តើស្រ្តីវ័យក្មេងអាចមានបញ្ហាស្រុតស្បូនទេ?

2023-12-05 13:10:41
ចំនួនមតិ 0 | ចំនួនចែករំលែក 0

ជំងឺស្រុតស្បូនជាប្រភេទជំងឺដែលកើតលើមនុស្សស្រីវ័យចំណាស់ មិនមែនជាជំងឺកើតលើស្រ្តីវ័យក្មេងនោះទេ។ នេះបើតាមការបញ្ជាក់របស់ លោកស្រីវេជ្ជបណ្ឌិត រ៉ាវុឌ្ឍ សោភារចនា ឯកទេសសម្ភព និងរោគស្រ្តី នៃមន្ទីរសម្ភពរ៉ូស។

លោកស្រីឲ្យដឹងថាជំងឺស្រុតស្បូនច្រើនកើតលើស្រ្តីវ័យយ៉ាងហោចអាយុ៦០ឆ្នាំ មិនកើតលើស្រ្តីវ័យខ្ទង់២០ឆ្នាំ ឬ៣០ឆ្នាំនោះទេ។ លោកស្រីបញ្ជាក់ថា៖ «ពុំមានស្រ្តីកើតជំងឺស្រុតស្បូននៅវ័យ២០ឆ្នាំ ១៨ឆ្នាំ ឬ៣០ឆ្នាំទេ ទោះបីជាគាត់ទើបសម្រាលកូនហើយក៏គាត់មិនមានកើតជំងឺស្រុតស្បូននេះដែរ» ។

លោកស្រីវេជ្ជបណ្ឌិតពន្យល់ថាជំងឺស្រុតស្បូនជាជំងឺដែលស្បូនទាំងមូល ឬពេលខ្លះជាប្លោកនោម ឬជាដំបន់រន្ធគូទដែលធ្លាក់មកតាមទ្វារមាស។ លោកស្រីបន្តថា៖ «បញ្ហានេះកើតមានដោយសារតែសាច់ដុំអាងត្រគាកដែលជាទម្ររបស់វាមានភាពទន់ជ្រាយ ដែលកើតឡើងដោយសារអាយុរបស់ស្រ្តី នៅពេលយើងអាយុច្រើន ជាទូទៅអាយុ៦០ឆ្នាំឡើង កម្លាំងទ្រនៃសាច់ដុំថយចុះ អីចឹងសរីរាង្គទាំងឡាយដែលទ្រដោយសាច់ដុំហ្នឹងក៏អាចធ្លាក់ចុះ អីចឹងហើយពុំមានហេតុផលអ្វីដែលស្រ្តីវ័យក្មេងអាចកើតជំងឺនេះនោះទេ»។

បើតាមលោកស្រីវេជ្ជបណ្ឌិតស្រ្តីវ័យក្មេងដែលសម្រាលកូនច្រើនចាប់ពីបីនាក់ឡើង មានភាពធាត់ខ្លាំង និងពុំចេះហាត់ប្រាណពង្រឹងអាងត្រគាកជាដើម គឺអាចប្រឈមនឹងជំងឺស្រុតស្បូននៅវ័យ៦០ឆ្នាំឡើង។

ទស្សនាវីដេអូលោកស្រីវេជ្ជបណ្ឌិតទាំងស្រុងចុចទីនេះ!

អត្ថបទ៖ សុខា