"Women Shaping Cambodia" កម្មវិធីនិយាយពីស្រ្ដី និងភាពជាអ្នកដឹកនាំ

2023-09-23 08:44:41
ចំនួនមតិ 0 | ចំនួនចែករំលែក 0

កម្មវិធីនិយាយពីស្រ្តីមានឈ្មោះថា «Empowering Growth: The Women Shaping Cambodia» បានប្រកាសបើកកម្មវិធីផ្លូវការរបស់ខ្លួនហើយនៅព្រឹកថ្ងៃទី២៣ ខែកញ្ញា ឆ្នាំ២០២៣ ដែលកម្មវិធីនេះរៀបចំឡើងនៅ Chip Mong Mega Mall ក្នុងរាជធានីភ្នំពេញ។

(អ្នកស្រី Kim Tol Tan អគ្គនាយក Grow4Growth Consultant កំពុងថ្លែងបើកកម្មវិធី)

អ្នកស្រី Kim Tol Tan អគ្គនាយក Grow4Growth Consultant និងជាអ្នករៀបចំកម្មវិធី Empowering Growth: The Women Shaping Cambodia បានលើកឡើងថាកម្មវិធីនេះធ្វើឡើងក្នុងគោលបំណងបង្ហាញ និងអបអរចំពោះស្រ្តីកម្ពុជាដែលបានវិវត្តខ្លួនក្លាយជាអ្នកដឹកនាំនៅក្នុងស្ថាប័ន ឬវិស័យផ្សេងៗក្នុងប្រទេសកម្ពុជា។

អ្នកស្រីបន្ថែមទៀតថា កម្មវិធីនេះក៏មានបំណងញ៉ាំងចិត្តដល់ស្រ្តីផ្សេងទៀតទាំងនៅកម្ពុជា និងពិភពលោកតាមរយៈការបង្ហាញពីបទពិសោធន៍ និងជំនាញវិជ្ជាជីវៈដែលស្រ្តីលេចធ្លោក្នុងភាពជាអ្នកដឹកនាំទាំងនេះបានឆ្លងកាត់ និងបញ្ហាដែលពួកគាត់ជួបប្រទះ និងដោះស្រាយបានជោគជ័យ។

លើសពីនេះអ្នកស្រី Kim Tol Tan បានបញ្ជាក់ថាកម្មវិធីនិយាយពីរឿងរ៉ាវស្រ្តីជាអ្នកដឹកនាំនេះក៏នឹងចូលរួមជំរុញឲ្យមានសមភាពយេនឌ័រ និងភាពចម្រុះក្នុងការដឹកនាំក្នុងប្រទេសកម្ពុជា ក៏ដូចជាតួនាទីរបស់ស្រ្តីក្នុងការអភិវឌ្ឍប្រទេសជាតិ។

(លោកជំទាវ គ្រី ណាល់លីស កំពុងថ្លែងក្នុងកម្មវិធី)

លោកជំទាវគ្រី ណាល់លីស រដ្ឋលេខាធិការក្រសួងកិច្ចការនារី មានប្រសាសន៍ក្នុងកម្មវិធីនោះដែរថា៖ «គំនិតផ្ដួចផ្ដើម និងកម្មវិធីដែលដាក់សម្ពោធនៅថ្ងៃនេះជាផ្នែកមួយបន្ថែមទៀតដែលនឹងចូលរួមចំណែកជាការឆ្លើយតបនឹងបញ្ហាប្រឈមនានា និងការធ្វើឲ្យប្រសើរឡើងនូវភាពជាអ្នកដឹកនាំរបស់ស្រ្តី និងការលើកកម្ពស់សមភាពយេនឌ័រ...ដែលអាចបញ្ជាក់ថាស្រ្តី និងក្មេងស្រ្តីអាចធ្វើជាអ្នកដឹកនាំនៅគ្រប់កម្រិត»។

លោកជំទាវបញ្ជាក់ថាតាមរយៈការចូលរួមនេះ ក្រសួងកិច្ចការនារីប្រកាសគាំទ្រ និងបន្តសហការជាមួយកម្មវិធី Empowering Growth: The Women Shaping Cambodia និងបន្តស្វែងរកលទ្ធភាពដើម្បីពង្រីកលទ្ធភាពឲ្យកាន់តែទូលំទូលាយបន្ថែមទៀត។

គួរបញ្ជាក់ថា កម្មវិធី Empowering Growth: The Women Shaping Cambodia នឹងរៀបចំផលិតមាតិកាអំពីរឿងរ៉ាវដ៏គួរឲ្យញ៉ាំងចិត្តរបស់ស្រ្តីកម្ពុជាក្នុងភាពជាអ្នកដឹកនាំរបស់ខ្លួននៅតាមស្ថាប័ន ឬវិស័យផ្សេងៗក្នុងប្រទេសកម្ពុជា។