វិធីដោះទាល់គ្រោះថ្នាក់ បើមានអាសន្នទាំងនេះពេលធ្វើដំណើរកម្សាន្ត

2018-03-09 09:34:39
ចំនួនមតិ 0 | ចំនួនចែករំលែក 0

គ្រប់គ្នាតែងចង់បានភាពរីករាយ និងសុវត្ថិភាពរាល់ពេលធ្វើដំណើរកម្សាន្ត ប៉ុន្តែយើងពិតជាមិនអាចដឹងពីឧបសគ្គផ្សេងៗដែលអាចមករារាំងដំណើររបស់យើងបានឡើយ។ នេះមិនមែនជាការដាក់ទំនាយទេ តែបើគ្រោះថ្នាក់ដោយប្រការណាមួយកើតឡើងពិតមែន អ្នកត្រូវចេះពីវិធីដោះទាល់។

១. ពេលរថយន្តបែកកង់៖ ត្រូវទប់ចង្កូតរថយន្តឲ្យនឹងរហូតដល់វាអស់ល្បឿនដោយខ្លួនឯង ដើម្បីកុំឲ្យទៅបុកជាមួយអ្វីផ្សេងទៀត។ ក្នុងករណីបើអ្នកជួបហតុការណ៍ប៉ះទង្គិច ត្រូវការពារក្បាលរបស់អ្នកមុនគេ ឬរករបស់ទន់ៗមកខ្ទប់ក្បាលហើយឱនចុះក្រោម។

រូបតំណាង

២. ពុលអាហារតាមផ្លូវ៖ ពេលពុលនិងក្អួត អ្នកជំងឺនឹងត្រូវបាត់បង់ជាតិទឹកច្រើន ដូច្នេះត្រូវឲ្យគេផឹកទឹកបន្ថែម ហើយប្រញាប់ប្រញាល់ជូនទៅមន្ទីរពេទ្យ។

រូបតំណាង

៣. រញ្ជួយដី៖ សម្រាប់អ្នកដែលមានដំណើរកម្សាន្តទៅប្រទេសដែលធ្លាប់ជួបបញ្ហានេះ គួរតែដឹងពីវិធីការពារខ្លួន។ សម្រាប់អ្នកនៅក្នុងបន្ទប់ ត្រូវរកកន្លែងពួនដូចជា ក្រោមគ្រែ ឬក្រោមតុ ជៀសវាងរបស់អ្វីមួយធ្លាក់លើ ម៉្យាងទៀតអ្នកក៏ត្រូវនៅឲ្យឆ្ងាយពីកន្លែងដែលមានចរន្តភ្លើងផងដែរ។

៤. ភ្លើងឆេះ៖ ចំពោះអ្នកដែលស្នាក់នៅតាមផ្ទះសំណាក់ ឬសណ្ឋាគារ គួរតែដឹងពីទីតាំងច្រកចេញបន្ទាន់។ ហាមដាច់ខាតការប្រើប្រាស់ជណ្តើរយន្ត ហើយប្រសិនបើករណីឆេះធ្ងន់ធ្ងរខ្លាំងមិនអាចសង្គ្រោះបាន គួរចាកចេញដោយយករបស់សំខាន់ដូចជា កាបូបលុយ លិខិតឆ្លងដែន ឬទូរសព្ទដៃជាដើម។

៥. វង្វេងព្រៃ៖ យើងមិនដឹងថាក្នុងព្រៃមានសត្វសាហាវប្រភេទណាខ្លះទេ ដូច្នេះគួរតែរកកន្លែងសុវត្ថិភាពជាមុនសិន ហើយឡើងទៅលើទីខ្ពស់ដើម្បីស្វែងអ្នកជិតខាង ឬកន្លែងដែលមានមនុស្សស្នាក់នៅ។ មួយវិញទៀត ត្រូវគូសសញ្ញាចំណាំផ្លូវដែលខ្លួនបានឆ្លងកាត់៕