ស្រីស្អាតប្រាប់គន្លឹះជាប់អាហារូបករណ៍ទៅរៀនស្រុកគេ អត់អស់លុយមួយរៀល (វីដេអូ)

2017-07-06 07:40:32
ចំនួនមតិ 0 | ចំនួនចែករំលែក 0

សៀង លីតដែត យុវតីខ្មែរដ៏ស្រស់ស្អាតម្នាក់ បានជាប់អាហាររូបករណ៍ទៅរៀន នៅសាកលវិទ្យាល័យបច្ចេកវិទ្យា Nanyang (NTU) ដ៏ល្បី ក្នុងប្រទេសសិង្ហបុរី ក៏ព្រោះតែបានធ្វើនូវរឿង ៣យ៉ាងនេះ។ តាមការបញ្ជាក់ នៅក្នុងវីដេអូ ដែលលី ដែត បានផ្ញើរមកកាន់ កញ្ញា យើង បានឲ្យដឹងថា រឿងទាំង ៣ ដែលធ្វើឲ្យនាងទទួលបានអាហាររូបករណ៍ពេញថ្លៃសិក្សាថ្នាក់បរិញ្ញាប័ត្រ នៅក្រៅប្រទេសនោះ រួមមាន៖

Take action (ព្យាយាម ហើយបញ្ចេញសកម្មភាព)៖ បើចង់បានអាហាររូបករណ៍ ត្រូវស្វះស្វែងរកមើល។ មើលហើយ ត្រូវធ្វើសកម្មភាព ដាក់ពាក្យ ឬស្វែងរកការប្រឹក្សាយោបល់ ដើម្បីទទួលបានអាហាររូបករណ៍នោះ។ បើដាក់លើកទី១មិនជាប់ ត្រូវប្រឹងដាក់ហើយដាក់ទៀត នោះយើងគង់តែនឹងអាចមានឱកាស។ លើសពីនេះ ត្រូវតែមានភាពជឿជាក់លើខ្លួនឯងជានិច្ច។
Write your own happy ending មានន័យថា បញ្ចប់អត្ថន័យជីវិតដោយខ្លួនឯង៖ ព្យាយាមកំណត់គោលដៅរបស់ខ្លួនថា តើចង់បានអ្វី ហើយព្យាយាមធ្វើវាឲ្យខានតែបាន។ ទំព័រជីវិតមានន័យ ឬ អត់ គឺយើងជាអ្នកកំណត់!
Thank (ផ្តល់ការអរគុណ)៖ ត្រូវចេះអរគុណ ដល់អ្នកដែលបានគាំទ្រយើងឲ្យទទួលបានជោគជ័យ រួមមានឪពុកម្តាយ គ្រូបង្រៀន និងមិត្តភក្តិ។ ហើយក្រោយទទួលបានជោគជ័យ ត្រូវចេះតបស្នងទៅកាន់អ្នកដែលបានធ្វើគុណដាក់យើង និងដល់សង្គមជាតិ។

លីតដែត ដែលជាអតីតសិស្សពូកែផ្នែករូបវិទ្យាទូទាំងប្រទេស មកពីសាលាបាក់ទូក បានបន្តថា ទោះបីជានាងទទួលបានជោគជ័យក្នុងការសិក្សា ប៉ុន្តែកន្លងមកនាងក៏ធ្លាប់ជួបនឹងផលវិបាកជាច្រើនផងដែរ ជាពិសេសគឺពេលនាងទើបបានទៅរៀននៅប្រទេសសិង្ហបុរី។ ផលវិបាកចំពោះលីតដែត មានដូចជា ការសម្របសម្រួលនឹងភាសា ការរៀនសូត្រដោយខ្លួនឯង ទំនាក់ទំនងជាមួយសិស្សដែលជាជាតិសាសន៍ដទៃ និងសម្ពាធក្នុងការសិក្សា ដែលតម្រូវឲ្យរៀនងាប់ចោល។ ប៉ុន្តែទោះជាយ៉ាងណា លីតដែត ប្រាប់ថា ដើម្បីជំនះគ្រប់បញ្ហា គឺយើងត្រូវតែបើកចិត្តឲ្យទូលាយដើម្បីទទួលយកបរិយាកាសថ្មី ហើយត្រូវមានសុទិដ្ឋិនិយម ក្នុងខ្លួនជានិច្ច៕

សូមមើលវីដេអូរបស់ លីតដែត នៅទីនេះ៖

អត្ថបទ៖ ភារី