បើបុរសបើកចំហរឿង ៥យ៉ាងនេះដល់អ្នក គឺគាត់ច្បាស់លាស់ និងទុកចិត្តអ្នកខ្លាំងបំផុត

2018-01-28 05:36:45
ចំនួនមតិ 0 | ចំនួនចែករំលែក 0

ភាពស្មោះត្រង់ គឺជាអ្វីដែលគូស្នេហ៍គ្រប់រូបតែងត្រូវការពីគ្នា។ ប៉ុន្តែពេលខ្លះ ដោយសារតែការស្គាល់គ្នាមិនទាន់ច្បាស់ គាត់ក៏មិនព្រមបង្ហាញរឿងផ្ទៃក្នុងផ្ទាល់ខ្លួនមួយចំនួនប្រាប់អ្នក ព្រោះតែគាត់គិតថាស្នេហារវាងអ្នកទាំងពីរមិនមានភាពរឹងមាំគ្រប់គ្រាន់សម្រាប់គាត់។ ដើម្បីជាតម្រុយខ្លះៗសម្រាប់អ្នក ខាងក្រោមនេះជារឿង៥យ៉ាងដែលមនុស្សប្រុសភាគច្រើនបើកចំហ ពេលគាត់ទុកចិត្ត និងប្រាកដប្រជាជាមួយមនុស្សស្រីក្បែរខ្លួនខ្លាំងបំផុត៖

១. គាត់ប្រាប់អ្នកថា គាត់ពិតជាប្ដូរផ្ដាច់ជាមួយអ្នកខ្លាំងណាស់

ការនិយាយពាក្យបែបនេះ ធ្វើឲ្យមនុស្សស្រីដឹងពីចំនុចខ្សោយ បានចិត្ត និងអាចយកប្រៀបលើគាត់នៅពេលក្រោយ។ ប៉ុន្តែមនុស្សប្រុសដែលស្រឡាញ់អ្នកខ្លាំង គាត់មិនខ្លាចនឹងបង្ហាញពីឆន្ទៈ ឬការប្ដេជ្ញាចិត្តដ៏មុតមាំរបស់គាត់ឡើយ ព្រោះគាត់ដឹងច្បាស់ថាអ្នកជាប្រភេទមនុស្សស្រីបែបណា។

រូបតំណាង

**២. គាត់ប្រាប់អ្នកថា គាត់ចង់ណែនាំអ្នកឲ្យក្រុមគ្រួសារគាត់ស្គាល់**

មនុស្សប្រុសប្រហែលជាមិនយកគ្រួសារផ្ទាល់ខ្លួន ជានុយដើម្បីទាក់ចិត្តព្រោះតែចង់លេងសើចជាមួយរឿងស្រីញីឡើយ។ ដូច្នេះប្រសិនគាត់ចង់ឲ្យគ្រួសារគាត់ទទួលស្គាល់អ្នក ច្បាស់ណាស់ថាគាត់ចាត់ទុកអ្នកជាគូអនាគតរបស់គាត់រួចបាត់ទៅហើយ។

៣. គាត់ប្រាប់អ្នកអំពីភាពភ័យខ្លាចរបស់គាត់

ដូចអ្នកធ្លាប់ដឹងស្រាប់ មនុស្សប្រុសមិនងាយបង្ហាញចំនុចខ្សោយ ឬភាពទន់ជ្រាយប្រាប់មនុស្សស្រីទេ។ ប្រសិនគាត់បង្ហាញវាប្រាប់អ្នក ដោយមិនខ្លាចថាអ្នកអាចរិះគន់ឬមើលស្រាលគាត់ នោះមានន័យថាគាត់ស្រឡាញ់អ្នកខ្លាំង រហូតគិតថាអ្នកគឺជាគាត់ ដូច្នេះគ្មានរឿងអ្វីដែលគាត់ត្រូវខ្មាសឡើយ។

៤. គាត់ប្រាប់អ្នកអំពីក្ដីស្រមៃនៅថ្ងៃអនាគតរបស់គាត់

មនុស្សណាក៏ដោយ ក៏មិនងាយចែករំលែកក្ដីស្រមៃផ្ទាល់ខ្លួនទៅអ្នកផ្សេងដែលខ្លួនមិនទុកចិត្តឬប្រាកដប្រជាជាមួយឡើយ។ ដូច្នេះប្រសិនគាត់ចែករំលែកព័ត៌មានសំខាន់បែបនេះជាមួយអ្នក នោះក៏ព្រោះតែការទុកចិត្តដ៏ខ្លាំងលើសលប់របស់គាត់ចំពោះអ្នក។

៥. គាត់ប្រាប់អ្នកនូវរឿងដែលអ្នកមិនចង់ឮ

ចុងក្រោយបង្អស់ ពេលគាត់ប្រាប់អ្នកនូវរឿងពិតមួយចំនួនដែលអ្នកមិនចង់ឮ ឬស្ដាប់ មានន័យថាគាត់លែងចង់និយាយកុហក ដើម្បីឲ្យអ្នកសប្បាយចិត្តដូចមុនហើយ។ គាត់ចង់ឲ្យអ្នករៀនទទួលស្គាល់ការពិត និងលែងរំពឹងរស់នៅក្នុងពិភពបោកប្រាស់នោះតទៅទៀត។៕