដោះស្រាយដោយវិធីណា? តើគាត់មានភាពឆ្លាតវៃគ្រប់គ្រាន់ ធ្វើឲ្យអ្នកមានអារម្មណ៍កក់ក្ដៅ អាចពឹងពាក់ទុកចិត្តបាន ដូចអ្វីដែលអ្នករំពឹងចង់បានឬអត់?

២.សង្កេតទង្វើរបស់គាត់ចំពោះមនុស្សស្រីដទៃ

ទង្វើរបស់គាត់ចំពោះមនុស្សស្រីជុំវិញខ្លួន ពិតជាសំខាន់ខ្លាំងណាស់ សម្រាប់ការវិនិច្ឆ័យលើអត្តចរិតពិតប្រាកដរបស់គាត់។ អ្នកត្រូវតាមដានទាំងអស់តាំងពីមិត្តភ័ក្ដិរួមជំនាន់ ជីដូន ម្ដាយ អ៊ំស្រី ម្ដាយមីង ប្អូនស្រី ឬបងស្រីជាដើម។ តើគាត់តែងផ្ដល់ការគោរព ការពារ និងឲ្យតម្លៃអ្នកទាំងនោះខ្លាំងគ្រប់គ្រាន់ដែរឬទេ?

៣.ពេលគាត់ជួបបរាជ័យ

មនុស្សប្រុសដែលរឹងមាំ ត្រឹមត្រូវប្រកាន់សច្ចធម៌ គុណធម៌ពិតប្រាកដ មិនថាគាត់ជួយរឿងជោគជ័យ ឬបរាជ័យ នៅតែរក្សាគោលជំហរផ្ទាល់ខ្លួនបានល្អជានិច្ច។ ពេលសម្រេចបានលទ្ធផលល្អ គាត់ត្រេកអរ និងចែករំលែកផលប្រយោជន៍ដែលបានមកទៅមនុស្សបានជួយជ្រោមជ្រែង ចំណែកពេលជួបបរាជ័យ គាត់ក៏មិនបាក់ទឹកចិត្តខ្លាំង ឬទម្លាក់កំហុសដាក់អ្នកណាទាំងអស់។ ជារួម គាត់ជាបុរសរឹងមាំម្នាក់ ដែលអាចទទួលយកគ្រប់រសជាតិនៃជីវិត៕

ចុចអាន៖សំណួរ ៤ដែលអ្នកមិនគួរសួរទៅកាន់មិត្តប្រុស

ប្រភព៖ Likelovequotes អត្ថបទ៖ អូន បញ្ញា