សញ្ញា ៥ យ៉ាងបញ្ជាក់ថាទំនាក់ទំនងខ្ទេចខ្ទីមួយនេះ នៅមានឧកាសសង្គ្រោះឡើងវិញ

2018-03-31 07:00:00
ចំនួនមតិ 0 | ចំនួនចែករំលែក 0

សប្បាយ និងទុក្ខគឺជារឿងពីរដើរទន្ទឹមគ្នាក្នុងទំនាក់ទំនងស្នេហា។ គ្រាន់តែថា តើភាគីទាំងសងខាងអាចបញ្ចៀសទុក្ខសោកទាំងនោះបានច្រើនកម្រិតណា។ ប្រសិនអ្នកកំពុងតែស្ថិតក្នុងស្ថានភាពតឹងតែង ព្រោះស្នេហាកំពុងតែជួបវិបត្តិជិតដើរដល់ផ្លូវបែកបាក់ និងមិនដឹងថាគួរតែតស៊ូបន្ត ឬបញ្ចប់ ចូរស្វែងរកសញ្ញាទាំង៥ ខាងក្រោយ។ ដរាបណាអ្នកមានចំណុចទាំងនេះ អ្នកគួរតែផ្ដល់ឧកាសឲ្យគ្នា ដើម្បីសង្គ្រោះស្នេហាដែលខ្ទេចខ្ទីត្រឡប់មកវិញ៖

១.អ្នកនៅតែជឿជាក់លើគាត់

ភាពស្និទ្ធស្នាលកើតឡើងដោយសារតែភាពជឿជាក់ ហើយភាពជឿជាក់កើតឡើងដោយសារតែអ្នកហ៊ានបើកចំហអារម្មណ៍ពិតអំពីតម្រូវការផ្ទាល់ខ្លួនប្រាប់គ្នាទៅវិញទៅមក។ ទោះជាពេលនេះដៃគូអ្នកមិនទាន់ក្លាហានគ្រប់គ្រាន់ មិនហ៊ានបណ្ដោយខ្លួនឲ្យស្និទ្ធស្នាលខ្លាំងជាមួយអ្នកវិញ ប៉ុន្តែអ្នកនៅតែមានជំនឿថាក្រោយឆ្លងកាត់ពេលវេលាយូរជាមួយគ្នា គាត់នឹងផ្លាស់ប្ដូរជាមិនខាន។

២.ឆ្លងផុតឧបសគ្គ ជាមួយការគោរព កោតសរសើរគ្នាទៅវិញទៅមក

ឧបសគ្គតូចធំគ្រប់យ៉ាងធ្វើឲ្យអ្នកទាំងពីរកាន់តែរឹងមាំឡើងពីមួយថ្ងៃទៅមួយថ្ងៃ។ អ្នកទាំងពីរមិនដែលបោះបង់គ្នាចោលម្ដងណាទេ ទោះជាស្ថិតក្នុងស្ថានភាពលំបាក តឹងតែងប៉ុណ្ណាក៏ដោយ។ ប្រសិនបើអ្នកនៅតែសម្លឹងឃើញគូស្នេហ៍អ្នកជាមនុស្សគួរឲ្យគោរព ក្លាហាន គួរឲ្យចង់នៅក្បែរ មានន័យថាអ្នកនៅតែត្រូវការគាត់ខ្លាំងដដែល។

៣.អ្នកនៅតែជឿលើឥទ្ធិពលស្នេហាពិត

អ្នកគិតថាស្នេហាពិតលើលោកនៅតែមាន។ ឱប ថើបគាត់ អង្អែលស្មាគាត់ ព្រួយបារម្ភពីគាត់ ផ្ដល់ក្ដីស្រឡាញ់ដល់គាត់ឲ្យបានច្រើន ញឹកញាប់ជាងមុន ប្រាកដជាធ្វើឲ្យរបួសស្នាមទាំងឡាយ ជាសះស្បើយដោយឯកឯងជាមិនខាន។ ពេលវេលា និងក្ដីស្រឡាញ់ពិតជាឱសថទិព្វអាចព្យាបាលផ្លូវចិត្តអ្នកទាំងពីរឲ្យប្រសើរឡើងក្នុងពេលឆាប់ៗ។

៤.អ្នកទទួលស្គាល់ថា អ្នកក៏រួមចំណែកខុសដែរ

ស្នេហាបង្កើតឡើងដោយមនុស្សពីរនាក់ ប្រសិនបើវាត្រូវបានបញ្ចប់ដោយសារបញ្ហាណាមួយ ទាំងពីរនាក់សុទ្ធតែមានចំណែកខុសរៀងៗខ្លួន។ ដើម្បីជួសជុលភាពប្រេះឆានោះ អ្នកត្រូវទទួលស្គាល់កំហុសខ្លួនឯងជាមុនសិន រួចចាប់ផ្ដើមនិយាយពាក្យ៤ឃ្លានេះ៖ “ឲ្យខ្ញុំសូមទោស លើកលែងទោសឲ្យខ្ញុំផង អគុណច្រើន និងខ្ញុំពិតជាស្រឡាញ់អ្នកខ្លាំងណាស់”។

៥.ស្រមៃដល់ថ្ងៃដែលគ្មានគ្នានៅក្បែរតទៅទៀត

សាកស្រមៃថា បន្ទាប់ពីអ្នកបែកគ្នាហើយ តើអ្នកនឹងមានអារម្មណ៍បែបណា? សប្បាយចិត្ត ឬក៏ពិបាកចិត្ត? រស់នៅដោយរបៀបណា? ប្រសិនភាពសោកសៅ ធុញថប់ ឯកោ កណ្ដោចកណ្ដែង ភ័យខ្លាចតែងតែតាមលងបន្លាចអ្នកគ្រប់ពេលគ្មានគាត់នៅក្បែរ ច្បាស់ណាស់ថា អ្នកមិនទាន់អស់និស្ស័យស្នេហ៍ជាមួយគាត់ទេ៕

ចុចអាន៖ក្រោយបែកបាក់ស្នេហា ៥សញ្ញានេះបញ្ជាក់ថាអ្នកកំពុងត្រៀមបើកបេះដូងសាជាថ្មី

ប្រភព៖ powerofpositivity អត្ថបទ៖ អូន បញ្ញា