ម៉ាក់ៗប្រហែលជាធ្លាប់បានស្គាល់ហើយអំពីជម្រើសនៃការសម្រាលកូន ពោលគឺការសម្រាលដោយធម្មជាតិ និងការសម្រាលដោយវះកាត់។ ជាទូទៅ ស្រ្តីត្រូវបានលើកទឹកចិត្តឲ្យសម្រាលបុត្រតាមធម្មជាតិ ព្រោះវាមានផលវិបាកតិចតួចជាងការវះកាត់។

ការវះកាត់ ជាធម្មតាត្រូវបានធ្វើឡើងលុះត្រាតែការសម្រាលតាមធម្មជាតិអាចមានគ្រោះថ្នាក់ចំពោះម្តាយ និងកូនតែប៉ុណ្ណោះ។ យ៉ាងណាមិញបច្ចុប្បន្ននេះអត្រានៃការសម្រាលបុត្រដោយការវះកាត់ មានការកើនឡើងជាលំដាប់គួរឲ្យព្រួយបារម្ភ ជាពិសេសការវះកាត់ដោយគ្មានមូលហេតុត្រឹមត្រូវ។ ស្រ្តីមួយចំនួនយល់ខុសថា ការសម្រាលកូនដោយវះកាត់ មាន ភាពងាយស្រួល ដោយមិនចាំបាច់ឆ្លងកាត់ការឈឺពោះសម្រាល និងមើលរំលងផលវិបាកផ្សេងៗទៅថ្ងៃអនាគត ដែលបណ្តាលមកពីការវះកាត់នេះ។

តើមានផលវិបាកអ្វីខ្លះអំឡុង និងក្រោយពេលការវះកាត់សម្រាលកូន? ផលវិបាកអំឡុងពេលវះកាត់

• ផលវិបាកនៃថ្នាំសណ្តំ (Syndrome de Mendelson)
• ការបាត់បង់ឈាមច្រើនពេលវះកាត់
• ការដាច់រហែកកស្បូនខ្លាំង
• របួសប្លោកនោម ឬពោះវៀន ដែលទាមទារការសម្រាកនោពេទ្យរយៈពេលយូរ

ផលវិបាកក្រោយពេលវះកាត់ភ្លាមៗ

• ការបង្ករោគផ្សេងៗ មានដូចជា៖ ការរលាកប្លោកនោម រលាកភ្នាសក្នុងរបស់ស្បូន រលាកស្រោមពោះ ឬអាចដល់បង្ករោគក្នុងសរសៃឈាម។
• ការហូរឈាមក្រោយពេលវះកាត់ មានកកឈាមលើស្នាមរបួសស្បូន ឬក្រោមរបួសស្បែក
• ភាពស្លេកស្លាំង
• ផលវិបាកស្ទះសរសៃឈាមតូចៗ ជាពិសេសសរសៃឈាមក្នុងសួតធ្វើឲ្យមានវិបត្តិផ្លូវដង្ហើម ផលវិបាកក្រោយពេលវះកាត់ (នៅពេលមានផ្ទៃពោះលើកក្រោយ)៖
• ការវះកាត់យកកូនសារជាថ្មី

• ការធ្លាយស្បូន
• សុកពាំងមាត់ស្បូន
• សុកចាក់ឬសក្នុងសាច់ស្បូន ឬចាក់ដល់ប្លោកនោម

ផលវិបាកទាំងអស់នេះមិនសូវកើតមានជាញឹកញាប់ទេ តែក្នុងករណីខ្លះក៏អាចគំរាមគំហែងដល់អាយុជីវិតស្រ្តីជាម្តាយបានផងដែរ។ ដូច្នេះរាល់ការសម្រាលទាំងអស់ ស្រ្តីគួរពិភាក្សាជាមួយគ្រូពេទ្យជំនាញជាមុន ដើម្បីជ្រើសរើសការសម្រាលមួយដ៏ សមស្រប និងមានសុវត្ថិភាពទាំងម្តាយ និងកូន។